Read Tlachichilco Tepehua San Lucas 8 Bible Online

San Lucas 8 - Tlachichilco Tepehua bible

San Lucas 8

¹Taval ni Jesús ixtiꞌukxuyachal tachun ni lajꞌay putaulanaxna kun ni lakstꞌuniy putaulanaxna. Ixjalaqputeꞌeniy ni lapanakni tacha lhachimoꞌonun ni Dios. Yu ixpumakautꞌuykꞌan yu ixtatꞌaltanan, yuꞌuncha vachu ancha ixtatꞌatiꞌukxuyanal.

²Vachu ixtatꞌatiꞌukxuyanal xanatin yu palay tajunchoqol ixtaqanꞌatikꞌan vachuꞌ yu lakmaxtunikal aqmoqxnun. Qayntaun ixjunkan María yu machaqaꞌ Maqdala, yu maxtunikal laqatujun aqmoqxnun.

³Vachuꞌ ixtꞌaꞌanta Juana yu ixanati Chuza yu xaꞌukxtin ixꞌoqxtamatin Herodes. Vachu Susana ali qaynlhuu xanatin yu ixtaꞌaqtayjuy kun ixlhitapatskꞌan ni Jesús ali ixtꞌaltanan. Ni tꞌin yu xtaꞌa la ox jaxqanti

⁴Ixtataxtuy lhuvaj lapanakni taun taun putaulan, ixtalaqmin ni Jesús. Tejkan tataqxtoqlhicha lakjunil taun chivinti yu xtaꞌa jatapastakꞌati, va naul:

⁵—Qayntaun lapanaki al maman ni ixtꞌin. Tejkan tꞌajun maman, lati xatꞌin taꞌeltajul lakatin. Ancha vamun akchꞌintamakal y yu xatsꞌoꞌon laktꞌiyan va tataꞌeltajul unan.

⁶Alati xatꞌin tamal laka chiyux. Ancha pꞌul ni tꞌin pero yu tꞌun jantu jachꞌamal kaval, ex niman lakxixꞌol.

⁷Alati xatꞌin tamachal laka jaltukunan. Ancha vachu pꞌul pero chꞌantaun tꞌapꞌul ni jaltukun, va maqatanul, talakxixtanulcha yu xatꞌin.

⁸Alati tamal taꞌan ox tꞌun. Ancha pꞌul, ox aynlhi, va xtaqlhi ox jaxqanti, taun ciento por laqatamin. Tejkan chuncha naul ni Jesús ex pꞌas naul: —Incha alin mimpaqasmakkꞌan, ex kaꞌasmaktꞌikcha. Yu naunputunta ni anuꞌ chivinti

⁹Ex ixtꞌaltanan ni Jesús talhisakmil sunchacha naunputunta ni anu chivinti.

¹⁰Ni Jesús lakjunil: —Uxiknankꞌan Dios tamasuniyan tacha lhachimoꞌonun yu jantu takꞌatsay alati lapanakni. Pero yu alati lapanakni klakpumalaniy chivinti yu xtaꞌa jatapastakꞌati. Ex chuncha mas talaqtsꞌin yu kmakay, va tacha jantu katamispal, mas taqasmatꞌacha kinchivinti, jantu tamalaqasiy. Yu naunputun ni chivinti yu lhichiviniy ni tꞌin

¹¹’Yu aniy chivinti yu xtaꞌa jatapastakꞌati va inchine naunputun. Yu xatꞌin yucha va ixchivinti Dios.

¹²Ni tꞌin yu tatamal lakatin, yucha va tacha ni lapanakni yu taqasmatꞌacha ixchivinti ni Dios pero yu aqmoqxnuꞌ va niman chinachil para kalakmaxtunichoqol. Va najun jantu katalhakapuꞌal va para jantu katalaqtaxtul.

¹³Ni tꞌin yu tatamal laka chiyux, yucha va tacha lapanakni yu taqasmatꞌacha ixchivinti Dios, ex talhakapuꞌancha kun achati. Pero ni chivinti jantu tanuy ox la ixjalhanutkꞌan. Ex tejkan tatapasay tsꞌuniy maqanlqajnati va tataꞌosuspꞌikchoqoycha.

¹⁴Ni tꞌin yu tatamal laka jaltukunan yucha va tacha ni lapanakni yu taqasmatꞌacha ixchivinti Dios pero astan tamakauntijlay. Ayaj alin yu tapastakꞌuy, vachu tamaqamay ixmaqalitkꞌan kun xaꞌachati aniy lakamunukpaꞌ. Ex jantucha ox lhixajyachal ixjatsukuntikꞌan.

¹⁵Ni tꞌin yu tamal ox lakatꞌun yucha va tacha ni lapanakni yu taqasmaktayl ixchivinti Dios y tamaꞌay la ixjalhanutkꞌan kun ox jatapastakꞌati. Vas tataylhaꞌan kun ni chivinti yu taqasmatꞌacha. Chuncha tamaqantaulay y ox lhixajyachal ixjatsukuntikꞌan. Yu chavay jantu mispakan ox katasuyaꞌ tacha taun maklku yu maqtajiy

¹⁶’Jantu matichun mamaqtayay taun maklku para kamaqatanul laqa aqchoq u para kamanul ixtaꞌapuꞌ ni saqati. Va mukꞌay talman para lay katalaqtsꞌil maklku yu tatanuy ni laqa chaqaꞌ.

¹⁷Vachu mas alin tuꞌuchun yu jantu ox malaqasikan chavay, astan la ox kamalaqasikanaꞌ. Mas vamun lati takꞌatsay chavay, astan tachun katakꞌatsayaꞌ.

¹⁸’Chavaycha la ox kilaqasmakniu. Klajunau yu lhitꞌajuncha jatapastakꞌati yucha apalay lhuu kaxtaqnikanaꞌ. Yu jantu kalhitsukul, mas va yu lakatsꞌuniy yu lhilay lhitꞌajun, yucha kamaxtunichoqokanaꞌ. Talaqꞌal ixnati kun ixtꞌalaqaunin ni Jesús

¹⁹Ex chuncha ni ixnati ali ixtꞌalaqaunin ni Jesús tachinchal taꞌan ixvil. Ixtalaqtsꞌinputun pero jantu lay katalakanunil, va lhuvaj lapanakni ixtaꞌalinta.

²⁰Ex va junkal ni Jesús: —Minati kun mintꞌalaqaunin tayanal maqspaꞌ, tatꞌachivinputunan.

²¹Pero ni Jesús va naul: —Yu laqsaval kinati ali yu laqsaval ketꞌalaqaunin tajunita va yu taqasmatꞌa ixchivinti Dios y tamakay tacha najun. Ni Jesús lhichimoꞌol ni un kun lakxkan

²²Taun julchan ni Jesús tatajul laka barco kun ixtꞌaltanan, va lakjunil: —Kaꞌaucha tus yu alakataun ixkilpaꞌ lakxkan. Ex taꞌal.

²³Tejkan tatꞌajuncha tapasanan ni lakxkan, va ltatal ni Jesús. Taval aqtaylcha pꞌas unilay, ex ni barco aqtaylcha tajuyachal ni xkan. Taval va laycha kaꞌaqtsamal. Va tatalhanancha katalaqtsꞌanqal ni barco.

²⁴Ex taꞌal maqloꞌonun ni Jesús, va tajunil: —Jamalaniniꞌ, jamalaniniꞌ, aniy tꞌaunaucha talaqtsꞌanqanin. Ex ni Jesús ostaulal, aqtayl laqꞌaymay ni un kun xaꞌoqxpuputi yu ixꞌukxlaklata ni xkan. Ex chuncha va tus tachun talakataulꞌochoqol, tacha aqtsꞌiyaj ox junchoqol.

²⁵Ex ni Jesús lakjunil ixtꞌaltanan: —¿Valiꞌiycha jantu kilalhakapuꞌau? Pero yuꞌuncha ayaj tatalhanancha por yu makal ni Jesús. Vamuncha saq tataulal, va talalhisakmiy siya yuꞌuncha: —¿Tas ayucha ni aniy lapanaki? Lhichimoꞌoy ni xkan kun ni un y taqalasmatꞌa. Qayntaun yu machaqaꞌ Gadara ixlhitꞌajun yu jantu ox espíritu

²⁶Ex chuncha tachaꞌal ni lakatꞌun Gadara yu ixlhitukuktachal ni lakxkan Galilea.

²⁷Tejkan taxtul ni Jesús ni anchanu lakatꞌun, talakanunil qayntaun lapanaki yu machaqaꞌ ni anchanu putaulan. Ni anchanu lapanaki ayaj maqancha ixchꞌapata taun aqmoqxnuꞌ. Jantucha ixꞌulay ixlaqchꞌiti. Vachu jantucha ixtꞌajun laqa chaqaꞌ, vamuncha ni kampusantu ixtꞌajun.

²⁸Tejkan laqtsꞌil ni Jesús, va taꞌaqtsoqoqtanil la ixtalakaꞌukxpuꞌ. Va la pꞌas tꞌasal, va junil: —¿Suncha kꞌatsꞌaycha kun kitꞌin? Jesús Sasꞌatꞌa kꞌatꞌi ni Dios yu vilchal laktꞌiyan. Iktapayniniyan jantucha apalay kꞌilhimaqchꞌapꞌu.

²⁹Ni Jesús ixtꞌajuncha tꞌachivin ni aqmoqxnuꞌ para kamakaunchoqolcha ni anchanu lapanaki. Ni aqmoqxnuꞌ aqlhuvaj ixchꞌapay. Yu ixtalhistakꞌa anchanuꞌ lapanaki, yuꞌuncha ixtamaqchꞌiy, ixtachꞌanchꞌiy kun cadenas pero va niman ixlajꞌexꞌojoy. Ex ni aqmoqxnuꞌ ixlhaꞌanchoqoycha aaqtaun lakakꞌavinan.

³⁰Ex ni Jesús lhisakmil: —¿Tisuncha unkꞌancha? Ex va junil: —Kitꞌin ijkunkan Pumalhuu. Lhuvaj aqmoqxnun ixtachꞌapata anchanuꞌ lapanaki, xlhiyucha chuncha naul.

³¹Ex ni aqmoqxnun tatapayninil ni Jesús para jantu kalaqmalaqachal taꞌan pulman.

³²Ni anchanu aspajun ixtatꞌajun exvaynin lhuvaj pꞌaxnin. Ni anchanu aqmoqxnun tatapayninil katalaqtanul ni anchanu pꞌaxnin. Ex jaxtaqnil lakatin.

³³Ex ni aqmoqxnun tamakaulcha ni anchanu lapanaki. Va talaqtanulcha ni pꞌaxnin. Ex ni pꞌaxnin va taputakyaulcha taꞌan qaltalman, va tatajuchal yu lakxkan, va taꞌakskajꞌuꞌol.

³⁴Ex tejkan chuncha talaqtsꞌil yu xalhistaknan pꞌaxnin, ayaj tatalhanal. Tatakyaul laqputeꞌenin yu ay laka putaulan y vachu ixlhimaqspaꞌ ni putaulan.

³⁵Ex ni lapanakni taꞌal laqtsꞌinin yu tapasal. Tejkan tachaꞌal taꞌan vil ni Jesús ancha vachuꞌ vil ni lapanaki yu tamakaunchoqol ni aqmoqxnun. Yucha vilnil la ixchꞌajaꞌ ni Jesús, ulachoqotacha ixlaqchꞌiti, va ox jalakpastaknan. Tejkan chuncha talaqtsꞌil, va tatalhanal ni lapanakni.

³⁶Yu ixtalaqtsꞌinta yu tapasalcha, yuꞌuncha talaqputeꞌel tacha val tejkan palay junchoqol ni lapanaki yu ixlhitꞌajun aqmoqxnun.

³⁷Ex chuncha tachun ni lapanakni yu ancha lakatꞌun Gadara tatapayninil ni Jesús para kaꞌanchoqolcha. Va ayaj tatalhaunil. Ex ni Jesús tanuchoqolcha laka barco, va minchoqochalcha.

³⁸Ni lapanaki yu tamakaunchoqol ni aqmoqxnun, va tapayninil ni Jesús para vachu katꞌaꞌal, pero ni Jesús va junil:

³⁹—Kꞌapꞌinchꞌoꞌochiycha la minchaqaꞌ, ancha kꞌalaqpꞌutꞌeꞌeyeꞌe milapanakni tachun yu makanin ni Dios. Ex ni lapanaki anchoqolcha, aqtaylcha jalaqputeꞌeniy ni lapanakni talakachux la ixputaulan yu makanil ni Jesús. Qayntaun jatsiꞌi yu ixnitacha ali qayntaun xanati yu ixtaqanꞌay

⁴⁰Tejkan ni Jesús takukchoqochil ixlhiꞌaniy laka xkan, tachun ni lapanakni la ox talaqaꞌil, va ixtapakxanꞌita.

⁴¹Ex chinchal qayntaun lapanaki yu ixjunkan Jairo, ixlhachimoꞌonun laqa chaqaꞌ taꞌan ixtataqxtoꞌa ni israelitas. Talakaputatamal laka tꞌun taꞌan ixyal ni Jesús, va tapayninil kaꞌal la ixchaqaꞌ.

⁴²Ixlhitꞌajun vamun qayntaun istsiꞌi, va laqakautꞌuycha ixjachꞌitin ixlhitꞌajun. Ixchꞌapata taun taqanꞌati, va laycha kanil. Ex tejkan ixꞌanta ni Jesús, ixtatꞌaꞌanta lhuvaj lapanakni va tus lapatsꞌiuksni ixtajunita.

⁴³Ancha ixꞌalin qayntaun xanati jantu ixlakaxixta ni jakꞌalnan y va laqakautꞌuycha jachꞌitin ixtꞌajun maqanlqajnaꞌ. Va jalaqkilaꞌol ni jakꞌuchꞌunun tus va mamiꞌonil yu ixlhitꞌajun ixlhitapatsa y va nisin palay kaval.

⁴⁴Ex ni yucha talakanunil ni Jesús la ixlhistapuꞌ, va piklanil ixkiltuꞌ ixlaqchꞌiti. Ex tejkan chuncha makal va niman tayajval ni jakꞌalnan.

⁴⁵Ex ni Jesús lhasakminil: —¿Tas ayucha ixkimpiklaycha? Jantu matichun kalhitaulnil. Ni Pedro kun ixtꞌaltanankꞌan tanaul: —Jamalaniniꞌ, ni lapanakni tus talapatsꞌiuksta y talasamaꞌan va toꞌoxtaycha lata. ¿Valiꞌiycha lhasakminin taꞌayucha piklayancha?

⁴⁶Pero ni Jesús va naul: —Alin taꞌayucha ni ixkimpiklay, ni kitꞌin kꞌukskꞌatsal ni kmaꞌayajnichoqol qayntaun ixtaqanꞌati la kintapꞌasta.

⁴⁷Ni xanati tejkan kꞌatsal jantu lay vak ixjun, va talhanal tus xkapꞌikninta, talakanunil ni Jesús, talakaputatamanil. Va junil la ixtalakaꞌukxpukꞌan tachun ni lapanakni valiꞌiycha piklal ni Jesús y tacha pupalaycha junchoqol.

⁴⁸Ex ni Jesús junil: —Kintsiꞌi kꞌatꞌi, va kꞌilhakꞌapꞌupꞌin xlhiyucha palaycha xaꞌunchꞌoꞌoy. Kꞌapꞌinchꞌoꞌocha oxamaktaun.

⁴⁹Ni Jesús vananaj ixtaylhaꞌanta ixchivinti tejkan chinchal qayntaun yu minchal la ixchaqaꞌ Jairo. Va naul, va junkal ni Jairo: —Mintsiꞌi va nilcha. Jantucha apalay kꞌamaꞌanchꞌapꞌu ni jamalaniniꞌ.

⁵⁰Pero tejkan qasmaklhi ni Jesús, va junil ni Jairo: —Jantu katꞌalhan. Vamun kꞌalhakꞌapꞌupꞌi, ex mintsiꞌi palay kunchoqoyaꞌ.

⁵¹Tejkan chaꞌal laqa chaqaꞌ, ni Jesús jantu kaxtaqlhi lakatin matichun katatanuchal, vamun ni Pedro ali Jacobo ali Juan kun ixpay ali ixnati ni jatsiꞌi.

⁵²Tachun yu alati lapanakni ixtatꞌajun laqalhunin ixtalhimaqatsꞌanqananta ni jatsiꞌi. Pero ni Jesús lakjunil: —Jantu kꞌalajꞌalhuntꞌik. Ni jatsiꞌi jantu kanil, va ltatay.

⁵³Vamun talhiꞌachan tejkan chuncha naul ni Jesús, ixtakꞌatsay ni ixnitacha.

⁵⁴Ex ni Jesús chꞌapanil ixmakaꞌ ni jatsiꞌi, la pꞌas xaqalal, va junil: —Jatsiꞌi, kitꞌin kunan kaꞌostꞌaꞌulcha.

⁵⁵Ex chuncha ni jatsiꞌi kujchoqolcha mas ixnitacha, va niman ostaulchoqol. Ni Jesús laklhijunil ixpayan katavavachoqolcha.

⁵⁶Ixpayan va tus saq taval. Ex ni Jesús lakjunil jantu matichun katalaqputeꞌenil tacha yu tapasal.