Read tiv Mbaajiriv 3 Bible Online

Mbaajiriv 3 - tiv bible

Mbaajiriv 3

¹Angan ka akuraior a TER undu a her sha er Una kar Iserael mba ve fa ityav mbi Kanaan ga la, sha a yô.

²Ka sha u ikov i Mbaiserael ve̱ fa tsô, ka sha u tesen ve ityav mbi nôngon, jim je yô, ka mba ve vande fan kwagh u mbi ga la;

³ka utor utaan mba Mbafiliti, man Mbakanaan cii man Mbashidon kua Mbahivi mba ve tema sha uwo u Lebanon, hii hen uwo u Baal-hermon zan zan ar gbenda u karen zan Hamati la.

⁴Ve lu her sha ci u karen Mbaiserael sha ve, sha u fan shin vea ver ishima sha atindi a TER, a A na Mose, Mose gema na uter vev la.

⁵Tsô Mbaiserael tema ken atô u Mbakanaan man Mbahiti man Mbaamor man Mbaperishi man Mbahivi kua Mbayebushi;

⁶ve er ônov vev mba kasev, ve di kpaa ve na ior mbala ônov vev mba kasev, ve civir mbaaôndo vev kpaa.

⁷Mbaiserael er kwaghbo sha ishigh ki TER; TER, Aôndo ve, hungul ve, ve gema ve civir Ubaal man Mbaashetaroti.

⁸Nahan ishima vihi TER a Iserael, A gema A tee ve, ve hingir sha ikev i Kushan-rishataim, tor u Mesopotamia; Mbaiserael lu sha ikev i Kushan-rishataim anyom anigheni.

⁹Tsô zum u Mbaiserael vaa a TER yô, TER na Mbaiserael oryiman sha u a̱ yima ve yô, lu Oteniel wan u Kenashi anngô u Kalebu u kiriki.

¹⁰Jijingi u TER sen sha a na, a tema orjir sha Iserael; a za ityav, TER na Kushan-rishataim, tor u Mesopotamia, sha ikev na; nahan a hemba Kushan-rishataim agee.

¹¹Tsô tar la zua a mmem anyom akunduahar, man Oteniel wan u Kenashi mase kpen ye.

¹²Mbaiserael shi er kwaghbo sha ishigh ki TER; nahan TER na Egelon tor u Moabi la agee, za nôngo ityav a Iserael, sha ci u ve er kwaghbo sha ishigh ki TER yô.

¹³A kohol Mbaamon kua Mbaamaleki a na imôngo, tsô a za, a za hemba Iserael; ve ngohol gar u avilegh.

¹⁴Nahan Mbaiserael lu sha ikev i Egelon tor u Moabi anyom pue kar anigheni.

¹⁵Tsô zum u Mbaiserael vaa a TER yô, TER na ve oryiman, lu Ehudi wan u Gera, Orbenyamin, lu orimese. Mbaiserael tindi un a kpandegh hen Egelon tor u Moabi.

¹⁶Ehudi var sanker na ese akur cii, iniembe na lu ishiva i môm; a zer ken atô u riga na shin namegh nagh ku yanegh.

¹⁷A va na Egelon tor u Moabi kpandegh kura; Egelon lu or u kehen mimi.

¹⁸Er a na un kpandegh kera yô, a na ior mba ve tôô kpandegh kura gbenda;

¹⁹kpa un iyol na yô, aren hen awen a i kua a hen Gilgal la yô, a cin a hide a va kaa er: M ngu a loho u ken myer u kaan we, tor; tor kaa er: Huan ving. Tsô mba ve tile a na cii ve due, ve undu un.

²⁰Nahan Ehudi va hen a na, a tema sha iyou i kundun iyol i sha, un tswen. Ehudi kaa er: Aôndo tindim a kwaghôron her a we, tsô a mough sha ikagh ki a tema la, a tile sha.

²¹Nahan Ehudi za uwegh nagh ku imesegh, tsuwa sanker hen namegh nagh ku yanegh, kuma un sha uya,

²²nyôr kua ityôgh cii, ahôm kange sha mi, gadia a tsuwa sanker la sha iyav nav kera ga, a nyôr a uve.

²³Tsô Ehudi due sha kungur, a kôr ihinda i iyou i sha la, a wuhe un ker, a senda i.

²⁴Dugh kera yô, mbayev nav va, va nenge; er ve nenge er i sende ihinda i iyou i sha la yô, ve kaa er: Alaghga ngu wanger iyol ken iyol i sha.

²⁵Ve tile zan zan lan ve ishima cii, kpa a bugh ihinda i iyou i sha la ga; nahan ve tôô makuli ve bugh i; yô, ve kav, ter ve gba, lu hen inya kpenegh.

²⁶Er ve lu timbir her la, Ehudi maa war, a za kar awen a i kua la, a yevese a za nyôr Seira.

²⁷Tsô za nyer yô, a tôngo korough sha tar u iwoogh u Eferaim, Mbaiserael mough a na imôngo sha tar u iwoogh ve sen, lu wen hemen ve ye.

²⁸A kaa a ve er: Dondo nen sha a mo; gadia TER na mbaihomov enev, Mbamoabi sha ikev yen. Tsô ve hungwa ve dondo sha a na, ve ngohol ahongo a Yordan, ve yisa Mbamoabi, ve rumun ma or môm nan per ga.

²⁹Ve wua Mbamoabi hen shighe la kuma ior dubu pue nahan; ve cii ve lu ior mba taver iyol man mba cihin kwagh, ma or môm nan war ga.

³⁰Nahan sha iyange la je Moabi hingir sha ikev i Iserael. Tsô tar la zua a mmem anyom akunduanyiin.

³¹Ken ijime na yô, Shamgar wan u Anati tema, a wua Mbafiliti ior deri ataratar sha gbough ku huren ibua a mi; un kpaa, a yima Iserael.