Read tiv Mpase U Yohane 12 Bible Online

Mpase U Yohane 12 - tiv bible

Mpase U Yohane 12

¹Tsô i nenge a zegeivande Sha. Kwase cir iyange iyol, uwer lu shin angahar a na, lu a tsar u sha asan pue kar ahar sha ityough nagh,

²gema lu iyav, lu ngoron sha ican i mar, lu toghor mar.

³Shi i nenge a ivande igen Sha, nenge, zegedarakon u nyian lu, lu a ityouv itiankarihiar man akor pue man sha ityouv itiankarihiar la yô, lu a ader a tor ataankarahar.

⁴Tsa na kombor tiôn môm u ken atôôn atar a asan a sha aôndo haa shin inya. Tsô darakon la va tile sha ishigh ki kwase u a sôôn u maren la, sha u zum u una mar yô, maa un una mena wan la.

⁵Nahan a mar wan u nomso u una tema tor sha akuraior sha tôgh ku iyôôgh; i tsuwe wan na la kera, i yem a mi sha Aôndo man sha ikônough Nagh ki torough.

⁶Kwase la gema yevese yem ken ikôngo ape a lu a ijiir i Aôndo vande sôron sha ci na sha u á koso un her, á kuma ayange dubu man deri uhar man akunduatar.

⁷Tsô ityav gba Sha, Mikael kua mbatyomov nav lu nôngon a darakon. Darakon a mbatyomov nav kpaa lu nôngon,

⁸kpa a hemba ga, ian kera lu sha ci ve Sha kpaa ga.

⁹I gbihi zegedarakon la shin inya, ka tseiyô je la, u i yer un er Diabolo man shi Satan la, u a lu tsughun tar cii la, i gbihi un shin tar shi i gbihi mbatyomov nav a na imôngo kpaa.

¹⁰Tsô m ungwa zegeimo Sha, lu kaan er: Hegen yô, myom man agee man tartor u Aôndo wase man shi tahav mbu Kristu Na kpaa va ve, gadia or u senden anmgbianev asev la yô, i gbihi un kera, un u a senden ve sha ishigh ki Aôndo atetan kpaa, tugh kpaa la.

¹¹Ve yô, ve hemba un sha awambe a Waniyôngo man shi sha kwaghôron u shiada ve man uma ve kpaa doo ve ishima ga zan zan ar ken ku je.

¹²Nahan yô, ember nen ne Usha, man shi ne mba ne tem ker kpaa. Kpa kwagh á gema á tser tar man zegemnger gadia diabolo sen shin ven, ishima vihi un tsung gadia a fa er shighe na a kera vese ga yô.

¹³Zum u darakon la nenge er i gbihi un shin tar yô, a zenda kwase u a mar wannomso la.

¹⁴Kpa i na kwase la akper a zegegafa er a̱ purugh a̱ kar sha ishigh ki iyô la kera a̱ yem ken ikôngo hen ijiir na ape á koso un á kuma shighe man ashighe man veghershighe.

¹⁵Tsô iyô la suwa mngerem ma ken zwa u i ken ijime i kwase la er ka ifi nahan sha u ia er ma kuwa a na kera yô.

¹⁶Kpa tar gema wase kwase la, tar aver zwa u u, mena ifi u darakon suwa ken zwa na kera la.

¹⁷Nahan ishima vihi darakon a kwase la, a yem sha u za nôngon ityav a tsombor na u u shi her u kor atindi a Aôndo shi u lu eren shiada sha kwagh u Yesu kpaa yô.

¹⁸Nahan darakon tile hen kpezegemnger.