Read tiv Mbaajiriv 8 Bible Online

Mbaajiriv 8 - tiv bible

Mbaajiriv 8

¹Tsô ior mba Eferaim kaa a na er: Ka nyi u er a vese nahan, u yer se shighen u u za sha u za nôngon ityav a Mbamidian la ga? Ve zôhô a na tsung.

²Nahan a kaa a ve er: Ka nyi je m er i kom sha i yene? Twaryaren u Eferaim hemba sunda u Abieser gaa?

³Aôndo na Orebi man Seebi utor mba Midian, sha ikev yen; ka nyi je m fetyô u eren i kuman sha a vene? Tsô asema yôhôl ve er a kaa nahan yô.

⁴Tsô Gidion va hen Yordan va per a ior deri utar mba ve lu a na imôngo la, ve vôr, nahan kpaa ve lu tôvon ve ityô.

⁵Tsô a kaa a ior mba Sukoti er: Shi na nen mba ve lu a mo ityô ne kwaghyan gadia ve vôr, man mo m ngu zendan Seba man Salmuna utor mba Midian ityô.

⁶Mbatarev mba Sukoti gema kaa er: Ave a Seba man Salmuna hingir sha ikev you ve shinii, sé na akumautya a ou kwaghyana?

⁷Tsô Gidion kaa er: Nahan yô, zum u TER Una na Seba man Salmuna sha ikev yam yô, me côvor ne iyol sha usaa mba ken toho kua ageva kpaa.

⁸Tsô a mough her, a yem ken Penuel, ve kpaa a za ôr a ve nahan; ior mba Penuel kpaa gema ôr a na er Mbasukoti vande ôron a na nahan.

⁹Ior mba Penuel kpaa a kaa a ve er: Aluer mea hide doo doo yô, me hembe gôgôyou u a tav yum ne.

¹⁰Seba man Salmuna yô, ve lu ken Karkor a akumautya a ve, ve kuma er ior dubu pue kar utaan nahan, ka akumautya a ior mba sha ityoughkitaregh a a mase shin cii je ne; gadia mba ve kpe ken utya kuma ior dubu deri man ikundu, ka mba ve kuma u tsuwan sanker yô.

¹¹Tsô Gidion kôndo sha gbenda u mba ve teman ken utenti la, gbenda la kar Noba man Yogbeha vegher u sha ityoughkitaregh, a za hemba ikumutya la; gadia ikum la hunde ishima kera.

¹²Seba man Salmuna ve yevese, a zenda ve ityô; a za kôr Seba man Salmuna utor mba uhar mba Midian mbala, a sambe ikumutya la.

¹³Tsô zum u Gidion wan u Yoashi mough ken utya, hen ikooso-woogh i Hereshi la, hide yô,

¹⁴a kôr wanye kwaor u ior mba Sukoti, a pine un, ngula nger un ati a mbatarev mba Sukoti kua mbatamen mba her la, ior akunduatargber kar utaankaruhar.

¹⁵Tsô a va hen ior mba Sukoti a kaa er: Nenge nen, Seba man Salmuna mban, mba iyange ne naham tar sha ci ve ne, ne kaa ner: Ave a Seba man Salmuna hingir sha ikev you ve shinii, sé na ior ou mba ve ver la kwaghyana?

¹⁶Tsô a kôr mbatamen mba gar la, a tôô usaa mba ken toho kua ageva, a tese ior mba Sukoti kwagh a mi.

¹⁷Shi a hembe gôgôyou u Penuel u a tav yum la kpaa, a wua nomsombaiorov mba hen gar la kpaa.

¹⁸Tsô a pine Seba man Salmuna er: Ior mba iyange ne wua hen Tabor la, iyange ve lu nana? Ve kaa er: Iyange ve lu er we nahan; hanmô ve lu iyol er wan tor nahan.

¹⁹A kaa er: Ve lu anngôôv av, ônov mba ngôm je; mimi je er TER A lu u uma ne, aluer nea de ve uma yô, ma m woo ne ga.

²⁰Tsô a kaa a Yeter wan na u iunda er: Mough, wua ve. Kpa wanye la tsuwa sanker na ga, lu cian sha ci u lu wanye yum yô.

²¹Tsô Seba man Salmuna, ve kaa er: We, iyol you mough, wua se; gadia agee a or nga sha mlu u nan vough. Nahan Gidion mough, wua Seba man Salmuna, a sagh ikav mbi hweev mbi mbi lu sha imon i urakumi vev la.

²²Tsô ior mba Iserael kaa a Gidion er: Va, va tema tor wase, we man wan wou man shi wan u wan wou kpaa, gadia u yima se sha ikev i Midian.

²³Kpa Gidion gema kaa a ve er: Me tema tor wen ga, wan wam kpaa una tema tor wen ga; ka TER A tema tor wen ye.

²⁴Tsô Gidion kaa a ve er: Sarem ka sônon ne kwagh; hanmô wen ma nan nem iyôgh ki ken ato ki nan zough a mi sha ishar i yan yô. Gadia ve lu a iyôv mbi zenaria ker ato, sha er ve lu Mbaishemael yô.

²⁵Ve gema ve kaa er: Se rumun sha ishima i môm je, sé na u mbi. Tsô ve samber ikondo, hanmô ve gbihi iyôgh ki sha ishar i nan sha mi.

²⁶Myohom ma iyôv mbi ken ato mbi zenaria mbi a sôn yô, kuma ushekel mba zenaria dubu man deri utaankaruhar; i wa ikav mbi hweev, man akaa a hweegh a wan ken ato, man akondo a nyian dindee a utor mba Midian, ker ga; man mshirim ma ma lu sha imon i urakumi vev kpaa i wa ma ker ga.

²⁷Gidion gema er efodi a mi, ver un ken gar na, Ofera; tsô Iserael cii gba va eren idya heregh sha u civir un; gema hingir kwagh u hônon Gidion a mi kua mba hen ya na.

²⁸Nahan Midian cia Mbaiserael var inya, ve kera kende ityouv sha mayange ga; tar la mem anyom akunduahar sha ayange a Gidion.

²⁹Tsô Yerubaal wan u Yoashi, yem za tema hen ya na iyol na.

³⁰Gidion lu a ônov akunduatargber mba a mar iyol na yô, gadia a lu a kasev kpishi.

³¹Kpankwase na u ken Shekem kpaa mar un wan, a ii un iti er Abimeleki.

³²Gidion wan u Yoashi kpe, a tsa sha won kpishi, i ii un ken uwar u ter na Yoashi, ken Ofera u Mbaabieser.

³³Gidion kpeen kera yô, Mbaiserael shi gba eren idya sha u dondon Ubaal, ve gema Baal-beriti hingir aôndo ve.

³⁴Mbaiserael kera umbur TER, Aôndo ve, u A yem ve sha ikev i mbaihomov vev mba ve kase ve cii ga;

³⁵man shi ve kera er a ior mba Yerubaal (ka Gidion je la) dedoo er iyange un lu eren a Iserael nahan la ga.