Read tiv Rutu 1 Bible Online

Rutu 1 - tiv bible

Rutu 1

¹Tsô sha ayange a mbajiriv lu sôron tar la, ijen gba hen tar la. Nahan or u Betelehem u ken Yuda la yem shir ken tar u Moabi, un vea kwase na man ônov nav mba nomso uhar.

²Iti i or la er Elimeleki man iti i kwase na er Naomi, man ati a ônov nav mba nomso mba uhar mbala yô, er, Malon man Kilion; ve lu ior i Eferata ken Betelehem u ken Yuda la. Ve va ken tar u Moabi, ve va tema ker.

³Tsô Elimeleki nom u Naomi la kpe undu un a ônov nav mba nomso mba uhar mbala.

⁴Nahan ve er kasev ken Mbamoabi; iti i u môm er Orpa, iti i ugen la er Rutu; ve tema her er anyom pue nahan.

⁵Tsô Malon man Kilion, ve uhar cii, ve kpe; nahan mase shin kwase la; ônov nav mba uhar kua nom na kera lu ga.

⁶Tsô a mough a kasev mba ônov nav mbala er una due ken tar u Moabi una hide; gadia a ungwa ken tar u Moabi er TER va sôr ior Nav, A na ve kwaghyan.

⁷Tsô a mough hen ijiir i a lu la, a kasev mba ônov nav mba uhar mbala a na imôngo; ve kôr gbenda u hiden ken tar u Yuda.

⁸Nahan Naomi kaa a kasev mba ônov nav mba uhar mbala er: Yô, gba yemen nen tsô, hanmô wen nana̱ hide hen ya u ngô u nan; TER A̱ er a ven doo doo er lu ne er a mba ve kpe la doo doo kua mo kpaa nahan.

⁹TER A̱ na ne mmem, hanmô wen hen ya u nom u nan. Tsô a suse ve zwa, maa ve gba vaan genger genger.

¹⁰Ve kaa a na er: Ei, sé yem a we imôngo hen ior ou.

¹¹Kpa Naomi kaa er: Hide nen tsô, ônov av; ka nyi man né za a mo imôngo? M shi m ngu a ônov mbagenev mba vea lu noov enevee?

¹²Hide nen, ônov av, gba yemen nen tsô; gadia m bee iyol m gande nom; shin aluer me kaa mer, m ngu veren ishima her, ma m zough a nom tugh mbun je, ma m mar ônov,

¹³nahan kpaa, ma ne kegh zan zan ma ve vese he? Kwagh ne una er, ne gba lun a noov ga tsô? Ei, ônov av, ishima i vihin yam hemba i yen, gadia uwegh ku TER ku ihom a mo.

¹⁴Nahan shi ve vaa genger genger; tsô Orpa suse ngô u nom na zwa, kpa Rutu yô, var a na.

¹⁵Nahan a kaa er: Nenge, anngôu hide hen ityô na kua hen aôndo na kpaa; yô, we kpaa hide a anngôu imôngo.

¹⁶Kpa Rutu kaa er: De zem iyol wer, m̱ de u zan a we, m̱ undu u, m̱ hide ga; gadia henpe ú za cii, mo kpaa me za; henpe ú za tsa la, ka her mo kpaa me tsa ye; ior ou ka ior av; Aôndo wou kpaa ka Aôndo wam;

¹⁷ijiir i ú kpe her la, ka her mo kpaa me kpe, á iim her ye; TER A̱ er a mo nahan, i̱ hemba nahan kpaa, ka ku tseegh ua pavem a we ye.

¹⁸Tsô er a kav er a we ishima u yemen a na imôngo keng yô, a de u ôron kwagh la a na.

¹⁹Tsô ve uhar ve gba yemen zan zan ve za ar hen Betelehem. Zum u ve ar her Betelehem yô, gar cii hingir gbugh gbu gbugh sha ci ve; kasev gba pinen er: Ka Naomi je ne?

²⁰A kaa a ve er: De kera yerem nen ner, Naomi ga, yilam nen ner, Mara; gadia Uhembanagee cii, erem kwagh u vihin yum.

²¹Iyange m mough hen ijiir ne, m lu ave kiva kiva, kpa TER hide a mo aveve; man ka nyi ne yerem ner Naomi, er TER A pase er Un vendem, man Uhembanagee cii A erem icanaa?

²²Kape Naomi hide vea Rutu kwase u wan na, wan u Moabi, u a due a na imôngo ken tar u Moabi la; ve ar hen Betelehem sha shighe u sundan shair.