Read tiv Mpase U Yohane 17 Bible Online

Mpase U Yohane 17 - tiv bible

Mpase U Yohane 17

¹Nahan u môm ken mbatyomov mba Shaav mba utaankaruhar mba ve lu a agbande la va va ôr kwagh a mo, kaa er: Va heen, m̱ tese u ijirôron i zegeidyakwase u a tem sha mngerem ma kpishim la.

²Ka un man utor mba shin tar ve er idya a na, mba ve tem shin tar kpaa ve hunde wain u idya na la.

³Nahan a kua a mo ken Jijingi a yem a mo ken taaikôngo. Tsô m nenge a kwase tema sha inyam i nyian bong, i lu a ati a uityuhwan iyol wue wue, lu a ityouv itiankarihiar man akor pue.

⁴Kwase la yô, haa akondo a nyian dindee man a nyian bong iyol, lu a zenaria iyol wue wue man shi awen a injaa man utagbede kpaa, lu a iyongo i zenaria ken uwegh nagh, iv a akaa a ndôhôr ishima man akaa a hôngorough a idya na la.

⁵Sha icul na yô, i nger iti sha mi lu kwaghmyer je. I nger er: ZEGEBABILON, NGÔ U UDYAMBAKASEV MAN SHI AKAA A NDÔHÔR ISHIMA A SHIN TAR KPAA.

⁶M shi m nenge kwase la lu hunden sha awambe a uicighanmbaiorov man shi sha awambe a mbashiada mba Yesu kpaa. M nenge a na nahan kpiligh mo iyol je gande.

⁷Tsô ortyom u Sha la kaa a mo er: Ka nyi kwagh ne a kpiligh we iyol nahana? Me pase u kwaghmyer u kwase ne man shi inyam i a hende, i lu a ityouv itiankarihiar man akor pue la.

⁸Inyam i u nenge a mi la ngise lu kpa hegen kera ngi ga, ngi sôôn u duen shin ihungwa i i ze kweng la karen zan ken mtim. Mba ve tem shin tar, mba hii sha igbetar la je i nger ati a ve ken ruamabera u uma ga la, á kpiligh ve iyol a inyam la er ngise i lu kpa hegen i kera lu ga, kpa shi ia va lu la.

⁹Ka sha kwagh ne man mkav u lun a mfe la a lu ye. Ityouv itiankarihiar la ka iwo itiankarihiar i kwase la a tem sha mi je la. Shi ka utor utaankaruhar kpaa.

¹⁰Ken ve yô, mba utaan ve gba, u môm ngu her, ugen la yô, ngu a va ga. Zum u una va yô, una tema keng kpa á lu anshighe kpeghee tsô.

¹¹Sha kwagh u inyam i ngise i lu kpa hegen i lu ga la yô, ka i je i lu i sha anigheni ye, kpa ngi ken mba utaankaruhar la, shi ngi zan ken mtim.

¹²Akor pue a u nenge a mi la yô, ka utor pue je la. Mba a ngohol tahav mbu tor ga, kpa vea ngohol tahav er utor nahan a inyam la imôngo á kuma ihwa i môm.

¹³Mban yô, ishima ve ngi môm, mba geman agee ve man tahav vev nan inyam la.

¹⁴Vea nôngo ityav a Waniyôngo kpa Waniyôngo Una hemba ve kua mba ve lu a Na imôngo la, ka mba i yer ve, i tsough ve, ve lu jighjigh la, gadia Un ka Ter u uter man Tor u utor kpaa.

¹⁵Shi a kaa a mo er: Mngerem ma u nenge a mi ma idyakwase a tem sha mi la yô, ka iniongo i ior man akumaior man akuraior man ijô.

¹⁶Man shi akor pue a u nenge a mi la kua inyam yô, vea kôr idyakwase la ihom, vea ngohol un akaa, una hingir aveve una hungwa idyelegh, vea ya inyam na vea nande un sha usu.

¹⁷Gadia Aôndo na ve ken asema a ve sha u ve̱ er sha awashima Na, ve̱ er a ishima i môm je, ve̱ gema tor ve, ve̱ na inyam la zan zan akaaôron a Aôndo aa kure vough yô.

¹⁸Kwase u u nenge a mi la yô, ka zegegar u a lu a tahav sha utor mba shin tar yô.