Read tiv Mpase U Yohane 5 Bible Online

Mpase U Yohane 5 - tiv bible

Mpase U Yohane 5

¹Man ken uwegh ku yanegh ku Un u A tem sha ikônough ki torough la m nenge a ihurenruamabera, i nger un kimi kua ken ijime kpaa i cir un i var un akav ataankarahar.

²Tsô m nenge ortyom u Sha u ageegh lu yôôn sha zegeimo er: Ka an nan kom u bughun ruamabera ne saghen akav a na?

³Kpa ma or môm u Sha shin u shin tar shin u shin atô u taregh kpaa fatyô u bughun ruamabera ne shin u nengen ker kpaa ga.

⁴Nahan m vaa mimi, gadia i zua a ma or u nan kom u bughun ruamabera ne shin u nengen ker kpaa ga.

⁵Kpa or môm u ken mbatamen la kaa a mo er: De vaan ga. Nenge, Begha u ken kwe u Yuda, Mise u Davidi la, A hemba; nahan Una bugh ruamabera ne kua akav a na a ataankarahar la kpaa.

⁶M nenge ken atô u ikônough ki torough man hen atô u akaauma a anyiin la, man ken atô u mbatamen la, Waniyôngo tile, lu er i sôngo Un nahan, lu a akor ataankarahar man ashe kpaa ataankarahar, ka ujijingi mba utaankaruhar mba Aôndo mba i tindin ve shin tar cii la.

⁷A va A va ngohol ruamabera la ken uwegh ku yanegh ku Un u A tem sha ikônough ki torough la.

⁸Ngohol ruamabera la yô, akaauma a anyiin la man mbatamen mba ikundu kar unyiin mbala gba inya sha ishigh ki Waniyôngo, ve lu a mbaadiguve sha ave ser ser kua agbande a zenaria kpaa iv a kwaghhumandoon, ka mbamsen mba uicighanmbaiorov je la.

⁹Ve wa icam i he ve kaa er: We, U kuma u ngohol ruamabera la, bughun akav a na, gadia i sôngo U man U yam Aôndo ior sha awambe a Ou ken hanma nongo man hanma zwa man hanma nongoior man hanma ikurior,

¹⁰U er ve, ve hingir tartor man upristi sha ci u Aôndo wase, vea tema tor sha tar.

¹¹Tsô m nenge, nahan m ungwa imo i mbatyomov mba Shaav kpishi ve kase ikônough ki torough kila man akaauma la man mbatamen mbala. Iyenge ve lu dubu pue kwa dubu pue man udubu kwa dubu;

¹²ve lu kaan sha imo i taver er: Waniyôngo u i senge Un la kuma u ngohol agee man akaa a ngeen wuee man kwaghfan man mtaver man icivir man iengem man iwuese.

¹³Shi m ungwa akaa a i gbe a cii, a Sha man a shin tar man a shin atô u taregh man a shin zegemnger kpaa lu kaan er: Un u A tem sha ikônough ki torough la man Waniyôngo kpaa, ve̱ lu a iwuese man icivir man iengem man tahav gbem sha won.

¹⁴Akaauma a anyiin la kaa er: Amen; mbatamen kpaa gba inya civir.