Read Tlachichilco Tepehua San Lucas 20 Bible Online

San Lucas 20 - Tlachichilco Tepehua bible

San Lucas 20

¹Taval taun julchan ni Jesús ixvil yu ay lakatajtan. Ixlakmasuniy ni lapanakni, ixjalaqputeꞌeniy tacha lay katapulaqtaxtul. Ancha tachaꞌal ni xaꞌukxtinin kuras ali yu ixtamasuy ixlhachimoꞌonkꞌan ni israelitas ali yu lajꞌay lapanakni.

²Yuꞌuncha tanaul: —¿Taꞌayucha xtaqnin lhachimoꞌon ni kꞌamakꞌatꞌi yu aniy axtoqnu? ¿Taꞌayuchacha lhijunan ni chuncha kꞌamakꞌatꞌi?

³Ex ni Jesús va lakjunil: —Kitꞌin vachuꞌ kaklalhisakmiyau taun chivinti.

⁴Kilajuniu, ¿taꞌayucha malaqachal ni Juan para kamaqchajꞌavanal? ¿Va Dios u va lapanaki?

⁵Ex aqtaylcha talalhisakmiy siya yuꞌuncha, ixtalajuniy: —¿Tas kajunaucha? Incha kajunau va Dios yu malaqachal ni Juan, ex ni Jesús kintalhisakmiyan: “¿Ex valiꞌiycha jantu kalhakꞌapꞌupꞌintꞌik?”

⁶Pero incha kanaunau valiꞌiy lapanakni yu tamalaqachal ni Juan, ex ni lapanakni kintalakatꞌalmayan. Yuꞌuncha talhakapuꞌan ni Juan va yu ixlaqputeꞌey ixchivinti Dios.

⁷Ex chuncha tajunil ni Jesús: —Kijnankꞌan jantu ijkꞌatsayau taꞌayucha malaqachal ni Juan para kamaqchajꞌavanal.

⁸Ex Jesús jalakjunil: —Ex ni kitꞌin vachuꞌ jantu kaklajunau tas ayucha kixtaqnil palhachimoꞌon yu ikpumakay ni aniy axtoqnuꞌ. Yu jalaktuꞌunun tapatsanin

⁹Ex aqtaylcha jalaqxaqalay ni lapanakni, va jalakjunil taun chivinti yu xtaꞌa jatapastakꞌati. Va naul: —Qayntaun lapanaki chꞌal uvas la ixtꞌun. Va jalaqxtaqnil amedias lati tapatsanin. Ex taxtul, la maqan al.

¹⁰Ex lakachilcha ixpupꞌuxkan ni uvas. Ni ukxtin va malaqachal qayntaun ixꞌoqxtamati para kaskꞌinil lati yu japꞌuxnucha yu ixpaxtoqniy yucha. Pero yuꞌuncha tasamajꞌal ni oqxtamati, tamalaqachachoqol, jantu tuꞌuchun kataxtaqnil.

¹¹Ex yu xamanavin tꞌun va malaqachachoqol aqayntaun ixꞌoqxtamati. Vachuꞌ tasamajꞌal ni oqxtamati, tamalaqachachoqol, jantu tuꞌuchun kataxtaqnil.

¹²Ex ni ukxtin va malaqachachoqol aqayntaun pero yuꞌuncha talhimaqchapul y tamaxtulcha ixlhimaqspaꞌ ni lakatꞌun.

¹³’Ex ni anchanuꞌ xaꞌukxtin va naul: “¿Tas kakmakayacha? Kakmalaqachayaꞌ kesꞌatꞌa yu ayaj kꞌachaniy. Ka va yucha katatoꞌoyayaꞌ.”

¹⁴Ex tejkan talaqtsꞌil yu ixtatꞌajun tapatsanin talaxaqalal siya yuꞌuncha, va tanaul: “Yu aniy kalaqaꞌiyaꞌ ixlhitapatsa ixpay. Kamaqniu para kinavinkꞌan kaval ixlhitapatsa.”

¹⁵Ex tamaxtul ixlhimaqspa ni anchanu lakatꞌun, va tamaqnil. Ex ni Jesús jalaklhisakmil: —¿Ex chuncha tas kamakayacha ni xaꞌukxtin ni tꞌun?

¹⁶Va kaminaꞌ la ixtꞌun, kalaqmaqniꞌoyaꞌ ni anchanu tapatsanin. Kaxtaqniyaꞌ ni tꞌun aqayntaun. Ex ni lapanakni yu taqasmaklhi va tanaul: —Jantu chun kaval.

¹⁷Ex ni Jesús jalaqtsꞌil, va naul: —Incha jantu chuncha kaval, ex ¿valiꞌiycha inchine najun yu tsꞌoqkanta la ixchivinti Dios?Ni chiyux yu jantu kamapatsaputul yu tamakay chaqaꞌchavay yucha yu apalay maqskꞌiniy.

¹⁸Vachuꞌ naul ni Jesús: —Mas va taꞌayuꞌ lapanaki kataqalqoslhi ni anchanuꞌ laka chiyux, kataqalhiyaꞌ. Pero incha ni anchanu chiyux kapatajul y kaꞌaktꞌalmal qayntaun lapanaki ex va kalhiꞌakxajtachal tacha pꞌoqxni. Ni Jesús lhisakmikal incha maqskꞌiniy kamapalkal impuestos

¹⁹Ex yu xaꞌukxtinin kuras kun yu ixtamasuy ixlhachimoꞌonkꞌan ni israelitas va takꞌatsal ni Jesús ixlaklhichiviniy ni yuꞌuncha tejkan jalaqputeꞌenil ni anchanuꞌ chivinti. Xlhiyucha ancha ixtalakxkajuy tacha katapuchꞌapal ni Jesús. Pero jantu katachꞌapal, va ixtatalhauniy ni lapanakni yu ancha tayanal.

²⁰Ex ni yuꞌuncha jalaqmalaqachal lapanakni yu ixmakakan tacha ox lapanakni kataval. Va ixtamakanuputun ni Jesús para kanaul tuꞌuchun yu jantu ox. Ex chuncha lay katalhaꞌanil ni xagobernador.

²¹Xlhiyucha talhisakmil, va tanaul: —Jamalaniniꞌ, ni kijnankꞌan ijkꞌatsayau va si laqsaval yu naꞌun y si laqsaval yu lakmalaniy ni lapanakni. Vachuꞌ jantu makꞌay kuenta taꞌayucha ni lapanaki. Uxintꞌi ayaj ox jamasuniy ixchivinti Dios.

²²Va klalhisakmiyau incha maqskꞌiniy kamapalniu impuestos yu xaꞌay jalhachimoꞌonuꞌ Roma u jantu.

²³Pero ni Jesús yucha kꞌatsal va ixtamakanuputun. Va jalakjunil: —¿Valiꞌiycha kilalaqtsꞌintanuyaucha?

²⁴Kꞌimasunin aqxtaun tumin. ¿Ni aniy tumin tas ayuchacha ixꞌukxpucha? ¿Tas ayucha ixtaqaꞌuti aniy tsꞌoqmukꞌanikanta? Ex chuncha tanaul: —Va ixꞌukxpuꞌ kun ixtaqaꞌuti ni xaꞌay jalhachimoꞌonuꞌ Roma.

²⁵Ex chuncha jalakjunil: —Kaxtꞌaqnitꞌik yu jalhachimoꞌonuꞌ Roma yu ixnavin yucha y kaxtꞌaqnitꞌik Dios yu ixnavin Dios.

²⁶Ex chuncha jantu lay katamakanul ni Jesús la ixtalakaꞌukxpukꞌan ni lapanakni. Tus vak jalakmakal por ixchivinti, ex yuꞌuncha saq taval. Ni Jesús lhichiviniy tejkan katakujchoqoyaꞌ ni janinin

²⁷Ex chuncha lati ni saduceos talaqꞌal ni Jesús. Yuꞌuncha ixtanajun ni jantu takujchoqoy yu janinin. Ex va chuncha va tajunil ni Jesús:

²⁸—Jamalaniniꞌ, ni Moisés kintatsꞌoqnin la ixlhachimoꞌon incha kanil qayntaun lapanaki y kamakauntijlal ixanati y jantu kalhitsukunil sasꞌatꞌa, ex yu ixpꞌisaqa maqskꞌiniy katꞌatsukuchoqol ixanati para kalhitsukunil sasꞌatꞌa por xajayaꞌ.

²⁹Ex chuncha ixꞌalin qayntujun tꞌalaqaunin. Yu xajayaꞌ lakxtuklal, va nil, jantu kalhitsukul sasꞌatꞌa.

³⁰Ex yu pꞌunaj ixpꞌisaqa tꞌatsukuchoqol ixanati pero vachu nil, jantu kalhitsukul sasꞌatꞌa.

³¹Ex va chuncha yu aqayntaun ixpꞌisaqa vachuꞌ tꞌatsukuchoqol ni xanati ex vachu nil. Ex vachu va chuncha val kun tachun ni tꞌalaqaunin, jantu katalhitsukunil sasꞌatꞌa.

³²Ex taval vachuꞌ nil ni xanati.

³³Ex tejkan katakujchoqoyaꞌ ni janinin, ¿taꞌayucha ixanati kunaꞌ? Qayntujun tꞌalaqaunin va si ixtatꞌatꞌajun.

³⁴Ex ni Jesús va lakjunil: —Ni lapanakni aniy lakamunukpaꞌ va talakxtuklay y lakꞌikan.

³⁵Pero ni lapanakni yu tapaxtoqniy katachaꞌal yu ataun lakamunukpaꞌ, mas taniy va katakujchoqoyaꞌ. Ancha jantu katalakxtuklayaꞌ y jantu kalakꞌikanaꞌ.

³⁶Yuꞌuncha jantucha kataniyaꞌ. Tacha ixmayulnin Dios katajunaꞌ, va yu sasꞌatꞌan Dios katajunaꞌ, va takujchoqotacha.

³⁷Ni Moisés yucha kintamasuniyan ni takujchoqoy ni janinin tejkan lhitsꞌoqlhi ni javan yu ixmaqtayvil. Taꞌan chuncha tsꞌoqlhi, va naul ni Dios: “Kitꞌin ixDios Abraham, ixDios Isaac, ixDios Jacob kunita”, naul ni Dios.

³⁸Chavay mas naunatꞌik va ixtanitacha ni anchanu lapanakni pero yu Dios naul: “Kitꞌin va ixDioskꞌan kunita.” Ex chuncha pukꞌatsayau va ixtakujchoqotacha. Ni Dios jantu Dios kaval kun yu janinin, va ixDioskꞌan yu tatꞌajun.

³⁹Ex lati yu ixtamasuy ixlhachimoꞌonkꞌan ni israelitas va ancha ixtayanal, va tajunil ni Jesús: —La ox altꞌayan, jamalaniniꞌ.

⁴⁰Ex chuncha tatalhaunilcha, jantucha apalay tuꞌuchun katalhisakmil. Ni Cristo jantu vamun sasꞌatꞌa David kaval

⁴¹Ex ni Jesús laklhisakmil ni lapanakni: —¿Valiꞌiycha tanajun va sasꞌatꞌa David ni Cristo yu ixtanajun kamalaqachayaꞌ ni Dios?

⁴²Jantu vamun sasꞌatꞌa David kaval. David tsꞌoqlhi laka salmos va naul:Ni Dios naul, va junkal kiJalhachimoꞌonuꞌ:“Aniy kꞌintꞌatꞌaꞌul la kilhijakanaj makaꞌ para katatoꞌoyan ni lapanakni

⁴³tus kakmaqalhajaꞌoyaꞌ tachun mintꞌalaxkaynin.”

⁴⁴Ex incha David naul ni Cristo va ixJalhachimoꞌonuꞌ, ex naunputun ni jantu vamun sasꞌatꞌa kaval. Ni Jesús lakmukꞌanil laqtaqal yu ixtamasuy ixlhachimoꞌonkꞌan

⁴⁵Ex tachun ni lapanakni taqalasmaklhi ni Jesús tejkan jalakjunil ixtꞌaltanan, va naul:

⁴⁶—Kꞌalhistꞌajkꞌantꞌikcha para jantu katamakanun yu tamasuy kilhachimoꞌonkꞌan. Yuꞌuncha tamaqamay katatiꞌukxuntayal kun yu laqlman laqchꞌiti tacha taꞌulay ni lajꞌay lapanakni. Taꞌachaniy kalakmastakꞌakal laklhitamau tacha ay lapanakni kataval. Tataulputun taꞌan tataulay yu xalajꞌaynin laqa chaqan taꞌan tataqxtoꞌa ni lapanakni vachu taꞌan alin lakvayti.

⁴⁷Talakmaxtuniy ixchaqakꞌan yu tiyaunin. Vachu la panij tatapayniy Dios para katatoꞌoyal ni lapanakni. Yuꞌuncha katalaqaꞌiyaꞌ apalay lhuu jamaqanlqajnati.