Read tiv Mpase U Yohane 22 Bible Online

Mpase U Yohane 22 - tiv bible

Mpase U Yohane 22

¹Tsô a tesem ifi u mngerem ma umam, lu wang er krusetalu nahan, lu duen ken ikônough ki torough ki Aôndo man ki waniyôngo la.

²Ken atô u gbenda u ken gar la man shi ifi yande ne kua yande la kpaa kon u uma lu umen atam kwa pue kar uhar, hanma uwer u umen atam. Ika i kon la kpaa lu sha u been akuraior angev.

³Ma kwagh u i we un ifan una kera lu ga, kpa ikônough ki torough ki Aôndo man ki Waniyôngo kia lu ker, mbatomov Nav vea civir Un.

⁴Vea nenge a ishigh Nagh, iti Na kpaa ia lu sha atsul a ve.

⁵Tugh mbua kera ile ga, kwagh una kera gba ve a iwanger i imenger shin iyange kpaa ga, gadia Ter Aôndo Una ta iwanger sha a ve, vea tema tor gbem sha won.

⁶A shi A kaa a mo er: Akaaôron angan ka a jighjigh, ka a mimi kpaa. Ter Aôndo u ujijingi mba uprofeti tindi ortyom Na sha u a̱ va tese mbatomov Nav akaa a aa er fefa keng la.

⁷Nenge, M ngu van fefa. Or u nan we akaaôron a profeti a ken ruamabera ne iko yô, saan nan iyol.

⁸Mo Yohane ne, ka mo m ongo shi m nenge akaa ne kpaa ye. Zum u m ungwa shi m nenge a yô, m gba inya m cir ishigh inya hen angahar a ortyom u Sha u a lu tesen mo akaa ne.

⁹Kpa a kaa a mo er: De eren nahan ga. M ngu ortom a we imôngo kua anmgbianev ou kpaa, ka uprofeti je la, man shi mbala mba ve we akaaôron a ken takerada ne iko yô. Civir Aôndo.

¹⁰Shi a kaa a mo er: De cirin akaaôron a profeti a ken ruamabera veren ikav sha mi ga, gadia shighe mgbôghom.

¹¹Or u eren ifer yô, nana̱ seer a seer eren ifer, or u nan we ibinga yô, nana̱ seer ibinga, or u perapera yô, nana̱ seer a seer eren perapera, u nan lu icighanor yô, nana̱ seer a seer lun icighanor.

¹²Nenge, M ngu van fefa, injar Yam kpaa ngi a Mo, sha u Me na hanma or er tom u nan u lu yô.

¹³M ngu Alefa man Omega, u hiihii man u masetyô, mhii man mkur kpaa.

¹⁴Mba ve ee akondo sha u vea lu a ian sha kon u uma man shi u nyôron ken ihinda i gar la yô, saan ve iyol.

¹⁵Ken won yô, ka iwa man mbaahiriv man mbadyarev man mbawuanior man mbacivirakombo man mba aie a doo ve ishima shi ve eren un kpaa la.

¹⁶Mo Yesu, M tindi ortyom Wam sha u a̱ er ne shiada sha akaa ne ken iniongo i Kristu. Mo M ngu mise man tsombor u Davidi man shi Ishan i sha use i engem la.

¹⁷Jijingi man kwasehe mba kaan er: Va! Or u nan lu ungwan kpaa nana̱ kaa er: Va! Or u imura i ker nan yô, nana̱ va. Or u i sar nan kpaa, nana̱ va, nana̱ va ngohol mngerem ma umam gbilin.

¹⁸Hanma or u nan ongo kwaghôron u profeti u ken ruamabera ne yô, m ngu eren nan shiada je mer: Aluer or nana seer kwagh sha mi yô, Aôndo Una seer nan atsan a i nger a ken ruamabera ne.

¹⁹Aluer or nana pande kwagh ken ruamabera u profeti ne kera yô, Aôndo Una pande kwar u nan u sha kon u uma la kera man shi sha icighangar kpaa er i nger kwagh ve ken ruamabera ne nahan.

²⁰Un u A er shiada sha akaa ne ngu kaan er: Een, M ngu van fefa. Amen, va, Ter Yesu.

²¹Mrumun u sha mhôôn u Ter Yesu a̱ lu sha a ven cii.