Read Batak Toba Génesis 13 Bible Online

Génesis 13 - Batak Toba bible

Génesis 13

¹Qaq so Abram ca'ai ye Egipto, da nqo'ona ye Néguev, nache lỹatec aso lhua, qataq 'enauac so lalamaxatpi, qaq so lasoshec Lot nache ca'ateguelo soomaye.

²Qaq so Abram ỹataqta sallaxanec, cha'aye huo'o so lalamaxat oro, qataq lcat plata qataq so qalota lalopi shiguiỹacpi.

³Qaq chegoqchiguiña co'ollaxa ye Néguev, nache nqocheeta, choche ivitta'a ye Betel, yem hua'auchiguiñi co'ollaxa da lanataqa' maye vichiguinguilo yeua Betel qataq ye Hai.

⁴Qaq nacheye yem huaña co'ollaxa da no'oxoosheguem aso lca'atoxonaxalate, nache huaña da iỹaxanot Ñim Nataxala'.

⁵Qaq so Lot nataqa'en ỹataqta sallaxanec, 'eeta'am so ntesoqo' Abram. So Lot ỹataqta qalota aso lalo qaguetapi, huacapi, qataq qalota so nnaictague'pi somaye,

⁶qalaxaye som 'alhua maye huetra'a soomaye, saq 'amaqtaq da yaqto' lquia'aqa' so qalota shiguiỹacpi, qaq ỹoqo'oye ỹo'ot da saishet da queta da nhuoreu' soomaye,

⁷cha'aye som ilotague'pi aso lalopi so Abram deloctague' co'ollaxa som ilotague' aso lalopi so Lot. Qataq da lỹa, ye se'eso na'a'q som cananeopi, qataq so ferezeopi, ñaq netalec co'ollaxa yi'iye 'alhua.

⁸Qaq ỹoqo'oye huo'o so na'a'q, nache so Abram 'enapega so Lot, 'eeta': «'Am qataq aỹem, maiche qomi' nhuo' lashe'. Qaq ỹoqo'oye qomi' saỹaỹamaxañi da ñecotaqtega't, qataq da ncotatega't nam ilotague' ana 'arelopi, qataq nam ilotague' ana ilopi.

⁹Qaq ỹoqo'oye 'ena nam 'alhua, qaq maicheye cam 'alca'aua'a. Qaq no'on da aỹem qoca'ai. Da 'aigue da shiu', nache aỹem saigue da taguiñi. Qaq da 'aigue da taguiñi, nache aỹem saigue da shiu'.»

¹⁰Nache so Lot, ỹallelec co'ollaxa 'enauac so ca'amegue maye quetot na loigue so tala Jordán, qaq ila'a da ivira'a so nỹecpiolec ye Zoar, da se'eso ca'amegue ỹataqta qalota na 'etaxat, 'eeta'am da lyac ca no'on nanaxanaqa'. Qataq 'eeta'am ye 'alhua Egipto. Qaq 'era da 'eetec da lyac se'eso 'alhua, co'ollaq Ñim Nataxala' saxanaxa da ilaxachigui som huaqta'a't nỹecpi ye Sodoma qataq ye Gomorra.

¹¹Qaq huaña nache so Lot, lca'ateua'a 'enauac so loigue so tala Jordán, nache chegoqchiguiña yem hueta'a da taigue dam nala' lliguisheguem. Qaq 'era da 'eetec so Abram, qataq so Lot co'ollaq nlagaxa't.

¹²Qaq so Abram, nache no'onalec co'ollaxa ye 'alhua Canaán, qaq so Lot qalaq nqo'ona da yaqto' naña, som huaqta'a't nỹecpi maye nangui so ca'amegue, som sa qaỹapeque so huaqta'a't nỹecpi ye Sodoma

¹³yem hueta'a som shiỹaxauapi maye 'enauac da qauemaicpi, qataq ỹo'ottac nam ỹataqta qauem 'onataxacpi, maye ỹataqta deqaiga Ñim Nataxala'.

¹⁴Qaq co'ollaq mashe jec so Lot, nache Ñim Nataxala', 'enapega so Abram, 'eeta': «Abram, ñaq 'anamatashiguem, nache 'aulo'ogue da sheu', da taguiñi, da nala' lliguisheguem, qataq da nala' lliguiñi,

¹⁵cha'aye Aỹem, 'am sanem qome 'enauac na 'alhua maye 'aulotalec, qaq nache 'eetai' qome da 'aralamaxat, qataq ca 'am chegoxoguetpi qome.

¹⁶Aỹem so'ot qome da ỹataqta qalota camayepi, 'eeta'am na lsoche na 'alhua. Qaq da 'eetec da saishet da qanaloqten na lsoche na 'alhua, qaq nache 'eetec qome da saishet da qanaloqten ca 'am chegoxoguetpi.

¹⁷Ñaq qoñishiguem, nache 'aucoleelec ne'ena 'alhua, nache 'avira'a qome yem loga't dam lalogaxa, qataq ye lcateueegue namaye, cha'aye Aỹem, 'am sanem qome.»

¹⁸Qaq huaña nache so Abram nqat so lpe'l, nache jec da naña yem saqaỹapeque so huaqta'a't nỹecpi ye Hebrón, yem huaña aso qo'oipaqpi le'enaxat encina, maye lalamaxat som ỹale le'enaxat Mamre. Qaq huaña yemaye nache no'oxoosheguem aso lca'atoxonaxalate da yaqto' ỹo'oxoren Ñim Nataxala'.