Read tiv Mpase U Yohane 14 Bible Online

Mpase U Yohane 14 - tiv bible

Mpase U Yohane 14

¹M shi m ver ashe, tsô nenge Waniyôngo tile sha uwo u Shion. Ior lu a Na imôngo ve kuma dubu deri man akunduahar kar unyiin, i nger iti Na man shi iti i Ter Na sha atsul a ve.

²Tsô m ungwa imo due Sha lu er ihuran i mngerem ma vesen nahan, shi lu er kume u idyuran i baveraa nahan. Imo i m ungwa la lu er mbakuhwan adiguve mba kuhwan mbaadiguve vev nahan.

³Ve lu wan icam i he sha ishigh ki ikônough ki torough kila man sha ishigh ki akaauma a anyiin la man mbatamen kpaa. Ma orgen fatyô u rumun icam la ga, saa di mba dubu deri man akunduahar kar unyiin mbala mba i paa ve shin tar la tseegh.

⁴Mban ka mba ve hôngor ayol a ve sha ukase ga la, mba wang er ka anuunaukase nahan. Ka ve ve lu dondon Waniyôngo hen ape A ze cii ye, ka mba i paa ve ken ior, ve lu iyiagh ki tsutswagh sha ci u Aôndo man sha ci u Waniyôngo kpaa ye.

⁵Ken zwa ve kpaa i zua a aie ga; mba a acôghol iyol ga.

⁶M shi m nenge ortyom u Sha ugen lu purugh sha kwavaôndo lu a Icôronloho u Dedoo u yôôn hen mba ve tem shin tar cii, hen hanma ikurior man hanma nongo man hanma zwa man hanma nongoior.

⁷Lu kaan sha zegeimo er: Cia nen Aôndo, na nen Un icivir gadia shighe Na u ôron ijir kuma ve, civir nen Un u A er Sha man tar man zegemnger man amboramnger kpaa la.

⁸Ortyom u Sha ugen u sha uhar kpaa dondo, lu kaan er: A yôhôl ve, Zegebabilon u a er akuraior cii a me wain u asaren a na a ijimbagh la, yôhôl ve.

⁹Shi ortyom u Sha ugen u sha utar dondo sha a ve, lu kaan sha zegeimo er: Aluer anti or nana civir inyam man eev mbu i shi nana ngohol ikav sha icul shin sha uwegh ku nan yô,

¹⁰nan kpaa nana ma wain u iyugh i Aôndo u i nongo kwagh sha mi ga i hee ken iyongo i iyugh Na la. Á er nan ican sha usu man sha sulfur sha ishigh ki uicighanmbatyomov mba Shaav man sha ishigh ki Waniyôngo kpaa.

¹¹Mnyim ma ican ve la maa kôndon sha gbem sha won. Mba a mmem ga, tugh kpaa tetan kpaa; ka mba ve civir inyam man shi eev mbu i man shi anti or u nan ngohol ikav i iti i i je la.

¹²Ka heen man ishima i taver i uicighanmbaiorov i lu ye, ka ve mba ve we atindi a Aôndo iko man shi jighjigh u nan Yesu la kpaa.

¹³Shi m ungwa imo due Sha, kaa er: Nger wer: Hii hegen je zan zan mbakpenev mba ve kpe ken Ter yô, á saan ve iyol. Jijingi kaa er: Kape i lu je la, ka sha u vea mem ityom ve gadia aeren a ve nga zan a ve ityô.

¹⁴M shi m ver ashe, nenge, ibeenegh ki pupuu lu, or tema sha mi lu inja er wan u or nahan, lu a tsar u zenaria sha ityou shi lu a louji u esen tsor tsor sha uwe.

¹⁵Ortyom u Sha ugen due ken tempel, yila u a tema sha ibeen la sha zegeimo er: Naregh louji wou, sunda, gadia shighe u sunda kuma ve, sunda u shin tar kpaa via tsembelee.

¹⁶Tsô un u a tema sha ibeen la vishigh louji na shin tar, maa i sunda tar je.

¹⁷Shi ortyom u Sha ugen due ken tempel u a lu Sha. Un kpaa, lu a louji u esen tsor tsor.

¹⁸Ortyom u Sha ugen kpaa shi due ken atse a nanden nagh sha mi la; ka u a lu a tahav sha usu je la. A ôr kwagh sha zegeimo a u a lu a louji u esen tsor tsor la, a kaa er, naregh louji wou u esen tsor tsor la sunda asume a wain u shin tar gadia asume a na via ve.

¹⁹Tsô ortyom u Sha la vishigh louji na shin tar, a sunda wain u shin tar, a haa shin zegeihungwa u shoghol wain u iyugh i Aôndo la.

²⁰Nahan i shoghol wain shin ihungwa i shoghol wain la, ken won gar. Awambe due shin ihungwa la zan zan ar sha ulagema mba anyinyav, zan zan mail deri uhar je.