Read Batak Toba Génesis 17 Bible Online

Génesis 17 - Batak Toba bible

Génesis 17

¹Qaq so Abram mashe ivi' co'ollaxa soua noventa y nueve vi'iye da nachaalataxac, co'ollaq Ñim Nataxala' nachaxana somaye, nache 'enapega, 'eeta': «Aỹem, nachaỹem Ỹo'onatac 'Enauacna, maye Qaica ca Seqalanapec, saisheto' qome da 'aushepaxanaqchet da 'anachaalataxac da aỹem qoueto'ot,

²qaq Aỹem so'ot qome ca ñaỹamaxataxac da 'am ñaỹamaxate': so'ot qome da ỹataqta qalota cam 'am chegoxoguetpi.»

³Qaq huaña, nache so Abram ỹa'alyiñi naua l-llecte, nache iviraxata'aguet na latap na 'alhua, qaq Ñim Lo'onatac 'Enauacna, nache queto'ot da detaqtacot somaye, 'eeta':

⁴«Qaq 'era da ñaỹamaxataxac da 'am ñaỹamaxate', 'eeta': 'Am, nache 'am qome da 'am lta'a ca ỹataqta qalota ỹotta'a't shiỹaxauapi,

⁵ỹoqo'oye saishet qome da queta da 'are'enaxat Abram, nagui nache chegoqchiguiña da 'are'enaxat da Abraham, cha'aye 'am sanem da 'am lta'a qome cam qalota ỹotta'a't shiỹaxauapi.

⁶Aỹem so'ot qome da ỹataqta qalota ca 'am chegoxoguetpi, qataq nache 'am chegoqchigui ca nta'alpi, qataq ca ỹotta'a't shiỹaxauapi.

⁷Da ñaỹamaxataxac maye so'ot da 'am ñaỹamaxate', qataq cam 'am chegoxoguetpi, damaye saishet qome da imeuo. Qaq Aỹem nache Aỹem 'anatamnaxala' qome, qataq cam 'am chegoxoguetpi.

⁸Qaq 'am qataq cam 'am chegoxoguetpi, sanem qome 'enauac na 'alhua Canaán, nam qonetaña nagui, da chochaq tatec da lalamaxat qome camayepi, qaq Aỹem nachaỹem natamnaxala' qome camayepi.»

⁹Qaq nataqa'en Ñim Lo'onatac 'Enauacna 'enapega so Abraham, 'eeta': «Qaq ỹataqta 'aupaqueelec qome da ñaỹamaxataxac, 'am qataq 'enauac ca 'am chegoxoguetpi.

¹⁰Qaq 'era da so'ot ñaỹamaxataxac da 'am ñaỹamaxate', qaq damaye iuen da ipaqueelec nataqa'en cam 'am chegoxoguetpi, qaq 'enauac qome ca ỹalleppi da qoñiita iuen da qaỹauo'o ca na'anaxat na lo'oc.

¹¹Qaq ỹoqo'oye ñi 'oonolec da qoñiita iuen da qaicheguec na lqaic lo'oc ñi logoxoshet, qaq damaye nachera da la'anaxat da ñaỹamaxataxac da qami' ñaỹamaxatto.

¹²Qaq nagui nache chegoqchiguiña da 'enauac na ỹalleppi da qoñiita, iuen da qaỹauo'o ca na'anaxat na lo'oc da ivi' caua ocho na'axa'te da ñiguiñi, cam lañoqo' ca nma', qataq ca camachaqca nsheenaxanaxat maye chegoqo'ot cam chegaqauec, na'aictaxa da saishet da qami' chegoxogueta.

¹³Qaq ñi 'oonolec camayepi iuen da qaipaqueelec da qaỹauo'o ca na'anaxat na lo'oc, yaqto' dam chochaq tatec ñaỹamaxataxac nache huetalec qome da qaro'ocỹaxaqui.

¹⁴Qalaxaye cam saishet da qaỹauo'o ca na'anaxat na lo'oc, nache camaye iuen da qaỹamaqauec qome, cha'aye qaica ca 'enec naqa'en da ñaỹamaxataxac.»

¹⁵Qaq nataqa'en Ñim Lo'onatac 'Enauacna, 'enapega so Abraham, 'eeta': «Añi 'arhua Saraí, saishet qome da nache 'eetai' de'era le'enaxat. Cha'aye nagui nache chegoqchiguiña da, añimaye le'enaxat Sara.

¹⁶Añimaye saalec qome da ichoxonnataxanaxa, qaq chegoqchigui qome añimaye da 'am sanem ca 'aỹa'alec. Aja', Aỹem saalec qome da ichoxonnataxanaxa. Qaq añimaye, nache late'e qome cam qalota ỹotta'a't shiỹaxauapi, qaq ca chegoxoguetpi nacheca qome cam chegaqaigui ca lta'alpi nam nhuo' le'ecpi.»

¹⁷Nache so Abraham, ỹa'alyiñi naua l-llecte nache iviraxata'aguet na latap na 'alhua, nache daỹalliguiye ye lhuennataxac, nache 'eeta': «¿Isheto' peta'a da huo'o ca llalec ca shiỹaxaua da mashe ivi' caua cien vi'iye da nachaalataxac? ¿Isheto' peta'a da huo'o ca llalec añi Sara, nagui da mashe ivi' naua noventa vi'iye da nachaalataxac?»

¹⁸Qaq huaña nache so Abraham, 'enapega Ñim Lo'onatac 'Enauacna, 'eeta': «¡'Onaxaictoxo' da nacheñi ñi Ismael ñim talec qome da 'archoxonnataxanaxa!»

¹⁹Nache Ñim Lo'onatac 'Enauacna ỹasateguet somaye, 'eeta': «Qalaxaye aỹem mashe shenapec da añi 'arhua Sara huo'o qome ca llalec, qaq camaye 'aỹa'anagui qome da le'enaxat Isaac. Qaq camaye, qataq cam chegoxoguetpi, nache chegoqchigui qome dam llapaxañi ñaỹamaxataxac maye chochaq tatec.

²⁰Qaq nataqa'en mashe 'am sa'aqtega da 'auquicteguelec ñi Ismael, qaq ñimaye nataqa'en saalec qome da ichoxonnataxanaxa, qaq so'ot qome da qalota ca llalaqpi, qataq nquictauec qome cam chegoxoguetpi. Qaq ñi Ismael, nacheñi qome ñi lta'a caua doce nataxala'ate maye 'amaqtaqaiqa, qataq so'ot da nache chegoqchigui qome ñimaye ca qalota shiỹaxauapi.

²¹Qalaxaye dam ñaỹamaxataxac nache 'eetai' qome da huetalec ca Isaac, cam llalec añi Sara maye ñiguiñi qom inoxonec na 'oonolec vi'i.

²²Qaq Ñim Lo'onatac 'Enauacna co'ollaq ime da detaqtague' so Abraham, nache ca'ai ye hueta'a somaye.

²³Qaq nacheso se'eso na'a'q, da so Abraham ỹauo'o so na'anaxat na lo'oc so llalec Ismael, qaq nataqa'en ỹauo'o so na'anaxat na lo'oc 'enauac so l-latacpi maye lañoqo' so lma', qataq som lsheenaxanaxatpi somaye. Qataq 'enauac so ỹalleppi maye netaña so lma' qataq do'onataxaatacot, nataqa'en ỹauo'o so la'anaxat na lo'oc, nache ipacchigui dam ỹamaxalec co'ollaxa Ñim Lo'onatac 'Enauacna.

²⁴Qaq so Abraham, qalaq mashe ivi' co'ollaxa soua noventa y nueve vi'iye da nachaalataxac, co'ollaq qaỹauo'o so na'anaxat na lo'oc,

²⁵qaq so llalec Ismael, qalaq mashe ivi' soua trece vi'iye da nachaalataxac, co'ollaq qaỹauo'o so na'anaxat na lo'oc.

²⁶Qaq so Abraham qataq so llalec Ismael, nache huaigui se'eso na'a'q da qaỹauo'o so na'anaxat na lo'oc,

²⁷qataq nataqa'en 'enauac so ỹalleppi maye netaña so lma', qataq so lañoqo' so lma', qataq som lsheenaxanaxatpi maye ỹachegoxoto'ot som chegaqauecpi.»