Read Tlachichilco Tepehua San Lucas 13 Bible Online

San Lucas 13 - Tlachichilco Tepehua bible

San Lucas 13

¹Tejkan chuncha naul ni Jesús ancha tayanal lati lapanakni yu taputeꞌenil yu tapasal Galilea. Va taputeꞌenil tacha laqpumaqnil ni Pilato lati yu machaqan Galilea tejkan ixtatꞌajun moqslanan ixlapaxkankꞌan ni Dios y va lakmalhiyaul ixjakꞌalnankꞌan kun ixjakꞌalnankꞌan ni talhitsukukna yu ixlapaxkankꞌan.

²Ex ni Jesús lakjunil: —Ni uxiknan pꞌastꞌakꞌatꞌik va tanil ni anchanu lapanakni va por apalay ixtalhitꞌajun ixtalaqalhinkꞌan xajantu yu alati yu machaqan Galilea.

³Pero kitꞌin klajunau jantu laqsaval kaval. Va klajunau incha jantu kamapꞌaxayapitik mijatapastakꞌatkꞌan ex katsꞌanꞌayapitik vachu va tacha ni anchanuꞌ lapanakni yu machaqan Galilea.

⁴Vachu va taniꞌol pumakautsajin lapanakni tejkan taqtal ni torre laka Siloé. ¿Ex va lhilayatꞌik va apalay lhuu ixtalaqalhinkꞌan xajantu yu alati lapanakni yu ixtavilanal Jerusalén?

⁵Jantu laqsaval kaval. Va klajunau incha jantu kꞌamapꞌaxayapitik mijatapastakꞌatkꞌan ex katsꞌanꞌayapitik vachu va tacha ni anchanu lapanakni. Jesús lhichiviniy xakꞌiu higo

⁶Ex va lakjunil ni Jesús yu aniy chivinti yu xtaꞌa jatapastakꞌati: —Qayntaun lapanaki va ixchꞌanta taun kꞌiu yu junkan higuera taꞌan ixchꞌanta ixꞌuvas. Astan puxkaul xaꞌunikan ni higuera pero jantu katemal.

⁷Ex junil yu xalhistaknaꞌ lakatꞌun: “Va laꞌatꞌutu jachꞌitin iktiꞌukxuyal puxkaunaꞌ xaꞌunikan, jantu aqtaun kaktemal. Kꞌamaqtꞌatꞌicha. Vamun valiꞌiy mapatsay ni lakatꞌun.”

⁸Ex naul yu xalhistaknaꞌ lakatꞌun: “Kiꞌukxtin kꞌatꞌi, kꞌamakꞌau ataun jachꞌitin. Kitꞌin kaklajꞌajniyaꞌ lakatꞌun, kakmamaniyaꞌ abono.

⁹Chuncha ka va lay kaꞌalil xaꞌunikan ataun jachꞌitin. Pero incha jantu ex kakmaqtayacha.” Ni Jesús palay makal qayntaun xanati xajulchan jastaknati

¹⁰Taun xajulchan jastaknati ni Jesús ixmalaninin laqa chaqaꞌ taꞌan ixtaqxtoꞌa ni israelitas.

¹¹Ancha ixtanun qayntaun xanati ixlaqtanun yu jantu ox espíritu. Xlhiyucha va ixtaqanꞌay. Va laqakautsajin jachꞌitin ixtamakataltanan.

¹²Tejkan ni Jesús laqtsꞌil ni xanati, juntaꞌil, va naul: —Xanati kꞌatꞌi, palaycha kꞌaꞌunchꞌoꞌo mintaqanꞌati.

¹³Ex moqslanikal ixmakaꞌ ni xanati, va nimancha vas tayal, aqtaylcha ay makay ni Dios.

¹⁴Ex ni xaꞌukxtin ni anchanuꞌ chaqaꞌ taꞌan ixtataqxtoꞌa ni israelitas lhitalqamal va por kꞌuchꞌunul ni Jesús tejkan xajulchan jastaknati. Va lakjunil ni lapanakni: —Alin paqchaxan putapatsa laka semana. Yu ixkꞌuchꞌuka lapanaki va lhitapatsa. Kꞌatꞌantꞌik laka semana para kꞌakꞌuchꞌukꞌantꞌik, pero jantu kꞌatꞌantꞌik yu xajulchan jastaknati.

¹⁵Ex va naul ni Jalhachimoꞌonu Jesús: —Va tꞌuy ukxpuꞌ makꞌayatꞌik. Mas va xataꞌayuꞌ uxiknankꞌan va xꞌotꞌatꞌik mivakaxkꞌan u mimburrokꞌan, lhipꞌinatꞌik moꞌotꞌunun xkan mas va xajulchan jastaknati.

¹⁶Chavay yu aniy xanati yu ixpapanti Abraham, va laqakautsajin jachꞌitin ixtaqanꞌay, va ixlaqtanuy ni Satanás. Yucha vachu chun maqskꞌiniy kaxꞌoqnikal ixtaqanꞌati para palay kaval mas va xajulchan jastaknati.

¹⁷Tejkan chuncha naul ni Jesús va tatamaxaniꞌol tachun ixtꞌalaxkaynin. Pero tachun yu alati lapanakni taꞌaqtayl talhiꞌachantajuy por tachun yu ay axtoqnuꞌ yu lakmakal ni Jesús. Tejkan lhachimoꞌonun ni Dios va tacha xatꞌin mostasa

¹⁸Ex chuncha naul ni Jesús: —Chavay klamasuniyau tacha junita tejkan lhachimoꞌonun ni Dios.

¹⁹Va tacha ni lakatꞌuniy xatꞌin yu junkan mostasa. Qayntaun lapanaki chꞌal ni lakatꞌuniy tꞌin la ixtꞌun. Ancha aynlhi tus ay kꞌiu val. Ancha tamakal ixpaqtamankꞌan ni tsꞌoꞌon la ixmaqlaqapꞌu. Tejkan lhachimoꞌonun ni Dios va tacha levadura

²⁰Ex chuncha vachu naul ni Jesús: —Klamasunichoqoyau tacha junita tejkan lhachimoꞌonun ni Dios.

²¹Va tacha levadura yu qayntaun xanati lhiyajuy kun laꞌatꞌutu kualtil harina, va tus kalhitayaꞌol tachun ni skititi. Yu putꞌuniy matiꞌ taꞌan putanukan laktꞌiyan

²²Ex ixꞌanchoqota lakatin ni Jesús ni Jerusalén, va ixtapasaꞌanta taun taun putaulan yu lajꞌay kun yu lakstꞌuniy. Va ixmalaniniꞌanta.

²³Qayntaun lapanaki va lhisakmil: —Jalhachimoꞌonuꞌ, ¿vamun tsꞌuniy yu kalaqmalaqtaxtukanaꞌ? Ex ni Jesús va naul:

²⁴—Kamakꞌatꞌik tachun la mintapꞌastakꞌan para kalal kꞌatꞌanutꞌik taꞌan putꞌuniy matiꞌ. Klajunau astan katatanuputunaꞌ lhuvaj lapanakni ex jantucha kalayaꞌ.

²⁵Incha jantu chuncha makꞌayatꞌik, ex va kaꞌostaulaꞌ yu machaqaꞌ, kamalakchauyaꞌ ni matiꞌ. Ex kꞌatꞌayayapitik maqspaꞌ, kꞌamakꞌasayapitik ni matiꞌ, kꞌaꞌunapitik: “Jalhachimoꞌonuꞌ, kilamalaqltiꞌaniu.” Ex yucha katajunan: “Jantu klamispayau. Jantu kꞌatsay toꞌoxtaycha machaqan untꞌatꞌik.”

²⁶Ex kꞌaꞌunapitik: “Klatꞌavajiu uxintꞌi y klatꞌaꞌoqnuu y la kinputaulankꞌan kilamasuniu.” Chuncha kꞌanaunapitik.

²⁷Ex katajunchoqoyan: “Jantu klamispayau. Jantu kꞌatsay toꞌoxtay machaqan untꞌatꞌik. Kapꞌintꞌikcha. Kilamakajuucha uxiknankꞌan yu laktꞌuꞌununatꞌik”, chuncha katajunan.

²⁸Ex ancha kaꞌalhunapitik y kꞌalaktsꞌakꞌalhitsꞌukꞌuyapitik mintatsalatikꞌan. Kꞌalaqtsꞌinapitik ni Abraham ali Isaac ali Jacob ali tachun yu ixtalaqputeꞌey ixchivinti Dios taꞌan lhachimoꞌonun Dios. Pero ni uxiknankꞌan va kꞌatꞌanꞌalhumaxtꞌukꞌanapitik.

²⁹Pero lapanakni yu machaqan talakachux ni lakamunukpaꞌ, taꞌan putakꞌutꞌa ni julchan y vachu taꞌan puꞌanachal, yu machaqan ixlhitoꞌanta, ixpaxtoꞌanta, va kataminaꞌ, katataulaꞌ, katavaynꞌoyaꞌ taꞌan lhachimoꞌonun ni Dios.

³⁰Ex chuncha yu jantu ay kꞌatsan chavay, ex anchanu julchan va ay lapanaki kunaꞌ. Yu la ay kꞌatsan chavay, va jantu ay kunaꞌ. Ni Jesús lhiqalhun ni putaulan Jerusalén

³¹Ex tejkan chuncha naul ni Jesús, va talaqchil lati ni fariseos, va tajunil: —Katꞌaxtꞌucha aniy. Kapiticha. Ni jalhachimoꞌonuꞌ Herodes va maqniputunan.

³²Ex ni Jesús va lakjunil: —Kalaqpꞌinchipitik ni anchanuꞌ jamakanunu xanixꞌoy. Kꞌaꞌunapitik va chavaycha kun lhiy kaklakmaxtuyaꞌ aqmoqxnun y kajkꞌuchꞌununaꞌ. Ex yu paqtꞌutunuꞌ kakmajkaniꞌoyaꞌ kilhitapatsa.

³³Pero chavaycha kun lhiy kun tꞌuxaun maqskꞌiniy kaktaylhaꞌal kilakatin. Qayntaun yu laqputeꞌey ixchivinti Dios maqskꞌiniy kanil laka putaulan Jerusalén.

³⁴Jerusalén, xalapanakni Jerusalén. Jamaqniyatꞌik yu talaqputeꞌey ixchivinti Dios y laktꞌalmaqniyatꞌik yu tamalaqachaniyan Dios. Tacha ni piyuꞌ jamaqxtoꞌa sasꞌatꞌan la ixpaqachuj, va chuncha ni kitꞌin aqlhuvaj xaklalhistakputunau pero jantu aqtaun kꞌaꞌuyujnauntꞌik.

³⁵Kꞌalaqtsꞌintꞌikcha, minchaqakꞌan kamakaunkanacha. Chavay klajunau, jantucha aqtaun kilalaqtsꞌinchoqoyau tus tejkan inchine kꞌanaunapitik: “Ay kamakakal yu mintacha la ixtaqaꞌuti ni Jalhachimoꞌonu Dios.”