Read Tlachichilco Tepehua San Mateo 14 Bible Online

San Mateo 14 - Tlachichilco Tepehua bible

San Mateo 14

¹Ex chuncha yu xagobernador ni Galilea, yu ixjunkan Herodes, ni yucha vachu kꞌatsal yu ixtꞌajun makan ni Jesús.

²Ex yucha va lakjunil yu ixtaꞌaqtayjuy: —Ka va Juan yu jamaqchajꞌavanaꞌ ni kujchoqota. Ka xlhiyucha lhitꞌajun tapꞌasta para kamakal yu lajꞌay axtoqnuꞌ.

³Va yucha ni Herodes yu ixmalaqachananta ixlakachꞌimaka ni Juan, ex va maqanul lakapachꞌin. Va chuncha makal va por ixanati yu Herodías junkan, yu ixanati ixjunita ixlaqaj Felipe.

⁴Yu Juan va ixjunita: —Jantu lay kꞌamakꞌatꞌi mixanati yu ixanati milaqaj.

⁵Ex va chuncha ni Herodes ayaj ixmaqniputun ni Juan, pero va ixlaktalhauniy ni lapanakni. Yuꞌuncha ox ixtalhakapuꞌan ni Juan va ixlaqputeꞌey ixchivinti Dios.

⁶Pero tejkan lakachil ixkꞌatan ni Herodes, ex yu istsiꞌi ni Herodías va aqtaynil jatꞌinin la ixtalakaꞌukxpukꞌan yu ixlakjuntaꞌikanta. Ex ayaj maqamal ni Herodes.

⁷Chuncha yucha va junil ni laqsaval kaxtaqniyaꞌ va tuꞌuchun yu kaskꞌinilcha.

⁸Va chuncha ixnati va chivijval yu jatsiꞌi. Ex yucha va junil ni Herodes: —Va knajun kꞌixtꞌaqnin ixꞌaqtsul ni Juan yu jamaqchajꞌavanaꞌ kun laqataun ay plato.

⁹Ex ni ay jalhachimoꞌonu Herodes va maqaninil, pero va por ixjunitacha la ixtalakaꞌukxpukꞌan ni ixlakjuntaꞌita, ex mas jantu kaꞌuyujnaul, va lhinaul kaxtaqnikal.

¹⁰Va malaqachanalcha ixchaqxpꞌuxnika ixꞌaqtsul ni Juan taꞌan ixtanun lakapachꞌin.

¹¹Chuncha talhiminil ixꞌaqtsul laqa ay plato ni jatsiꞌi, ex yu jatsiꞌi va maqxtaqnilcha ni ixnati.

¹²Ex tachinchal yu ixtꞌaltanan ni Juan, va talhaꞌalcha maknunun ixlakatunaj. Ex astan va taꞌal mapastakꞌanin ni Jesús. Ni Jesús jalakvaval laqakis mil joꞌakna

¹³Ex tejkan qasmaklhi ni Jesús yu tapasalcha, va taxtulcha taꞌan ixvil, va ixꞌaman al, tajul laqataun barco va puꞌal lakamar, va chaꞌal lakatꞌun taꞌan jantu alin lapanakni. Pero tejkan chuncha takꞌatsal ni lapanakni ex tataxtul ni putaulanin y tatixkaulhaꞌal pero yuꞌuncha va lakatꞌun tapuꞌal.

¹⁴Tejkan patajul laka barco ni Jesús va jalaqtsꞌil lhuvaj lapanakni. Ex ni yucha va ayaj lakmapaynil, y va jalajkꞌuchꞌul tachun yu taqanꞌanin.

¹⁵Taval va putsꞌisputuncha. Ex yu ixtꞌaltanan tatalakanunil, va tajunil: —Ayaj toqoxalcha y aniy va xꞌaman ni lakatꞌun, jantu tꞌujuꞌ jataulanti. Kalakmakꞌaucha ni lapanakni para kataꞌalcha lakxkaunan ixvaytikꞌan taꞌan alin jataulanti.

¹⁶Ni Jesús va lakjunil: —Jantu maqskꞌiniy kataꞌal lakxkaunan. Ni uxiknan kꞌalakvavatꞌikcha.

¹⁷Ex ni yuꞌuncha va tanaul: —Pero jantu lhuu kaklhimiu ni vayti. Va ikmaqalinau aniy va aqskis pan kun aqxtꞌuy jatanti.

¹⁸Ex ni Jesús va naul: —Kilalhiminiu aniy.

¹⁹Ex va lakjunil ni lapanakni para katataulal ni laka jatsꞌinan. Ex chuncha va chꞌapalcha la ixmakaꞌ ni anchanu aqskis pan kun aqxtꞌuy jatanti, ex va talaqstꞌal laktꞌiyan, va xtaqnil lhimalaqpuchuncha ni Dios. Ex va laqcheꞌelcha ni pan, va jalaqxtaqnilcha ixtꞌaltanan. Ex yuꞌuncha va taꞌaqtaynilcha talaqmapitsiniy ni lapanakni.

²⁰Ex tus tachun ox tavayl y tus ox taꞌotsaꞌol. Vananaj tamaꞌaqtsamachoqol laqakautꞌuy canastas yu xatalaqcheꞌeniꞌ yu xajchal.

²¹Yu tavayl va laqakis mil joꞌakna y tumpaj yu xanatin kun jasꞌatꞌan. Ni Jesús iltananta la ixꞌukxni ni lakxkan

²²Ex va chuncha ni Jesús va niman lakjunil ixtꞌaltanan para katatajuchoqolcha ni laka barco. Pꞌunaj kataminchoqochalcha apaꞌextaun lakxkan. Yu Jesús vananaj tamakaul jalakmastakꞌanaꞌ ni lapanakni.

²³Tejkan lakmastakꞌaꞌolcha ex ni Jesús va al skꞌiniꞌ Dios ixꞌaman lakataun aspajun. Taval tejkan putsꞌislhicha ex ni yucha va ancha ixꞌaman ixꞌalinta.

²⁴Ex va chuncha ni barco va la maqati anta, va laycha ixpakltaun lakamar. Va ixꞌunilata la ixꞌukxpulakapu ni barco, yu xkan ixtantꞌaqstꞌay y vachu ixqalnaqlhaꞌanta ni barco.

²⁵Ex va chuncha tejkan tunkumintacha, ni Jesús va ltanajꞌal la ixꞌukxni lakamar, va taꞌan ixtapuꞌanta yuꞌuncha.

²⁶Tejkan chuncha talaqtsꞌil yu ixtꞌaltanan ni Jesús va ltanajꞌanta ni yucha la ixꞌukxni lakamar, tus pꞌas talaktꞌasal kun ixtalhantikꞌan: —¡Va qayntaun maqtsꞌisvanaꞌ!

²⁷Pero ni Jesús jalakkilꞌanil, va jalakjunil: —¡Kaꞌayajnantꞌik! Jantu maqskꞌiniy katꞌalhanantꞌik, va kitꞌin.

²⁸Ex yu Pedro va naul: —Jalhachimoꞌonuꞌ, incha laqsaval va uxintꞌi, ex kꞌiꞌun para kakltanajꞌanchal la ixꞌukxni ni lakxkan.

²⁹Ex naul ni Jesús: —Kꞌatꞌatꞌicha. Ex ni Pedro va takuklhicha laka barco, va ltanajꞌalcha ni lakxkan taꞌan ixpuminta ni Jesús.

³⁰Yu un va la pꞌasnicha talakanuniy, ex ni Pedro va talhanalcha, ex va aqtaylcha talaqtsꞌanqay, va tus sqau tꞌasal, va naul: —¡Jalhachimoꞌonu, kꞌiꞌaqtꞌayꞌutꞌi!

³¹Ni Jesús va tsꞌalaj maqchꞌapachoqol, va junil: —Ayaj lakatsꞌuniy milhakapuꞌati. ¿Valiꞌiycha jantu kꞌalhakꞌapꞌupꞌi?

³²Tejkan tataukꞌachoqolcha laka barco ni Jesús kun Pedro, ex yu un va vak junchoqolcha.

³³Ex yu ixtatꞌajumanal laka barco va tataꞌaqtsoqoqtanil ni Jesús, va tajunil: —Laqsaval ni uxintꞌi va Sasꞌatꞌa kꞌatꞌi ni Dios. Ni Jesús lajkꞌuchꞌul ni taqanꞌanin xalakatꞌun Genesaret

³⁴Va chuncha va tapatakuklhi ni lakamar, ex tachaꞌal xalakatꞌun Genesaret.

³⁵Yu xalapanakni ni anchanu putaulan va tamispalcha ni Jesús, ex tus tamapastakꞌanininꞌol talakachux xaputaulanin ni anchanu jalakatꞌun. Ex ni yuꞌuncha va talhiminil tachun ixtaqanꞌaninkꞌan.

³⁶Ixtatapayniniy ni Jesús para lay katachꞌapanil vamun ixpiktuꞌ ni ixlaqchꞌiti. Ex tachun yu tachꞌapanil va si taꞌayajnanꞌochoqol.