Read Tlachichilco Tepehua San Marcos 15 Bible Online

San Marcos 15 - Tlachichilco Tepehua bible

San Marcos 15

¹Ex tejkan tunkulcha va tataqxtoqlhi yu xaꞌukxtinin ni kuras, ali yu xalajꞌaynin ali yu ixtamasuy ixlhachimoꞌonkꞌan ni israelitas kun yu ixtalhichimoꞌoy ixputsukkꞌan. Tachꞌilhaꞌalcha ni Jesús, tamaqxtaqnilcha ni Pilato.

²Ex chuncha ni Pilato va junil ni Jesús: —¿Uxintꞌi ni xalhachimoꞌonuꞌ kꞌatꞌi ni israelitas? Ex yu Jesús va naul: —Chun, va tacha uxintꞌi xanaꞌun.

³Ex yu xaꞌukxtinin kuras va pulhuu yu ixtaputislajmay ni Jesús.

⁴Yu Pilato va aaqtaun lhisakmichoqol, va junil: —¿Jantu tuꞌuchun kanauneꞌe? Va ayaj pulhuvaj tatꞌaunan tislajmanan.

⁵Pero ni Jesús va tus jantu kaqaltayanal. Ex chuncha ni Pilato tus vak kꞌatsal. Yu Pilato maqxtaqlhicha para kamaqnikalcha ni Jesús

⁶Taun taun jachꞌitin tejkan xakꞌatan Paxku yu Pilato ixtamaxtuchoqoy qayntaun lapanaki laka pachꞌin, va yu ixtaskꞌin ni lapanakni para kamaxtuchoqol.

⁷Va ixtanun ni laka pachꞌin qayntaun joꞌati yu ixjunkan Barrabás. Chꞌantaun ixlaktꞌatanun kun alati yu tamakal lachꞌapati, va tamaqninil.

⁸Ex va chuncha ni lapanakni talaqmil ni Pilato, va tajunil ni kamakachoqol yu tacha ixmakay.

⁹Ex chuncha ni Pilato va naul: —¿Ex ni uxiknankꞌan yu israelitas untꞌatꞌik naunatꞌik ni kakmakaunchoqolcha oxamaktaun mijalhachimoꞌonukꞌan?

¹⁰Ni Pilato ixkꞌatsay ni yu xaꞌukxtinin kuras va por akchaꞌati ixtamaqxtaqnita ni Jesús, xlhiyucha va chuncha naul.

¹¹Pero yu xaꞌukxtinin ni kuras va ayaj tamalukujlal ni lapanakni tus tatalakchꞌilil. Ex chuncha ni yuꞌuncha va taskꞌiniy para oxamaktaun kamakaunchoqokal yu Barrabás.

¹²Ex ni Pilato laklhisakmil ni lapanakni, va lakjunil: —¿Tisuncha naunatꞌik kakmakanil yu unatꞌik xaJalhachimoꞌonuꞌ ni israelitas?

¹³Ex ni lapanakni tanaulcha kun laktꞌasati: —¡Kꞌamakxtꞌukmukꞌacha laka kurus!

¹⁴Ex chuncha yu Pilato va naul: —¿Pero tisuncha laqtaqalcha makata? Ex yu lapanakni apalay pꞌas ixtalaktꞌasay, va tanaul: —¡Kamakxtukmukꞌakalcha!

¹⁵Ex yu Pilato para ox kalaktꞌaꞌal ni lapanakni va oxamaktauncha makaunchoqol ni Barrabás. Malaqachanal ixlaqanaqmaka ni Jesús, vachuꞌ lhinaul para kamakxtukmukꞌakal laka kurus.

¹⁶Ex ni tropas va talhaꞌalcha ni Jesús la xapuchꞌanan ixpulakchivin ni Pilato. Tus tachun ni tropas ancha tataqxtoqlhi.

¹⁷Ex va taꞌulanil aqxtaun laqchꞌiti yu pꞌas xlapul. Vachu tamaꞌaqtanul laqataun korona jamakanti kun jaltukun.

¹⁸Ex taval ni lapanakni va talaktuꞌul, taꞌaqtaylcha talaktꞌasay: —¡Katsukul ixlhachimoꞌonukꞌan ni israelitas!

¹⁹Ex chuncha va taꞌaqtaylcha talaqpanaꞌa kun kꞌiu la ixꞌaqtsul. Vachu talakapuchujval. Tamaꞌaqtsoqoqtal, tamakal va tacha katatoꞌoyal.

²⁰Tejkan talaktuꞌuꞌol ni Jesús, ex va tamaxtunichoqol ni laqchꞌiti yu ixtaꞌulanita yu ox xlapul. Taꞌulanichoqolcha ixlaqchꞌiti ni yucha, va tamaxtulcha ixlhimaqspaꞌ para kaxtukmukꞌakalcha laka kurus. Taxtukmukꞌal laka kurus ni Jesús

²¹Ex chuncha tejkan ixtaꞌanta ni lakatin va tapaxtoqlhi qayntaun joꞌati yu ixjunkan Simón yu machaqaꞌ Cirene, yu ixpay Alejandro ali Rufo. Chuncha tejkan ancha ixtꞌajun tapasanaꞌ, talhijunil ni kaꞌaqtayjulhaꞌal ixkurus ni Jesús.

²²Ex talhaꞌal ni Jesús lakataun taꞌan junkan Gólgota (va naunputun xajalukuti aqtsul).

²³Ex chuncha taxtaqnil lhiꞌotꞌati laqlhiyaunti kun mirra, pero yu Jesús jantu kaꞌoqlhi.

²⁴Ex va chuncha va taxtukmukꞌal laka kurus ni Jesús. Yu ixlaqchꞌiti va tamakal taun suerte ni tropas, taꞌayucha kapaxtoqnil ixlaqchꞌiti.

²⁵Tejkan taxtukmukꞌal ni Jesús va laqanajatsi puvakuj ixjunita.

²⁶Va tatsꞌoqmukꞌanil taun chivinti la ixꞌaqtsul ni ixkurus, va najun: “Ixjalhachimoꞌonukꞌan ni israelitas”. Va yucha talhimaqnil.

²⁷Va taxtukmukꞌal qayntꞌuy alhavanan kun Jesús. Qayntaun taxtukmukꞌal la ixlhijakanaj, yu aqayntaun taxtukmukꞌal la ixlhijamaqxu.

²⁸Ex chuncha va taqayntsalcha ni jatsꞌoqnuti yu najun: “Va mispakal tacha chꞌantaun kun yu talaktuꞌunun.”

²⁹Yu ancha ixtatapasay va laqxtoqnuꞌ chivinti ixtajuniy, ixtamalaklay ixꞌaqtsulkꞌan, va ixtajuniy: —¡Joj! ¡Uxintꞌi yu ixmaqtꞌatꞌi ni ay kilakatajtankꞌan y kun paqtꞌutu julchan ixmaꞌayauchꞌoꞌoꞌ!

³⁰¡Chavay kꞌalaqtꞌaxtꞌu meꞌeman, kapꞌatꞌaꞌutꞌi laka kurus!

³¹Vachu va chuncha yu xaꞌukxtinin kuras ali yu ixtamalaninin ixlhachimoꞌonkꞌan ixtalaktuꞌuy ni Jesús, va ixtalajuniy siya yuꞌuncha: —Ixmalaqtaxtuy yu alati pero jantu lay laqtaxtuy ixlaqꞌaman.

³²Incha laqsaval yucha ni Cristo, ni xajalhachimoꞌonuꞌ kintꞌunkꞌan Israel, ex kapatajul laka kurus chavay. Ex chuncha kalhakapuꞌanaucha. Ex chuncha mas yu ixlaktꞌaxtukmukꞌakanta, yuꞌuncha vachu ixtalaktuꞌuy. Nil ni Jesús

³³Ex chuncha tejkan atunkulcha, va talakachux ni lakatꞌun tus tꞌalaj putsꞌislhi, tus laꞌatꞌutu putoqoxata ixputsꞌista.

³⁴Ex chuncha laꞌatꞌutu putoqoxata, ni Jesús va pꞌays tꞌasal, va naul: —Eloi, Eloi, ¿lama sabactani? —va naunputun: KiDios kꞌatꞌi, kiDios kꞌatꞌi, ¿valiꞌiycha ni kꞌilakꞌamakꞌauntꞌacha?

³⁵Ex chuncha yu alati lapanakni yu ancha ixtayanal taqasmaklhi, va tanaul: —¡Kaꞌasmaktꞌik! Va tꞌasaꞌiniy ni Elías yu maqancha ixlaqputeꞌey ixchivinti Dios.

³⁶Ex chuncha xaqayntaun ni yuꞌuncha va takyauꞌal iniꞌ taun sponja, va aval kun xaxkan uva yu skajtacha. Akchꞌimukꞌal kun maqataun akltiyati. Ex va malakanunilcha ni Jesús para kamaꞌotꞌul. Va lakjunil yu alati: —Kꞌamakꞌaucha. Kalaqtsꞌinaucha incha kalaqminaꞌ ni Elías para kꞌapꞌuxlhi ni laka kurus.

³⁷Taval va sqau tꞌasal ni Jesús, va nilcha.

³⁸Ex chuncha va taꞌexpakltꞌiyul yu xaꞌay kortina ni ay lakatajtan, va taꞌexminchal xꞌakpuꞌ tus xtuntaun.

³⁹Ex yu xaꞌukxtin ni tropas, va ancha ixyal la ixlakaꞌukxpu ni Jesús. Tejkan laqtsꞌilcha ni nilcha, va naul: —Laqsaval ni anu joꞌati yucha ni Sasꞌatꞌa Dios ixjunita.

⁴⁰Vachuꞌ ancha ixtayanal lati xanatin va pumaqati ixtatꞌajun laqtsꞌinin. Ancha ixtaꞌalinta ni María Magdalena vachuꞌ ni María yu ixnatikꞌan ni José ali Santiago yu lakatꞌuniy. Vachuꞌ ancha yal ni Salomé.

⁴¹Ni anchanuꞌ xanatin ixtatꞌaꞌanta ni Jesús. Ixtaꞌaqtayjuy ni Jesús tejkan ixtavilananchal xalakatꞌun Galilea. Vachuꞌ pumalhuu alati xanatin tatꞌaꞌal ni Jesús laka putaulan Jerusalén. Tamaknul ni Jesús

⁴²Va chuncha ixtꞌajuncha putsꞌisniꞌ va laycha kachil ni xajulchan jastaknati.

⁴³Taval mil qayntaun joꞌati, ixjunkan José yu machaqaꞌ Arimatea. Yucha vachuꞌ va xaqayntaun ay lapanaki kun yu ixtamakay laqaꞌay junta. Ni yucha vachu ixpakxanꞌiy ni ixlhachimoꞌon ni Dios. Ex chuncha kun tachun ixjaꞌayajnati, va laqꞌal ni Pilato. Va skꞌinil ixlakatunaj ni Jesús.

⁴⁴Ni Pilato va jantu ixlhakapuꞌan incha kanilcha. Juntaꞌil ni kapitan va lhisakmil incha ixnitacha ni Jesús.

⁴⁵Chuncha pukꞌatsal ni Pilato va ixnitacha ni Jesús. Taval xtaqnil lakatin ni José para kalhaꞌal ixlakatunaj ni Jesús.

⁴⁶Ex chuncha ni José va il taun laqchꞌiti yu kꞌus yu la laqlhuu xtapal. Taval va pꞌuxlhicha ixlakatunaj ni Jesús laka kurus. Ex pupamililcha ni anchanuꞌ laqchꞌiti ni ixlakatunaj, va manulcha laka putaknun taꞌan tapuꞌajnil laktalpa. Ex milchaunil kun laqataun ay chiyux ni putaknun.

⁴⁷Ex chuncha yu María Magdalena kun María yu ixnati ni José, va talaqtsꞌil taꞌan maknunikal ixlakatunaj ni Jesús.