Read Tlachichilco Tepehua San Marcos 5 Bible Online

San Marcos 5 - Tlachichilco Tepehua bible

San Marcos 5

¹Ex taval tatakukchalcha yu lakamar, va tachaꞌalcha xalakatꞌun Gadara.

²Tejkan taxtulcha ni Jesús ni laka barco, va laqchil qayntaun joꞌati yu taxtuchal ni kampusantu. Ixlhitꞌajun jantu ox espíritu.

³Ni anchanuꞌ joꞌati va ancha tꞌaunachal ni kampusantu, va jantu matichun lay ixchꞌiꞌulay, mas kun kadena.

⁴Va aqlhuucha ixtachꞌiꞌulay kun kadena, va ixtachꞌiniy la ixchꞌajaꞌ ali ixmakaꞌ, pero ixlajꞌexꞌojoy, va tus lakatꞌuniy ixmakay. Jantu matichun lay ixmaqalhajay ni anchanuꞌ joꞌati.

⁵Tunkuj ali tsꞌis ixtꞌasajtsukuy ni laka kampusantu ali laka aspajunaxnan, va ixlakatꞌalmaꞌokantacha xꞌaman kun chiyux.

⁶Ex va chuncha ni anchanuꞌ joꞌati laqtsꞌil ni Jesús tejkan vananaj maqati ixmintachal, ex ni yucha va takyaulaqꞌal, va taꞌaqtsoqoqtanil.

⁷Ex va chuncha va tꞌasal ni anchanuꞌ joꞌati, va naul: —¿Valiꞌiycha kintalakanuniy ni kitꞌin, uxintꞌi Jesús Sasꞌatꞌa kꞌatꞌi Dios yu vilchal laktꞌiyan? La ixtaqaꞌuti Dios va ktapayniniyan, jantu kꞌimamaꞌanlꞌajnivatꞌi.

⁸Yu Jesús va ixjunitacha: —Uxintꞌi, yu jantu ox espíritu kꞌatꞌi, ¡va kꞌamakꞌaucha ni aniy joꞌati!

⁹Ex va chuncha ni Jesús va lhisakmil: —¿Tisuncha unkꞌancha mintaqaꞌuti? Ex ni yucha va naul: —Kitꞌin ijkunkan Pumalhuu. Va kilhuvajkꞌan ijkuntau.

¹⁰Ex chuncha ni jantu lajꞌox espíritus yu ixtalaqtanuy anchanuꞌ joꞌati ixtatapayniniy ni Jesús ni jantu kalaqmalaqachal alakataun tꞌun.

¹¹Ancha ukstsꞌuniy ni aspajun taꞌan ixtayanal va ixtatꞌajun exvaynin lhuvaj pꞌaxnin.

¹²Ex tachun yu jantu lajꞌox espíritus tatapayninil ni Jesús, va tanaul: —Kilamalaqachaucha laka pꞌaxnin, ex yuꞌuncha lay kaklaqtanuucha.

¹³Ex ni Jesús va niman xtaqlhi lakatin ni katalaqtanul ni pꞌaxnin. Ex chuncha ni jantu lajꞌox espíritus va tamakaulcha ni anchanuꞌ joꞌati, va talaqtanul ni pꞌaxnincha. Va tacha tꞌuy mil pꞌaxnin ixtaꞌalinta. Va taputakyaulcha taꞌan qaltalman, va tatajuchal yu lakamar, va taꞌakskajꞌuꞌol.

¹⁴Ex chuncha yu ixtalhistakta va tatakyauꞌal mapastakꞌaninin ni ay laka putaulan, vachuꞌ ixlhimaqspaꞌ ni putaulan. Ex chuncha lhuvaj lapanakni taminchal laqtsꞌinin yu tacha tapasal.

¹⁵Ex chuncha tejkan tachinchal ni lapanakni taꞌan ixvil ni Jesús, va talaqtsꞌil ni anchanuꞌ joꞌati yu ixlaqtanuy aqmoqxnuꞌ. Ni yucha va oxicha vilchoqol, ulachoqotacha ixlaqchꞌiti, va ox jalakpastaknan. Ex chuncha ni lapanakni va ayaj tatalhanal.

¹⁶Ex chuncha yu talaqtsꞌil tacha tapasal ni anchanuꞌ joꞌati ali yu tatapasal ni pꞌaxnin, yuꞌuncha va talaqputeꞌenichoqolcha yu alati.

¹⁷Ex chuncha va aqtayl tatapayniniy ni Jesús para kataxtuchoqochalcha la ixtꞌunkꞌan.

¹⁸Tejkan tanuchoqolcha ni Jesús laka barco, ex yu joꞌati yu ixlaqtanuy aqmoqxnuꞌ va ixtapayniniy ni Jesús para katꞌaminchalcha.

¹⁹Ex ni Jesús va jantu kaꞌuyujunil, va junil: —Kꞌapꞌinchꞌoꞌochiycha la minchaqaꞌ. Kꞌaalaqpꞌutꞌeꞌeniyeꞌe milapanakni tachun yu makanin ni Jalhachimoꞌonu Dios. Vachu kꞌalakꞌun ni yucha va ayaj mapaynin.

²⁰Ex ni anchanuꞌ lapanaki va anchoqolcha la xalakatꞌun yu junkan Decápolis. Va aqtaylcha jalaqputeꞌeniy ni lapanakni tacha pupalay makachoqol ni Jesús. Ex tachun ni lapanakni va tus vak takꞌatsal. Istsiꞌi ni Jairo ali yu xanati yu piklanil ixlaqchꞌiti ni Jesús

²¹Taval va takukchoqochil laka barco ni Jesús lakamar. Tejkan tachinchal la ixkilpaꞌ ni lakamar, ancha tataqxtoqlhi qaynlhuu lapanakni.

²²Ex va chil qayntaun lapanaki yu ixlhichimoꞌoy laqa chaqaꞌ taꞌan ixtataqxtoꞌa ni israelitas, ixjunkan Jairo. Tejkan laqtsꞌil ni Jesús va tus talakaputatamanil la ixchꞌaja ni Jesús.

²³Tapayninil ni Jesús, va junil: —Ni kintsiꞌi va laycha kanil. Va knajun katꞌatꞌi moqslaniniꞌ mimakaꞌ, ex lay kaꞌayajnanchoqol, lay katsukul.

²⁴Ex ni Jesús va tꞌaꞌalcha ni Jairo. Vachuꞌ tatꞌaꞌal lhuvaj lapanakni, va tus ixtalapatsꞌiukslhaꞌanta.

²⁵Vachu ixꞌalinta qayntaun xanati taqanꞌan. Laqakautꞌuycha jachꞌitin va si jakꞌalnan ixmajꞌan.

²⁶Chuncha ni xanati va qaynlhuvaj kꞌuchꞌunun jalaqkilal yu ixtamamaqanlqajnival. Va ixmaꞌakxaꞌojotacha tachun yu ixlhitꞌajun. Jantu tsꞌuniy palay ixjun, va apalay ixtaqanꞌay.

²⁷Ex chuncha ni anchanuꞌ xanati qasmaklhi ni jakꞌuchꞌunun ni Jesús. Ex talakanunil la ixlhistapuꞌ ni Jesús, va piklanil ixlaqchꞌiti.

²⁸Va ixpastakta: “Mas vamun ixlaqchꞌiti kakpiklanil, ka palaycha kajkunchoqol”.

²⁹Ex chuncha va niman tayajcha val ni ixjakꞌalna ni xanati. Va ukskꞌatsalcha la ixlakatunaj ni va palaycha junchoqol ixtaqanꞌati yu ixlhitꞌajun.

³⁰Ex chuncha ni Jesús va ukskꞌatsal ni la ixtapꞌasta palay makachoqol xaqayntaun. Va taspꞌiklakavanal taꞌan ixtayanal ni lapanakni, va naul: —¿Taꞌayucha ixkimpiklaycha la kilaqchꞌiti?

³¹Yu ixtꞌaltanan va tajunil: —Kꞌatsꞌaycha ni lhuvaj lapanakni talapatsꞌiukslhiminta. ¿Ex valiꞌiychacha lhasakminin taꞌayucha xapꞌiklayancha?

³²Pero ni Jesús va taylhaꞌal jalaqtsꞌiniꞌ yu lapanakni, va mispaputun taꞌayucha piklanil ixlaqchꞌiti.

³³Ni xanati va kꞌatsaycha yu tacha tapasal. Va talhanal tus xkapꞌikninta, talakanunil ni Jesús, talakaputatamanil, va laqputeꞌeniꞌol tachun yu laqsaval tapasal.

³⁴Ex ni Jesús va junil: —Kintsiꞌi kꞌatꞌi, va kꞌilhakꞌapꞌupꞌin, xlhiyucha palaycha xaꞌunchꞌoꞌoy. Chavay oxamaktauncha kapꞌinchꞌoꞌo, palaycha kaꞌunchꞌoꞌo mintaqanꞌati.

³⁵Tejkan ni Jesús vananaj ixtꞌajun chivin, va tachilcha ixlapanakni ni Jairo yu ixlhichimoꞌoy laqa chaqaꞌ taꞌan tataqxtoꞌa ni israelitas. Va tajunil: —Yu mintsiꞌi va nilcha. Jantucha apalay kamaꞌanchꞌapꞌu ni Jamalaniniꞌ.

³⁶Tejkan qasmaklhi ni Jesús yu tanaul ni lapanakni, va naul, junkal ni lapanaki yu ixlhichimoꞌoy laqa chaqaꞌ taꞌan ixtataqxtoꞌa ni israelitas: —Jantu katꞌalhan. Vamun kꞌalhakꞌapꞌupꞌi.

³⁷Ex chuncha ni Jesús tejkan alcha va jantu matichun kaꞌuyujunil ni katꞌaꞌal, vamun ni Pedro ali Jacobo ali Juan yu ixlaqaj ni Jacobo.

³⁸Tachaꞌalcha la ixchaqaꞌ yu ixlhichimoꞌoy taꞌan ixtataqxtoꞌa ni israelitas. Ex ni Jesús va laqtsꞌil ixtalakchꞌilita ni lapanakni, va ixtalajqalhunta, tus pꞌas ixtalaktꞌasata.

³⁹Taval va tanuchal ni Jesús, va lakjunil: —¿Valiꞌiycha ayaj pꞌasnicha lajꞌalhunatꞌik? Ni jatsiꞌi jantu kanil, va ltatay.

⁴⁰Chuncha vamun talaktuꞌul ni Jesús. Taval ni yucha jalakmaxtuꞌol maqspaꞌ ni lapanakni yu ixtatanumanal ixpulakna. Laklhaꞌalcha vamun ixpay ali ixnati ni jatsiꞌi, vachuꞌ yu pumatꞌutu ixtꞌaltanan. Tatanul taꞌan ixmal ni jatsiꞌi.

⁴¹Ex ni Jesús va chꞌapanil ixmakaꞌ ni jatsiꞌi, va junil: —Talita, kumi —yucha naunputun: Jatsiꞌi kꞌatꞌi, kaꞌostꞌaulchꞌoꞌocha.

⁴²Ex ni anchanuꞌ jatsiꞌi va niman ostaulchoqolcha, va tiꞌukxuntayachoqolcha. Ixlhitꞌajun laqakautꞌuy ixjachꞌitin. Tejkan chuncha talaqtsꞌitapasal ni lapanakni va tus vak takꞌatsal.

⁴³Ni Jesús laklhijunil ni jantu matichun katalaqputeꞌenil yu tapasal. Ex lhinaul ixvavaka ni jatsiꞌi.