Read tiv Mbaajiriv 17 Bible Online

Mbaajiriv 17 - tiv bible

Mbaajiriv 17

¹Orgen lu sha tar u iwoogh u Eferaim, iti na er Mika.

²A kaa a ngô na er: Agbenger a azurfa a deri pue kar môm a a lu ndiir we, man u bum u wa ifan sha mi kpaa la, man u ôr kwagh la sha ato a am la, nga her a mo; ka mo m tee a ye. Tsô ngô na gema kaa er: Aôndo A̱ ver u doo doo wan wam.

³Nahan a hide a agbenger a azurfa a deri pue kar môm la, a va na ngô na; ngô na kaa er: Mimi je, m ngu tseghan agbenger a azurfa angan sha ci u TER; nahan yô, me na wan wam sha u a̱ er eev mbu gban man eev mbu keren a ker; yô, me hide a mi, me na u.

⁴Er a hide a inyaregh kila a na ngô na yô, ngô na tôô agbenger a azurfa deri uhar la, na orvareniwa, ngula er eev mbu gban man eev mbu keren a mi; i ver mbu ken ya u Mika.

⁵Un Mika lu a iyou i civir Aôndo ker, nahan a er efodi man terafim shi a tsegha wan na môm er a̱ lu pristi na.

⁶Sha ayange la; tor lu ken Iserael ga; hanma or gbaa eren sha ishima i nan tsô.

⁷Yô, wanyekwaor ugen lu ken Betelehem u ken Yuda ken tsombor u Yuda, un lu Orlevi, gema lu shir heregh.

⁸Or la due ken gar u Betelehem u ken Yuda la, sha u una za lu henpe una zua a ijiir yô; sha zende na la, a va sha tar u iwoogh u Eferaim hen ya u Mika.

⁹Mika pine un er: Ka han u vee? A kaa a na er: Mo m ngu Orlevi u ken Betelehem u ken Yuda la, zan yam, me za lu henpe me zua a ijiir i teman yô.

¹⁰Tsô Mika gema kaa a na er: Tema a mo, lum ter man pristi, me naan we agbenger a azurfa pue sha hanma inyom kua akondo man kwaghyan kpaa. Tsô Orlevi rumun.

¹¹Orlevi tema a or la; wanyekwaor la hingir un er ka wan na nahan.

¹²Tsô Mika ver Orlevi la sha tom; wanyekwaor la hingir pristi na, lu hen ya u Mika.

¹³Nahan Mika kaa er: Hegen yô, m fa TER Una verem dedoo, sha er Orlevi a lu pristi wam yô.