Read tiv Mpase U Yohane 8 Bible Online

Mpase U Yohane 8 - tiv bible

Mpase U Yohane 8

¹Zum u A bugh ikav i sha utaankaruhar la yô, huan Sha ving, kuma er a lu vegherihwa nahan.

²Tsô m nenge mbatyomov mba Shaav mba utaankaruhar mba ve til sha ishigh ki Aôndo la, i na ve ikor i tôngon itiankarihiar.

³Ortyom u Sha ugen va tile hen atse a nanden nagh sha mi la, lu a gbande u zenaria. I na un kwaghhumandoon ngee er a̱ nungwa sha mbamsen mba uicighanmbaiorov cii, sha atse a zenaria a a lu sha ishigh ki ikônough ki torough la.

⁴Tsô mnyim ma kwaghhumandoon la kôndo a mbamsen mba uicighanmbaiorov imôngo ken uwegh ku ortyom u Sha u a lu sha ishigh ki Aôndo la.

⁵Tsô ortyom u Sha la tôô gbande la, a iv un a usu u sha atse la, haa shin tar. Tsô idyuran gba kua imo man inyiar man tar kpaa tenger.

⁶Nahan mbatyomov mba utaankaruhar mba ve lu a ikor i tôngon la wa iyol u tôngon.

⁷Tsô u hiihii la tôngo nahan awombo man usu haa shin tar i nungwa awambe sha mi, tsô tiôn môm u taregh u ken atôôn atar, hia kera, ikon kpaa, tiôn môm u ken atôôn atar hia kera, toho u ndor cii kpaa hia kera.

⁸Tsô ortyom u Sha, u sha uhar kpaa tôngo nahan i kende kwagh shin zegemnger lu er ka zegewo u hian nahan,

⁹tiôn môm u ken atôôn atar a zegemnger hingir awambe, maa tiôn môm u ken atôôn atar a akaauma a shin zegemnger kpe man shi tiôn môm u ken atôôn atar a utso kpaa vihi.

¹⁰Ortyom u Sha u sha utar kpaa tôngo tsô zegeshan osough Sha gba, lu yeghen er ka ikaghusu nahan. A gba sha tiôn môm u ken atôôn atar a uifi man amboramnger kpaa.

¹¹Iti i ishan la yô, er Kon u yuan, tsô tiôn môm u ken atôôn atar a mngerem kpaa gema yua er kon u yuan la nahan. Ior kpishi kpe sha mngerem mara sha ci u ma you yô.

¹²Ortyom u Sha u sha unyiin la kpaa tôngo tsô i vihi tiôn môm u ken atôôn atar a iyange, man shi tiôn môm u ken atôôn atar a a uweregh man shi tiôn môm u ken atôôn atar a asan kpaa, nahan tiôn môm u ken atôôn atar iwanger ve la gema wa ime, tiôn môm u ken atôôn atar a sev kera wanger ga, tugh kpaa nahan.

¹³Tsô m nenge, m ungwa gafa lu purugh sha kwavaôndo je, lu kaan sha zegeimo er: Kwagh á tser, kwagh á tser, kwagh á tser mba ve tem shin tar cii sha ci u mtenge u ikor i i shi her i mbatyomov mba Shaav mba utar mba ve sôôn u tôngon la.