Read tiv Rutu 3 Bible Online

Rutu 3 - tiv bible

Rutu 3

¹Tsô Naomi ngô u nom na, kaa a na er: Wan wam; yô, me ker u ijiir i memen er á kpe u iyol yô, gaa?

²Boashi u u lu a ônkasev mba shiren un imôngo la, kera ka anmgbian wase gaa? Nenge, ngu tan shair nyian tugh hen ijiir i gbiren iyiav.

³Yô, ôô iyol, shighe mkurem, haa akondo iyol, za hen vande u gbiren iyiav; kpa de pasen iyol you hen or la ga, saa shighe u una ya kwagh man una ma kwagh kera ve.

⁴Tsô shighe u una za yav yô, ver ishima fa ijiir i una yav la; yô, za za bugh un ikondo sha angahar kera, yav; tsô una kaa u kwagh u ú er yô.

⁵Nahan a kaa a na er: Kwagh u u kaa cii, me er.

⁶Tsô a za hen vande u gbiren iyiav, a za er er ngô u nom na ôr un nahan cii.

⁷Zum u Boashi ya kwagh man ma kwagh, ishima lu un saan saan yô, a za yav henpe i ta tihi u alakema yô; tsô a za va teghelee a va bugh un ikondo sha angahar kera, a yav her.

⁸Tsô ka kom ateghôtôutu yô, a cia sulugha; gem yô, a kav kwase yav un shin angahar.

⁹Nahan a pine er: Ka ana? A gema a kaa er: Ka mo Rutu wanyekwase wou; cir wanyekwase wou ikondo you, gadia we u ngu orpaan.

¹⁰A kaa er: I̱ ver u doo doo wan wam; ier i dedoo i masetyô i u er ne, hemba i tsuaa la, sha er u ver ishima sha ikaior ga yô, shin vea lu mbaatsanev shin mbanyarev kpaa.

¹¹Hegen yô, wan wam, de cie ga, hanma kwagh u u kaa, me er u; gadia hundagar u ior av cii fa er u lu kwase u injaa yô.

¹²Mimi je, mo m ngu orpaan; nahan kpaa, orpaan ugen u a hembe lun ikua ikua a mo ngu.

¹³Tsa nyian tsô; sev a av yô, aluer una soo u paan we yô, doo, a̱ gba paan tsô, kpa aluer una soo u paan we ga yô, mo me paa u mimi, er TER A lu u uma ne; gba yaven tsô, sev mbu̱ av ve.

¹⁴A yav hen angahar a na zan zan sha use; tsô a mough sha shighe u a kav or sha ishi ga yô; gadia a kaa er: I̱ de fe er kwase la a ve hen vande u gbiren iyiav ga.

¹⁵Man a shi a kaa er: Va a ikondo i u hambe sha avande la, samber i; tsô a samber i; nahan a kar shair uikaren ataratar a haa un sha mi, tsô a yem ken gar.

¹⁶Ve hen ngô u nom na yô, a pine un er: Kwagh la za er nana wan wam? Tsô a ôr un kwagh u or la a er a na cii.

¹⁷Shi a kaa er: Nenge, a nam shair ne uikaren ataratar, gadia a kaa er: De yemen hen ngô u nomu aveve ga.

¹⁸Nahan a kaa a na er: Gba teman ving tsô, wan wam, tsô ú nenge er kwagh la una za yô; gadia or la una mem ga, saa una kure kwagh ne nyian keng.