Read Tlachichilco Tepehua San Marcos 4 Bible Online

San Marcos 4 - Tlachichilco Tepehua bible

San Marcos 4

¹Taval ni Jesús aaqtaun aqtaychoqol jamalaninin la ixkilpaꞌ ni lakamar. Ayaj lhuvaj lapanakni tataqxtoqlhi ancha taꞌan ixvil. Ex yu Jesús va tajul laka barco yu ancha ixvil ni lakamar. Ex chuncha ni yucha va ancha taulalcha, ex yu lapanakni tus an tayanal la ixkilpaꞌ ni lakamar.

²Ni Jesús va pulhuvaj axtoqnuꞌ jalakmasuniy, lakjunil chivinti yu xtaꞌa jatapastakꞌati. Ex chuncha tejkan ixtꞌajun lakmalaninin, va lakjunil:

³—Yu chavay klajunau tus ox kaꞌasmaktꞌik. Qayntaun lapanaki va al maman ixtꞌin.

⁴Tejkan ixtꞌajun maman ixtꞌin, lati xatꞌin va tamachal lakatin. Ancha tachinchal ni tsꞌoꞌon, va taꞌuniꞌol.

⁵Yu alati xatꞌin va tamachal laka chiyuxin. Ancha va snipaqa mal yu tꞌun, xlhiyucha va niman pꞌunlhi.

⁶Jantu pulman kataknul istsꞌansiviti, xlhiyucha tejkan pꞌas maknaul ni julchan va lakxixꞌol, talaqxauꞌol.

⁷Alati xatꞌin tamachal laka jaltukunan. Ancha vachu pꞌunlhi pero chꞌantaun tꞌapꞌul ni jaltukun, va maqataanul, talakxixtanulcha yu xatꞌin. Ex chuncha ni anchanuꞌ xatꞌin jantu kaxtaqlhi xalhiꞌuti.

⁸Taval yu alati xatꞌin va tamachal taꞌan ayaj ox tꞌun. Ancha pꞌunlhi, ox aynlhi, va xtaqlhi taun ox jaxqanti. Ex chuncha por laqataun tꞌin xtaqlhi va treinta xataltsꞌi, yu ataun xtaqlhi va sesenta, vachu ataun xtaqlhi va tus taun ciento.

⁹Ex chuncha vachu naul: —Incha alin mimpaqasmakkꞌan, ex kaꞌasmaktꞌik. Ni Jesús najun valiꞌiycha jamasuniy chivinti yu xtaꞌa jatapastakꞌati

¹⁰Ex va chuncha, va xꞌamancha tamakaul ni Jesús ali yu pumakautꞌuy kun alati ixtꞌaltanan. Yuꞌuncha talhisakmil tisuncha naunputun ni anchanuꞌ chivinti yu xtaꞌa jatapastakꞌati.

¹¹Ex chuncha va lakjunil: —Ni uxiknankꞌan ni Dios katamamispaniyan tacha lhachimoꞌonun, mas jantu ixmispakan. Yu jantu talhitanuy kun Dios, yuꞌuncha lakpumalanikan va chivinti yu xtaꞌa jatapastakꞌati.

¹²Ex chuncha mas talaqtsꞌin yu ikmakay va tacha jantu katalaqtsꞌil, vachu mas taqasmatꞌacha kinchivinti va tacha jantu kataqasmaklhi. Va chuncha ni jantu lay katamapaxal ixputsukukꞌan, vachu ni jantu lay kamalaqmixinikal ixlaqtaqalkꞌan. Yu Jesús masuy tisuncha naunputuncha ni tꞌin yu mamakan

¹³Ex vachuꞌ va lakjunil: —¿Jantu malaꞌasiyatꞌik ni aniy chivinti yu xtaꞌa jatapastakꞌati? ¿Ex chuncha tas kꞌapꞌumalaꞌasiyapitikcha yu alati chivinti yu xtaꞌa jatapastakꞌati?

¹⁴Yu mamay ni tꞌin yucha va tacha yu laqputeꞌey ixchivinti Dios.

¹⁵Yu xatꞌin yu tamachal ni lakatin ni yucha va tacha ni lapanakni yu taqasmatꞌacha ixchivinti Dios. Ex chuncha ni Satanás va niman chin, va lakmaxtunichoqoy ni chivinti yu tanuy la ixjalhanutkꞌan.

¹⁶Yu xatꞌin yu tamachal laka chiyuxin, yucha va tacha ni lapanakni yu taqasmatꞌa ixchivinti Dios ex talaqaꞌiy kun achati.

¹⁷Jantukaꞌ ox tatatꞌachꞌatay, ex vamun taun panchꞌix tatayaniy. Tejkan talhitapasay maqanlqajnati, por ni chivinti yu talhakapuꞌan, ex tamakaunchoqoycha ixlhakapuꞌatkꞌan.

¹⁸Yu xatꞌin yu tamachal laka ltukunan, yucha va tacha yu alati lapanakni yu vachuꞌ taqasmatꞌa ixchivinti Dios.

¹⁹Ni yuꞌuncha vananaj ayaj tapastakꞌuy ixlhitapatskꞌan ni aniy lakamunukpaꞌ. Vachu tapastakꞌuy tacha katapulhitsukulcha ixmaqalitkꞌan kun tachun axtoqnuꞌ. Chuncha takaukchoqoy ixchivinti Dios y jantu aqtaun lay lhixajachal yu lajꞌoxi la ixjatsukuntikꞌan.

²⁰Chavay yu xatꞌin yu tamachal taꞌan ox lakatꞌun, yucha va tacha ni lapanakni yu taqasmatꞌa ixchivinti Dios, va talhakapuꞌan. Ex chuncha yu xajachal la ixjatsukuntikꞌan va tacha taun ox jaxqanti, va tacha laqataun xatꞌin yu xtaꞌa treinta, ataun xtaꞌa sesenta, yu ataun xtaꞌa va tus taun ciento. Chivinti yu lhichiviniy ni maklku

²¹Ex chuncha vachu jalakjunil: —Jantu aqtaun matichun mamaqtꞌayay maklku ex maqatanuy ixqaltaꞌapuꞌ laka kajun nisin ixtaꞌapuꞌ laka putaman. Ni maklku maqskꞌiniy kꞌamukꞌa talman, ex lay ox kamapulkul.

²²Vachu mas alin tuꞌuchun yu jantu malaqasikan chavay, astan la ox kamalaqasikanaꞌ. Mas alin yu jantu kꞌatsakan chavay, astan katasuyaꞌ.

²³Chavay incha alin mimpaqasmakkꞌan, va kaꞌasmaktꞌikcha.

²⁴Ex va lakjunil ni Jesús: —Kamakꞌatꞌikcha kuenta yu klajunau. Ni papulkan yu mapꞌatsꞌayatꞌik ni uxiknan vachu va yu papulkan katapulkaniyan ni Dios. Uxiknan yu asmatꞌatꞌik, ni Dios apalay lhuu katamasuniyan.

²⁵Yu lhitꞌajuncha, yucha apalay lhuu kaxtaqnikanaꞌ. Yu jantu kalhitsukul mas va tsꞌuniy yu lhitꞌajun, yucha kamaxtunichoqokanaꞌ. Jesús lhichiviniy ni xatꞌin yu ajin

²⁶Ex chuncha vachu naul ni Jesús: —Inchine va tacha ni Dios jalhachimoꞌonun. Va tacha qayntaun lapanaki yu mamay ixtꞌin ni lakatꞌun.

²⁷Mas ltatay laka putsꞌisniꞌ ni joꞌati, mas kujta laka tunkunuꞌ, yu xatꞌin yucha pꞌun, ex tsukuy aynaꞌ, jantu kꞌatsay tacha puꞌajin.

²⁸Yu tꞌun va xꞌaman maꞌayay ni jatachꞌanati. Pꞌunaj pꞌun ex ajin, astan xanay, ex taukꞌay xataltsꞌi tus aqtsaman.

²⁹Ex chuncha tejkan katꞌaycha, ni lapanaki puꞌiycha, va chil yu jaxqanti. Jesús lhichiviniy xatꞌin mostasa

³⁰Ex chuncha taval vachu naul ni Jesús: —¿Tas junitacha tejkan jalhachimoꞌonun ni Dios? ¿Tas lay klamasuniyau tas junitacha?

³¹Yucha va tacha taun xataltsꞌi ni mostasa yu vamun yuꞌ lakatꞌuniy xataltsꞌi yu lakchꞌankan lakatꞌun.

³²Va chuncha tejkan chꞌankantacha ni xataltsꞌi, ox ajin, tus vamun yuꞌ ay jun. Tejkan aycha jun ni ixmaqlaqapꞌu ex va ancha taltilinintsukuy tsꞌoꞌon. Tacha ni Jesús mapatsal chivinti yu xtaꞌa jatapastakꞌati

³³Ex ni Jesús chuncha ixjapumalaninin ixchivinti Dios, va pulhuvaj chivinti yu xtaꞌa jatapastakꞌati ixlakpumalaniy ni lapanakni. Ixmakay tus tacha lay katapumalaqasil.

³⁴Ni lapanakni vamun ixjalaqputeꞌeniy chivinti yu xtaꞌa jatapastakꞌati. Yu ixtꞌaltanan, yuꞌuncha va ixlakjunꞌojoy tisuncha naunputuncha tejkan xꞌamankꞌan ixlaktꞌataulay. Ni Jesús malakaꞌulal ni un y vachu yu xkan tejkan ostaulal ni lakamar

³⁵Ex chuncha taval ni anchanuꞌ julchan tejkan putsꞌislhicha, va lakjunil ixtꞌaltanan: —Chavay kaꞌau taꞌan takuktachal ni lakamar.

³⁶Ex chuncha va lakmakaulakalcha yu alati lapanakni. Talhaꞌal ni Jesús laka barco yu ixtaputajun. Vachuꞌ ixtatꞌaꞌanta alati lapanakni kun alati barcos.

³⁷Taval aqtayl pꞌas unilay, maꞌostaulnil ni xkan, tajuyachal ni laka barco, va ixꞌaqtsamanputuncha.

³⁸Ni Jesús va iltatata la ixtitampin ni barco, ixꞌaqtsꞌinta va taun aqtsꞌi. Ex yu alati va tamaqloꞌol, tajunil: —¡Jamalanini! ¿Jantu tuꞌuchun pastakꞌuyan mas tꞌaunaucha talaqtsꞌanqanin?

³⁹Ex va chuncha ni Jesús ostaulal, laqꞌaymal ni un, va junil ni xkan: —¡Kꞌalakꞌatꞌaulchꞌoꞌocha! ¡Vakcha kꞌaꞌunchꞌoꞌo! Ex ni un vakcha junchoqol. Va tus tacha aqtsꞌiyajcha ox junchoqol.

⁴⁰Ex va chuncha ni Jesús va lakjunil ixtꞌaltanan: —¿Valiꞌiychacha ayaj tꞌalhananatꞌikcha? ¿Jantukaꞌ lhakꞌapꞌupꞌinatꞌik?

⁴¹Ex yu ixtꞌaltanan va ayaj tatalhanal, aqtaylcha talakchiviniy siya yuꞌuncha, talajuniy: —¿Tas va ayuchacha ni anu lapanaki? Kaval un, kaval yu lakxkan, si taqalasmatꞌa.