Read Batak Toba Génesis 24 Bible Online

Génesis 24 - Batak Toba bible

Génesis 24

¹So Abraham, mashe ỹataqta ỹa'axaiquiolec co'ollaxa, qaq Ñim Nataxala', ỹanem co'ollaxa somaye da lta'araic lchoxonnataxanaxa.

²Qaq huo'o so na'a'q, nache iỹaxaneuga so ỹataqta ỹa'axaiquiolec som lamaxashecpi, som ilotague' 'enauac so lalamaxatpi somaye, nache 'enapega, 'eeta': «'Auacho'ot na 'arhuaq na itele'eta,

³nache 'aỹa'anot ca 'ara'aqtac Ñim Nataxala' maye lo'onatac na piguem qataq ana 'alhua, da yaqto' saishet da 'auashenem ñi ỹalec Isaac, da huaroneguet aca 'alo maye lma' na 'alhua Canaán, maye soota'a nagui,

⁴nacherata da 'anqo'ona qome yem ña'alhua, nache 'alca'aique aca lhua ñimaye, 'auachegoxotaigui yem 'alpi maye maiche ihuo' lashepi.»

⁵Nache so namaxashec, 'enapeco': «Qaq da saishet da aỹem nca'ategue aca 'alo, ¿qaq hua'ague ca sheetec? Qaq ¿peta'a iuen da sauec ñi 'aỹa'alec da nqo'ona yem 'alhua maye 'auachegoqchiguiña co'ollaxa?»

⁶Nache so Abraham, 'enapeco': «¡'A'i, saishet qome da 'auauec ñi ỹalec!

⁷Cha'aye, Ñim Nataxala' maye neto'ot na piguem, ñim aỹem nqateeguesop co'ollaxa ye lma' so ita'a, qataq ye na'alhua yem ihuo' le'ecpi, qataq aỹem ỹachaxanapeguem ne'ena 'alhua da lma' naqa'en ca aỹem chegoxoguetpi, Ñimaye nataqa'en ỹamaq qome, da ỹa'auaxanegue da 'ata'ague ca lamaxashec piguem le'ec, da yaqto' 'auachegoxota'a yemaye da 'anauec aca lhua ñi ỹalec.

⁸Qaq aca 'alo, da saishet da 'am nca'ategue, nache qaica ca 'arasouaxashet da saipaigui dam 'aỹa'an 'ara'aqtac. Qalaxaye, ¡saishet qome da 'auaueegue de'era ñi ỹalec!»

⁹Qaq huaña, nache so namaxashec ỹacho'ot na lhuaq so ltele'eta so na'aco' Abraham, nache ỹan da la'aqtac, da ỹo'ot dam iỹaxanaique so na'aco'.

¹⁰Qaq ime, nache ỹaconeua'alo soua diez aso cameellopi maye lalamaqte so na'aco', nache jec, qaq ỹache 'enauac som ỹataqta no'on nachetaqtaxanaxatpi maye chegoqo'ot so na'aco'. Qaq co'ollaq ivita ye Najor, maye huaigui ye 'alhua Mesopotamia,

¹¹nache nmataxaarec soua cameello, huaña som pa'auec so huaqta'a't nỹecpi, maye saqaỹapeque aso nshere maye huo'o na le'ec 'etaxat. Qaq nacheso som laloqo', da som qa'ampiolec taxaama aso ñi'illoxoqui da ilaique 'etaxat.

¹²Qaq huaña yemaye, nache so namaxashec nqouagaxauen, 'eeta': «'Am Nataxala', maye 'Am Natamnaxala' ñi ña'aco' Abraham, aỹem 'aỹa'anem na na'a'q, da no'oitegue da ỹecỹaxac, qataq 'auachaxana da 'arauotaxanaqtaic ñi ña'aco'.

¹³Aỹem, soua'a ne'ena loigue ana nshere maye ñi'illoxoqui, nagui da nam qa'ampiolec maye lma' ne'ena, anac da ñe'eguenaxaama na 'etaxat.

¹⁴Qaq 'onaxaic qome da aỹem 'auasheetem aca qa'añole, acam shenapega, sheeta': ‹Ñaq aỹem 'arqouaguec, 'anqaañi ana 'araco'oña 'alhua da yaqto' ñeỹomgui,› qataq aỹem ỹasateguet qome acamaye, 'eeta': ‹Aja', 'anỹom, qataq nataqa'en sanem ca laquip 'etaxat naua 'arelo cameello,› qaq no'on da nachaca qome aca 'arca'aguishe da yaqto' lhua ñi 'aramaxashec Isaac. Qaq huaña qome, nache ỹataqta 'eesa ñaqa'en da talec da 'arauotaxanaqtaic ñi ña'aco'.»

¹⁵Qaq ñaq saxanaxa co'ollaxa da imat da nqouagaxaunaxac, nache ila'aguet aso qaño'ole, ỹaatalec na lallac aso laco'oña 'alhua. Qaq asomaye nachaso aso Rebeca maye llale so Betuel, qaq so Betuel nacheso so llalec aso Milca qataq so Najor maye lqaỹa so Abraham.

¹⁶Qaq aso Rebeca asomaye ỹataqta 'onaxai, qataq ñaq qa'añole, saxanaxa da huo'o ca ỹale da ipotapegueua'a asomaye. Qaq asomaye huenongui aso nshere, nache iỹoxogui aso laco'oña 'alhua, qaq co'ollaq mashe ỹe'eguelaxata,

¹⁷nache so namaxashec nqalgaqa'ague asomaye, nache 'enapega, 'eeta': «Ñaq aỹem 'anqouaguec da ñeỹomgui ca laỹe na 'etaxat maye huetagui ana 'araco'oña 'alhua.»

¹⁸Nache aso qa'añole, 'enapec: «Aja', 'anỹom, 'am ỹataxala'.» Nache saqaỹaloq da nqaañi aso laco'oña 'alhua, nache nasoqtañi aso laco'oña da nỹomaxan somaye.

¹⁹Qaq co'ollaq ime da nỹomaxac so namaxashec, nache aso Rebeca, 'enapec: «Nataqa'en ñaqatsheguem ca laquip yeua 'arelo cameello, yaqto' nataqa'en nỹo'm qataq nmeta na laquip.»

²⁰Nache saqaỹaloq da iqui'itaxachigui aso laco'oña da icoyingui aso nỹomaxaqui na shiguiỹac, nache nqalgoqtac ỹe'eguelaqtapigui da ỹe'egueetegaxaama so 'etaxat maye huetagui aso nshere, nache ivitta'a da 'enauaque da nỹomaxa'n soua cameello.

²¹Qaq so namaxashec nache ilotagui asomaye, qalaxaye qaica ca la'aqtac, cha'aye somaye ỹauotaique da ỹaỹaten da 'eesa da nacheñi Ñim Nataxala' da ỹanem da no'on da llecỹaxac.

²²Qaq co'ollaq ime da nỹomaxa'c soua cameello, nache so namaxashec nqatsheguem aso chiguishaqte maye ivi' seis gramos, nache ỹanagui na lmic asomaye. Qaq nataqa'en ỹanema soua dos nhuaxa'she oro maye napactelec ye cien gramos ye lsallaqa',

²³nache 'enapega asomaye, 'eeta': «Ñaq aỹem 'arqouaguec da aỹem 'aua'aqtaxanem, chaq negue't ca 'am llale, qataq da huo'o ca ndaqa' ca lma' ca 'arta'a, da yaqto' aỹem, qataq naua ñale't ishet da qanmataqa' ne'ena pe.»

²⁴Nache asomaye ỹasat, 'eeta': «Aỹem llale ñi Betuel, ñim llalec aso Milca qataq so Najor.

²⁵Ye qarma' huo'o ye ndaqa', qaq 'am ishet da 'anmataqa' na pe, nataqa'en huo'o na 'auaqpi, qataq na aloq naua cameello.»

²⁶Nache so namaxashec ỹa'alyiñi naua l-llecte da ỹo'oxoren Ñim Nataxala',

²⁷nache 'eeta': «¡Ỹataqta qaỹo'oxoren qome Ñim Nataxala', Ñim Natamnaxala' ñi ña'aco' Abraham, cha'aye ipacchigui da la'aqtac, qataq ỹasaxalec da lauotaxanaqtaic ñi ña'aco', qataq aỹem nauecteuga na nqa'aic maye naỹa'a na lma' na lauo' le'ecpi ñimaye!»

²⁸Qaq aso Rebeca jec, nqalgoqtaua'a so lma' aso late'e da da'aqtaxanem 'enauac de'era huaigui.

²⁹Qaq asomaye huo'o so lqaỹa le'enaxat Labán. Qaq somaye jec, nqalgoqtaxaama aso nshere da ỹe'eguenaxaama se'eso ỹale,

³⁰cha'aye souaxat da ila'a aso chiguishaqte, qataq soua nhuaxa'she maye netaguilo naua lhua'q aso lqaỹa, qataq hua'aqtega co'ollaq asomaye ỹa'axattac da la'aqtac se'eso ỹale. Nache so Labán nqo'onaxaama so lamaxashec so Abraham, cha'aye somaye qataq soua lalo cameello, ñaq huetraxaama aso nshere,

³¹nache 'enapega, 'eeta': «'Aỹala, 'auanac, 'am lchoxonnatac Ñim Nataxala'. ¡Ta'ainco' taxa da nache qoueta'a ne'ena pa'auec, ye mashe saqataxanai' ye 'arma', qataq ye lma' naua 'arelo cameello!»

³²Qaq huaña, nache so namaxashec taua'a so nma'. Qaq huaña yemaye, nache so Labán nqaañi so lla'ac soua cameello qataq iquia'axa'n. Qaq ime, nache ndouga so 'etaxat so namaxashec, qataq soua nnaictagueto da yaqto' iỹoi' naua lapia'ate.

³³Qaq co'ollaq mashe huotaique iquia'axa'n, nache so lamaxashec so Abraham, 'enapeco': «Aỹem saishet da seque'e, da ñaq saxanaxa da sa'axat, da ỹa'aqtaxanaxac maye sauotaique da sa'axat.» Nache so Labán, 'enapeco': «Hua', 'aua'aqtaxan.»

³⁴Nache so namaxashec, 'enapec: «Aỹem nachaỹem lamaxashec ca Abraham.

³⁵Ñim Nataxala' ỹataqta qalota da lchoxonnataxanaxa ñi ña'aco', nache ỹo'ot da sallaxanec naqa'en ñimaye, ỹanem ana qaguetapi, huacapi, oro qataq plata, qataq na lamaxashecpi, qataq ana lamaxashepi 'alpi, qataq cameellopi qataq 'ashenapi.

³⁶Qataq nataqa'en aso lhua Sara, ỹauo'o so llalec co'ollaq mashe ỹa'axaino'ole, qaq ñim ña'aco', nagui ỹanem 'enauac da lsallaxa ñi llalec.

³⁷Qaq ñi ña'aco' aỹem ỹamaxalec da sanot ñimaye da ỹa'aqtac, nache aỹem 'enapega, 'eeta': Saishet qome da 'auasheneguet ñi ỹalec da huaroneguet aca 'alo maye lma' na Canaán maye soota'a nagui,

³⁸maye nacherata da 'anqo'ona ye lauo' le'ecpi so ita'a, nache 'auachegoxotaigui yem 'alpi maye ihuo' lashepi aca lhua ñimaye.

³⁹Qaq aỹem shenapega, sheeta': 'Am ña'aco', ¿qaq aca 'alo da huo'otaq saishet da aỹem nca'ategue?

⁴⁰Qaq somaye aỹem ỹasateguet, 'eeta': Aỹem shectague' da nqa'aicỹaxac Ñim Nataxala', qaq Ñimaye ỹamaq qome ca lamaxashec piguem le'ec da 'am nnaictague', yaqto' qaica ca da dam 'icỹaxac, nache 'auachegoxotaigui qome aca lhua ñi ỹalec, yem ihuo' lashepi maye llalpi so ita'a.

⁴¹Qaq nacherata da huo'otaq, ye ihuo' le'ecpi saishet da 'am ỹanem aca qaño'ole, nache qaica ca 'arasouaxashet, da saipaigui dam 'ara'aqtac maye aỹem 'aỹa'anem.

⁴²Qaq quiye can ñevita añi nshere, nache ñeqouagaxaunot Ñim Nataxala', sheeta': 'Am Nataxala', maye 'am Natamnaxala' ñi ña'aco' Abraham, da ỹoqta 'eesa da qaica 'anqa'en camachaqca de'era ỹecỹaxac,

⁴³qaq 'am ñachoxonnot nagui da soota'a ana'ana nshere, da ipacchigui qome de'era: Da aca qa'añole maye ñe'eguenaxaama na 'etaxat, acam shenapega, sheeta': Ñaq aỹem 'arqouaguec qome da aỹem 'auasheetem da ñeỹomgui ca laỹe na 'etaxat maye huetagui ana 'araco'oña 'alhua,

⁴⁴qaq acamaye da aỹem ỹasateguet qome da 'eeta': Aja' 'anỹom, qataq nataqa'en ñaqatsheguem qome ca 'etaxat da yaqto' nỹo'm naua 'arelo cameello, qaq nachaca qome aca 'arca'aguishe, 'am Nataxala', da yaqto' lhua ñi llalec ñi ña'aco'.

⁴⁵Qaq so saxanaxa da semat da ñeqouagaxaunaxac, nache sela'aguet añi Rebeca ỹachetalec na lallac aso laco'oña 'alhua. Nache so huenongui añi nshere da nqatsheguem so 'etaxat, nache shenapega, sheeta': Ñaq aỹem 'arqouaguec qome da 'auauo'o ca ỹaquip.

⁴⁶Nache añimaye saqaỹaloq da nqaañi aso laco'oña, nache aỹem 'enapega, 'eeta': Aja', 'anỹom, qaq nataqa'en sauo'o qome ca laquip yeua 'arelo cameello. Nache añimaye aỹem ỹanem so ỹaquip, qataq nataqa'en yeua ilo cameello.

⁴⁷Qaq ime, nache senat añimaye, sheeta': ¿Chaq negue't ca 'am llale? Nache añimaye aỹem ỹasateguet, 'eeta': Qomye aỹem llale so Betuel, som llalec so Najor qataq aso Milca. Qaq huaña, nache sanagui na lmic añimaye aso chiguishaqte, qataq sanaguilo naua lhua'q soua dos nhuaxa'she,

⁴⁸qaq ime, nache sa'aroto naua illecte Ñim Nataxala' da ñeqouagaxauen, sho'oxoren Ñim Nataxala', Ñim Natamnaxala' ñi ña'aco' Abraham, cha'aye souaxat da aỹem nauecteuga na nqa'aic, maye nalemaqchigui na 'arma', da yaqto' saconeua'a añim llale ñi maiche lauo' le'ec ñimaye, da yaqto' lhua ñim llalec.

⁴⁹Qaq ỹoqo'oye nagui, ishet da aỹem qaua'aqtaxañim da qauchoxoyiñi, qataq da qami' 'eesora da qauchoxoyiñi ñi ña'aco'. Qaq da saishet, nache aỹem qaua'aqtaxañim nataqa'en, yaqto' aỹem saỹaten negue't cam so'ot.»

⁵⁰Qaq huaña, nache so Labán qataq so Betuel, ỹasatreguet somaye, 'eeta': «'Enauac de'era 'aua'axattac chegoqtot Ñim Nataxala', qaq qomi' sa seshetaq da shenaqta', aja', huo'otaq da saishet.

⁵¹Qaq 'ara, aram Rebeca, 'auauec qome aramaye. Qaq nachara qome ara lhua ca llalec cam 'ana'aco', qaq nache ipacchigui qome da la'aqtac Ñim Nataxala'.»

⁵²Qaq so lamaxashec so Abraham, co'ollaq hua'axaỹa de'era na'aqtac, nache ỹa'aroto naua l-llecte Ñim Nataxala', nache iviraxata'aguet na latap na 'alhua.

⁵³Qaq ime, nache nqatsheguem so ỹotta'a't nogoxoshetpi, plata, oro, qataq aso npotopi, nache ỹanem aso Rebeca. Qaq nataqa'en ỹauo'o so nme, so lqaỹa qataq aso late'e asomaye.

⁵⁴Qaq co'ollaq ime de'era, nache somaye, qataq soua nnaictagueto, cheta'ague da deque'e' qataq nỹo'm, qataq nache huera'a se'eso nma' se'eso pe. Qaq so lỹa na'a'q co'ollaq ñiyishegue'm, nache so namaxashec, 'enapeco': «Ñaq aỹem qauashiñiita da she'eguelaxague da lma' ca ña'aco'.»

⁵⁵Qalaxaye so lqaỹa, qataq aso late'e aso Rebeca, 'ena'apo': «'A'i, ara qa'añole ñaq cara'acolec qome da qomi' naiguilo, nato' qom inoxoorec caua diez na'axa'te, nache ishet da 'am ca'ategue.»

⁵⁶Qalaxaye so namaxashec, 'enapeco': «'A'i, saishet qome da aỹem qanlliitañi. Ñim Lo'onatac 'Enauacna, mashe aỹem ỹanem da qaica camachaqca da ỹecỹaxac, qaq ỹoqo'oye no'on da aỹem qauashiñiitem da she'eguelaxague da lma' ca ña'aco'.»

⁵⁷Nache soomaye 'ena'apo': «Ña seỹaxanaxaua'a acam qa'añole, chaq 'eetec ca la'aqtac.»

⁵⁸Nache qaiỹaxaneua'a aso Rebeca, nache qainat, qoỹeeta': «¿Peta'a 'aushet da 'auca'ategue de'era ỹale?» Nache asomaye 'enapeco': «Aja'.»

⁵⁹Qaq huaña, nache qaỹasheeta aso Rebeca da jec, nache nnaicapegue' qanqa'en aso 'alo, maye nache 'eetai' naxa da huetague' asomaye, qataq nache lỹatac so lamaxashec so Abraham, qataq soua lỹa't somaye.

⁶⁰Nache qoỹaalec so no'on na'aqtac aso Rebeca, maye 'eeta': «'Am qarqaỹole, ¡nache'am qome, da 'am late'e ca ỹataqta qalota shiỹaxauapi! ¡Cam 'am chegoxoguetpi qalaq loxonec qome cam huaqta'a't nỹecpi maye lalamaxat ca npa'aguenaxauapi!»

⁶¹Qaq huaña nache aso Rebeca, qataq soua lamaxashel, huenoorelec soua cameello, nache ca'atregue so lamaxashec so Abraham. Qaq 'era da 'eetec so namaxashec co'ollaq ỹaconeua'a aso Rebeca, ime nache ca'ai yemaye.

⁶²Qaq so Isaac, maye netaña ye 'alhua le'enaxat Néguev, somaye mashe ñe'eguelaxauo co'ollaxa, chegaqaama aso nshere maye le'enaxat: «Ñim nca'altauec, qataq aỹem ila'a.»

⁶³Somaye co'ollaq mashe avit, nache inoxonec da choche coleetac. Qaq co'ollaq namatasheguem, nache ila'agueta soua cameello maye mashe nayeetrauo.

⁶⁴Qaq aso Rebeca, nataqa'en namatasheguem co'ollaxa. Qaq co'ollaq ila'aguet so Isaac, nache huenoteeguesop aso cameello,

⁶⁵nache inat so namaxashec, 'eeta': «¿Negue't ne'ena ỹale, nam nactalec na no'onaxa maye qomi' naỹa'alo?» Nache so namaxashec, 'enapeco': «Qomye nachena na ña'aco'.» Qaq huaña nache asomaye ỹacona so lqaic lapo', nache ỹapolec na lashec.

⁶⁶Nache som namaxashec da'aqtaxaatapeguem so Isaac, 'enauac nam ỹo'otpi somaye, de'era llecỹaxac.

⁶⁷Qaq ime, nache so Isaac, ỹauegueua'a aso Rebeca, so lpe'l aso late'e Sara, qaq nache huaroneguet asomaye. Qaq so Isaac ỹataqta ỹauotec aso Rebeca. Qaq huaña, nache huesogui da laquicoxo so Isaac, souaxato' da l-leuaxa aso late'e.