Read tiv Mbaajiriv 4 Bible Online

Mbaajiriv 4 - tiv bible

Mbaajiriv 4

¹Kpa Mbaiserael shi gba eren isholibo sha ishigh ki TER, zum u Ehudi kpe kera la.

²Tsô TER tee ve, ve hingir sha ikev i Yabin tor u Kanaan, u a lu tor ken Hasor la; orhemen u akumautya na lu Shisera, u a tema ken Harosheti u atôatyev la.

³Tsô Mbaiserael vaa a TER; gadia un lu a akekeautya a iyôô deri utaankarunyiin; a lu eren Mbaiserael ican tsung, anyom ikundu je.

⁴Yô, Debora, profeti u kwase, kwase u Lapidoti, gema lu orjir u Iserael hen shighe la.

⁵A tema shin itinevilegh i Debora hen harga u Rama vea Betel sha tar u iwoogh u Eferaim; Mbaiserael vaan her a na sha ci u jirigh.

⁶Tsô a tindi er, i̱ yila Baraki wan u Abinoam, ken Kedeshi-nafetali, a kaa a na er: TER, Aôndo u Iserael kera kaa er, za za unde sha uwo u Tabor a ior i Nafetali man Sebulon dubu pue a we imôngo, gaa?

⁷Mo Me urugh we Shisera, kurutya u Yabin, Me va a na hen ifi u Kishon, a akekeautya na kua akumautya na; Me na un sha ikev you.

⁸Tsô Baraki kaa a na er: Aluer wea zaan a mo imôngo yô, me za; kpa aluer wea zaan a mo imôngo ga yô, me za ga.

⁹Nahan a kaa er: Me za a we imôngo kpee; kpa we ú zua a icivir sha gbenda u ú ze ne ga, gadia TER Una gema Shisera Una na sha ikev i kwase. Tsô Debora mough, za a Baraki imôngo hen Kedeshi.

¹⁰Baraki lôhô Sebulon kua Nafetali, ve kohol hen Kedeshi; tsô ior dubu pue cir un ijime; Debora kpaa za a na imôngo.

¹¹Kpa Heber, Orkeni, vande paven a Mbakeni, ônov mba Hobabi, won u Mose la, a tim tenti na hen kon u terebin u Saananim ikua ikua a Kedeshi.

¹²Tsô i va kaa Shisera er Baraki wan u Abinoam a kende a yem sha uwo u Tabor yô.

¹³Nahan Shisera kohol akeke na a utya cii, akeke a iyôô lu deri utaankarunyiin, kua ior mba ve lu a na cii, hen Harosheti u atôatyev, va haa hen ifi u Kishon.

¹⁴Tsô Debora kaa a Baraki er: Kohol iyol, gadia nyian ka iyange i TER Una na Shisera sha ikev you je ne; TER kar ngu hemen we je gaa? Nahan Baraki hungwa sha uwo u Tabor, ior dubu pue dondo sha a na.

¹⁵Tsô TER nzughul a Shisera man akeke na cii kua akumautya a na cii kpaa, sha zwa u sanker sha ishigh ki Baraki; nahan Shisera hungwa sha ikyekye na, yevese sha angahar.

¹⁶Kpa Baraki zenda akeke kua akumautya la ijime zan zan ar hen Harosheti u atôatyev; akumautya a Shisera cii kpe ku u sha sanker, or môm war ga.

¹⁷Shisera yevese sha angahar za hen tenti u Yael kwase u Heber, Orkeni; gadia Yabin tor u Hasor man ya u Heber, Orkeni, ve lu ayol a ve bem bem.

¹⁸Tsô Yael za kegh Shisera gbenda, kaa a na er: Kaha heen tere, kaha va her a mo, de cie ga. Tsô a kaha her a na a nyôr ken tenti na; a cir un borogo iyol.

¹⁹A kaa a na er: Shi nam anmnger m̱ ma, gadia imura kôrom. Tsô a bugh ikpa i atumbagh a na un a ma, a hide a cir un her.

²⁰A kaa a na er: Tile sha hunda u tenti, aluer hanma or nana va, nana va pine u er: Or ngu heene? Yô, venda wer: Ei.

²¹Tsô Yael kwase u Heber tôô imande i tenti, shi a tôô msabe kôr sha uwe, a za her a na teghelee a za mande un imande la sha wase, kar kôr shin inya, gadia a lu yaven mem mem; maa a kpe.

²²Tsô er Baraki lu tôvon Shisera angahar yô, Yael due kegh un gbenda, kaa a na er: Va, m tese u or u u keren la. Tsô va nôôr her a na yô, a kav Shisera hen inya kpenegh, a imande i tenti sha wase.

²³Kape Aôndo na Yabin tor u Kanaan sha ikev i Mbaiserael sha iyange la la.

²⁴Mbaiserael gba hemban Yabin tor u Kanaan agee, zan zan ve tim Yabin tor u Kanaan.