Read Tlachichilco Tepehua Los Hechos 9 Bible Online

Los Hechos 9 - Tlachichilco Tepehua bible

Los Hechos 9

¹Exnicha ni anchanu julchan, ni Saulo va ayaj ixnajun kalaqmaqnil yu ixtalhakapuꞌan ni Jalhachimoꞌonuꞌ Jesús. Va laqꞌal yu ay ixꞌukxtinkꞌan xakuras ni israelitas.

²Va skꞌinil para kaxtaqnil lhachimoꞌon kun aqxtaun karta yu lay kalakmasunil ni israelitas yu ixtataqxtoꞌa laka ay putaulan Damasco taꞌan ixjamasunikan ixlhachimoꞌon ni israelitas. Chuncha para lay kalaklhimil tachꞌinin laka putaulan Jerusalén ni lapanakni yu kalaktemal yu ixtalhakapuꞌan ni Saystꞌi Lakatin, mas kaval joꞌakna ali xanatin.

³Tejkan ixꞌanta lakatin taꞌan va ukstsꞌuniycha laka putaulan Damasco va tꞌoqx maklkunil taun pꞌays maklku laktꞌiyan.

⁴Ex niman taqtal laka tꞌun, va qasmaklhi taun chivinti yu naul: —Saulo, Saulo, ¿valiꞌiycha kꞌixkꞌaylhitꞌaꞌuncha?

⁵Yu Saulo va naul: —¿Jalhachimoꞌonuꞌ, tas ayucha kꞌatꞌicha ni uxintꞌi? Ex va junkal: —Ni kitꞌin va Jesús kunita. Va kitꞌin yu kixkꞌaylhitꞌaꞌun ni uxintꞌi. [Va milaqꞌaman tꞌaꞌunkꞌan mamajkꞌatsꞌanikꞌa tacha laqataun vakax tejkan chꞌintay yu putiltoqolhaankan yu aqtsupipi.

⁶Ex ni Saulo va jaxkapꞌiknil ixtalhanti, va naul: —Jalhachimoꞌonuꞌ, ¿tisuncha naꞌun kakmakal ni kitꞌin? Ex yu Jalhachimoꞌonuꞌ va naul:] —Kaꞌostꞌaꞌulcha, kapiticha ni laka putaulan Damasco. Ancha katajunan yu maqskꞌiniy kamakꞌatꞌi.

⁷Ex ni lapanakni yu ixtatꞌaꞌanta ni Saulo va ayaj tatalhanal, va taqasmaklhi chivinkal pero jantu matichun katalaqtsꞌil.

⁸Taval tayachoqolcha ni Saulo pero tejkan malaqltiꞌal ixlaqchul jantu lay kalakavanal. Ex tamaqchꞌapal y talhaꞌalcha laka putaulan Damasco. Ni Ananías laqꞌal ni Saulo

⁹Ancha paqtꞌutu ixvilchal, jantu lay ixlakavanan y vachuꞌ jantu kavayl y jantu tuꞌuchun kaꞌoqlhi.

¹⁰Ancha Damasco ixvil qayntaun yu ixjunkan Ananías yu ixlhakapuꞌan ni Jesús. Yucha tasunil ni Jalhachimoꞌonuꞌ Dios y laqtsꞌil la ixtalakavanti, va junil: —Ananías. Ex yu Ananías va naul: —Aniy kꞌalinta, Jalhachimoꞌonuꞌ.

¹¹Ex ni Jalhachimoꞌonuꞌ aaqtaun junchoqol: —Kaꞌostꞌaꞌulcha, kapiticha la ixchaqaꞌ Judas yu yal lakatin yu junkan Vas Tin. Ancha kꞌalakxkꞌauyeꞌe qayntaun joꞌati yu machaqaꞌ Tarso yu junkan Saulo. Yucha kintꞌajun tapaynininiꞌ ni anchanu laqa chaqaꞌ.

¹²Yucha jalakavanal tus tacha kalaqmil qayntaun joꞌati yu junkan Ananías y va moqslanil ixmakaꞌ para kalal kalakavananchoqol.

¹³Ex taval yu Ananías va naul: —Jalhachimoꞌonuꞌ, qaynlhuucha lapanakni kintalaqputeꞌenita ni anchanu lapanaki, yucha ayaj jalaqlhimaqchapuy milapanakni yu tavilanal Jerusalén.

¹⁴Y chavay ni aniy putaulan vachuꞌ lhiminta ixlhachimoꞌon ni ixꞌukxtinkꞌan kuras para kalakchꞌilhaꞌal tachun ni lapanakni yu talhakapuꞌan mintaqaꞌuti.

¹⁵Ex yu Jalhachimoꞌonuꞌ va naul: —Kapiticha. Ni anchanu lapanaki kitꞌin klaksakta para kalhaꞌal kintaqaꞌuti y kilhichivinil kun lapanakni yu jantu israelitas kataval y vachuꞌ kun ixlhachimoꞌonunkꞌan y vachuꞌ kun yu israelitas.

¹⁶Kakmasuniyaꞌ ni yucha ayaj maqskꞌiniy kilamaqanlqajnal.

¹⁷Ex alcha ni Ananías, va tanuchal laqa chaqaꞌ taꞌan ixvil ni Saulo. Va moqslanil ixmakaꞌ, va junil: —Kintꞌalaqajun Saulo, ni Jalhachimoꞌonuꞌ Jesús yu tasunin ni lakatin taꞌan ixpꞌutꞌantꞌa, va yucha kimalaqachal para kꞌalakꞌavananchꞌoꞌocha y vachuꞌ para kalaqtanuꞌojon ni Espíritu Santo.

¹⁸Ex nimancha lakapupatajul tuꞌuchun tus tacha ixtaxꞌapꞌiti jatanti, ex lakavananchoqolcha. Ex chuncha va ostaulchoqolcha, va aqchajꞌaulcha.

¹⁹Astan vaynchoqolcha y va chꞌapachoqolcha ixtapꞌasta. Va jalaktꞌatamakaul lati julchan para katꞌataulal ancha laka putaulan Damasco yu ixtalhakapuꞌan. Ni Saulo laqputeꞌey ixchivinti Dios laka putaulan Damasco

²⁰Ex ni Saulo niman aqtayl jalaqputeꞌeniy lapanakni laqa chaqan taꞌan ixtataqxtoꞌa ni israelitas. Va jalakjunil ni lapanakni ni Jesús va Sasꞌatꞌa Dios junita.

²¹Tejkan chuncha taqasmaklhi ni lapanakni va tus vak takꞌatsal, va talalhisakmil y tanaul: —¿Tas ayucha ni aniy joꞌati? ¿Jantu yuꞌ yu lakxkaulhitꞌajun ni lapanakni ancha Jerusalén yu taskꞌin Dios la ixtaqaꞌuti Jesús? Chavay vachuꞌ aniy minta vamun para kalakchꞌapal yu talhakapuꞌan Jesús y kalaklhaꞌanil yu ixꞌukxtininkꞌan kuras.

²²Pero ni Saulo ixchiviniy kun tapꞌasta yu lhilhiy ixtalhavaniy, y ox ixlakmasuniy ni Jesús va Cristo yu laksakta Dios. Va jalaktꞌilhinil ixjatapastakꞌatkꞌan ni israelitas yu ancha ixtavilanal laka putaulan Damasco. Qoslhi ni Saulo

²³Ex chuncha paqlhuu val, ni israelitas chꞌantaun taval para katamaqnil ni Saulo.

²⁴Pero yucha kꞌatsal yu ixtamakaniputun. Mas laka julchan u mas laka putsꞌista va si ixtapakxanꞌiy taꞌan putaxtukan ni anchanu ay putaulan.

²⁵Pero tejkan tsꞌis ixjunita yu ixtalhakapuꞌan va tapumaꞌeltajul laqataun ay qaychꞌi la xaꞌexni ni putaulan. Ex chuncha tapumaqosulcha ni Saulo. Ni Saulo chaanchoqol Jerusalén

²⁶Tejkan chaꞌal Jerusalén va ixlaktꞌatanuputun yu ancha ixtalhakapuꞌan. Pero tachun ixtatalhauniꞌojoy, va jantu katalhakapuꞌanil ni yucha incha laqsaval kalhakapuꞌal vachuꞌ.

²⁷Pero qayntaun yu ixjunkan Bernabé yucha va laqaꞌil, y jalakmamispanil yu jalaqmalaqachal ni Jesús. Va jalakjunil ni yuꞌuncha ni Saulo va laqtsꞌil lakatin ni Jalhachimoꞌonuꞌ Jesús, y va tꞌachivinil. Vachuꞌ jalakjunil ni Saulo laqputeꞌel ixtaqaꞌuti Jesús sin talhanti laka putaulan Damasco.

²⁸Ex Saulo tamakaunchalcha Jerusalén, jalaktꞌatiꞌukxuntayalcha yu ixtalhakapuꞌan.

²⁹Va laqputeꞌel ixtaqaꞌuti Jesús sin talhanti. Va jalaktꞌachivinil ni israelitas yu ixtachiviniy griego y yuꞌuncha vamun talhilakchivinil kun lhuu lakchivinti. Vachuꞌ ni yuꞌuncha ixtamaqniputun.

³⁰Tejkan chuncha takꞌatsal ixjatꞌalaqaunin yu vachuꞌ ixtalhakapuꞌan, ex va talhaꞌal ni Saulo laka putaulan Cesarea, ex astan tamalaqachal laka putaulan Tarso.

³¹Tachun yu ixtalhakapuꞌan xaꞌestado Judea ali xaꞌestado Galilea ali xaꞌestado Samaria va oxamaktaun ixtaꞌukxuyanal y pꞌays val ixlhakapuꞌatikꞌan. Va ayaj ixtatoꞌoyay ni Jalhachimoꞌonuꞌ Jesús, y ni Espíritu Santo laqꞌaqtayjul para katatalhaval. Ni Pedro palay makachoqol ni Eneas kun ixtapꞌasta Dios

³²Ex chuncha ni Pedro va ixjalaqlaqꞌan ixlapanakni Dios, y vachuꞌ jalaqꞌal yu ixtavilanal laka putaulan Lida.

³³Ancha paxtoqlhi qayntaun lapanaki yu ixlakanita, laqatsajin jachꞌitin ixmal laka putaman.

³⁴Ex yu Pedro va junil: —Eneas, ni Jesucristo palaycha makachoqoyan. Kaꞌostꞌaꞌulcha, kasaktꞌicha mixtaꞌati. Ex nimancha ostaulal.

³⁵Tejkan chuncha talaqtsꞌil ni lapanakni yu ixtavilanal laka putaulan Lida kun laka putaulan Sarón, va tamapaxal ixputsukukꞌan, va talhakapuꞌal ni Jalhachimoꞌonuꞌ Jesús. Ni Dorcas kujchoqol mas ixnitacha

³⁶Laka putaulan Jope ixꞌalin qayntaun xanati yu ixlhakapuꞌan yu ixjunkan Tabita yu vachuꞌ ixjunkan Dorcas laka lhichivin Griego. Yucha mas va tavanancha kaval ixmakay tachun yu lajꞌox vachuꞌ ixlaqꞌaqtayjuy ni kilpatanin.

³⁷Ex taval taqanꞌal ni yucha y va nilcha. Va talaqachaꞌal la ixlakatunaj, ex astan talhaꞌal taun kuarto taꞌan talman laqa chaqaꞌ yu talaqtꞌuy.

³⁸Yu putaulan Jope va ixlhiꞌukstsꞌuniy ixjunita kun Lida taꞌan ixvilchal ni Pedro. Tejkan takꞌatsal yu ixtalhakapuꞌan ni ancha ixvilchal ni Pedro ex va tamalaqachal pumatꞌuy jaltanan, va tatapayninil ni Pedro, va tajunil: —Kijnan klalaqmintau para tsꞌalaj kilatꞌaꞌau Jope.

³⁹Ex yu Pedro nimancha ostaulal, va jalaktꞌaꞌalcha. Tejkan chinchal ex tajuntalhaꞌal ni laka kuarto taꞌan ixmachal ni janiniꞌ. Yu tiyaunin ayaj ixtalhiqalhun, va tamasunil ni Pedro ixlaqchꞌitikꞌan yu jalakmakanil ni Dorcas tejkan vananaj ixtꞌajun.

⁴⁰Ni Pedro laklhijunil katataxtul maqspaꞌ, ex va taꞌaqtsoqoqtanil ni Dios y va tapayninil. Ex astan talaqaspꞌiklhi y laqastal ni janiniꞌ, va junil: —Tabita, kaꞌostꞌaꞌulcha. Ex ni janiniꞌ talaqpuꞌalcha la ixlaqchul y laqtsꞌil ni Pedro, y ostaulalcha.

⁴¹Ex ni Pedro maqchꞌapaꞌostaulnil y jalakjuntanuchoqolcha ixpulakna yu ixtalhakapuꞌan vachuꞌ kun yu tiyaunin, y lakmasunil va ixkujchoqotacha.

⁴²Taval takꞌatsaꞌolcha ni xaputaulan Jope, ex qaynlhuu lapanakni talhakapuꞌal ni Jalhachimoꞌonuꞌ Jesús.

⁴³Ex ni Pedro ancha tamakaunchalcha paqlhuu laka putaulan Jope la ixchaqaꞌ qayntaun xalaꞌoxiniꞌ jaxtaꞌan yu ixjunkan Simón.