Read tiv Mbaajiriv 7 Bible Online

Mbaajiriv 7 - tiv bible

Mbaajiriv 7

¹Tsô Yerubaal, ka Gidion je la, a ior mba ve lu a na cii, ve mough pepe ve za haa afo hen imbor i Harodi; afo a Mbamidian gema lu ve vegher u ken imbusutarimese, hii hen igungu u More zan zan za ar ken hemen shin pev.

²Tsô TER kaa a Gidion er: Ior mba ve lu a we ne ngeem yum, Me fatyô u nan Mbamidian sha ikev ve ga, sha er Iserael a̱ de te ihagh a Mo a̱ kaan er: Ka uwegh agh iyol yam ku yemem ye, ga.

³Yô, za, za yôô, ior cii ve̱ ungwa, kaa wer: Hanma or u nan cie nan gbidi ikarikase iyol yô, nana̱ hide tsô, nana̱ mough hen uwo u Gileadi kera. Nahan ior dubu ikundu kar uhar hide, mase shin dubu pue.

⁴Tsô TER kaa a Gidion er: Nahan kpaa ior shi ngee heregh; yô, za a ve hen mnger, Me za sange u ve her; yô hanma or u Me kaa a we Mer: Ngun a̱ za a we ityô yô, ka nan je nana za a we ye; kpa hanma or u Me kaa a we Mer: Ngun a̱ de ze a we ga yô, nana̱ de ze ga je.

⁵Tsô a va a ior hen mnger, nahan TER kaa a Gidion er: Hanma or u nana ndiar a ndiar mngerem sha nombor er iwa i ndiar nahan yô, ver nan kposo; kape ú er a hanma or u nana gure anu man nana ma la kpaa.

⁶Iyenge i mba ve kese mngerem sha uwe ve ndiar sha zwa yô, ve lu ior deri utar; kpa ior mbagenev cii yô, ve gure a gure anu man ve ma mngerem ye.

⁷Tsô TER kaa a Gidion er: Ka sha ior deri utar mba ve ndiar a ndiar la, Me yima ne, Me na Mbamidian sha ikev you ye; kpa ior mbagenev ve̱ yem hanma or hen ijiir i nan.

⁸Tsô ior ngohol kwaghyan u mbala kua ikor ve i tôngon kpaa; a na ior mba Iserael gbenda cii, hanma or yem hen tenti u nan; kpa ior mba deri utar la yô, a lu a ve her; afo a Mbamidian gema lu un shin pev.

⁹Tsô tugh mbula, TER kaa a na er: Mough, sen nyôr shin afo, gadia M na a sha ikev you.

¹⁰Kpa aluer wea cian u senen yô, za vea wanakiriki wou Pura, sen vea na shin afo,

¹¹za ungwa kwaghôron ve; ken masetyô yô, ishima ia taver we, tsô ú nyôr ken afo. Nahan a sen vea wanakiriki na Pura hen kpeafogh u mbautyav mba ve lu her afo la.

¹²Mbamidian man Mbaamaleki kua ior mba sha vegher u sha ityoughkitaregh la, ve cii ve haa shin pev, ve ngee er ikomon nahan; urakumi vev ngee gande u ôron, er waarawa u shin kpezegemnger nahan.

¹³Zum u Gidion za va yô, orgen gema lu ôron anngô u nan mnyam. A kaa er: Mnyam ciem er, bredi u shair lu menger senen shin afo a Midian, za ta sha tenti je a gba, a gba tiôr a samber hen inya.

¹⁴Anngô u nan la gema kaa er: Ka ma kwagh ugen ga, ka sanker u Gidion wan u Yoashi, Oriserael; Aôndo na Mbamidian kua akumautya cii sha ikev na.

¹⁵Tsô zum u Gidion ungwa m-ôr u mnya, man inja i ma kpaa yô, a gure a civir; a hide hen afo a Iserael, a kaa er: Mough nen sha, gadia TER na akumautya a Mbamidian sha ikev yen ve.

¹⁶Ior mba deri utar mbala, a pav ve akum atar, a na ve ikor i tôngon sha ave ve cii, man ityev mbi gbiliniv a akaghausu a yeghen ken ityev mbila.

¹⁷Tsô a kaa a ve er: Nengen nen sha a mo, kwagh u me er yô, ne kpaa er nen nahan; nenge, zum u me va hen kungur u afoogh yô, kwagh u me er la, ne kpaa er nen nahan.

¹⁸Zum u me tôngo korough yô, mo kua ior mba ve lu a mo imôngo cii, ne kpaa tôngo nen ikor ken akôngoafogh wue wue, kaa nen ner: Sha ci u TER man sha ci u Gidion.

¹⁹Nahan Gidion kua ior deri môm mba ve lu a na la, ve va hen kungur u afoogh sha shighe u mhii u mkor u her atôutu la, shighe u i wa mbakuran mbahev, ica lu a gba ga la; ve tôngo ikor, ve hembe ityev mbi ve lu a mi sha ave la avur avur.

²⁰Akumaior atar la tôngo ikor, ve hembe ityev, ve kôr akaghausu a yeghen la, sha ave a imese, ikor yô, ve kôr sha ave a iyan sha u tôngon; ve ger imo er: Sanker u TER man u Gidion.

²¹Hanma or tile hen ijiir i nan, ve kase afo ve tser; akumautya cii, ande ayem, ve gba gbidyen ivaa, yevese.

²²Er ve tôngo ikor i deri utar la, akumautya la cii, TER er sanker u hanma or gema wua anngô u nan; akumautya la yevese yem hen Bete-shita ken ian i Sereda zan zan a za ar hen ikighirtar i Abel-mehola hen Tabati.

²³I kohol nomsombaiorov mba Iserael mba ken Nafetali man mba ken Asher man mba ken tar u Manase cii, ve zenda Mbamidian ityô.

²⁴Gidion tindi mbatyomov sha tar u iwoogh u Eferaim cii er: Va nen ityav, va nôngo nen a Midian, hide nen ve ahongo zan zan hen Bete-bara man hen Yordan kpaa. Nahan ior mba Eferaim cii kohol, ve hide ve ahongo zan zan hen Bete-bara man hen Yordan kpaa.

²⁵Ve kôr utor mba Midian uhar, Orebi man Seebi; ve wua Orebi hen iwen i Orebi; Seebi yô, ve wua un hen ihungwa i shoghol wain i Seebi, ve zenda Mbamidian ityô; ve va a ityough ki Orebi kua ki Seebi kpaa hen Gidion yande Yordan.