Read Batak Toba Génesis 25 Bible Online

Génesis 25 - Batak Toba bible

Génesis 25

¹Qaq so Abraham, qaltaq huo'o aso dalaxai lhua le'enaxat Cetura.

²Qaq asomaye huo'oi soua llalqa: Zimram, Jocsán, Medán, Madián, Isbac qataq Súaj.

³Qaq so Jocsán, nacheso so lta'a so Sebá qataq Dedán. Qaq som chegoxoguetpi so Dedán, nacheso so asureopi, qataq letuseopi, qataq leumeopi.

⁴Qaq soua llalqa so Madián: Efa, Efer, Janoc, Abidá qataq Eldá. Qaq 'enauac se'esopi da chegoxoguet aso Cetura.

⁵Qaq so Abraham ỹanem co'ollaxa so Isaac, 'enauac som lalamaxatpi somaye.

⁶Qaq so llalaqpi asom ỹaqauga lhuapi so Abraham, qalaq nacherata da ỹauo'o so nme ñi 'oonolec somayepi. Qaq co'ollaq ña nca'altauec so Abraham, nache se'eso llalaqpi ca'ai naqa'en so Isaac, nache ỹamaxa ye 'alhua maye pa'aigue da nala' lliguisheguem.

⁷Qaq so Abraham ivi' co'ollaxa soua ciento setenta y cinco vi'iye da nachaalataxac,

⁸qaq somaye choche ilem da lqueroxo, co'ollaq mashe ỹataqta ỹa'axaiquiolec. Qaq huaña, nache ỹalegoigui som hua'au lta'alpi.

⁹Nache soua llalqa Isaac qataq Ismael, ỹacheraigui so auac maye huachiqui, som naña ye Macpela, maye pa'aigue da nala' lliguisheguem ye na'alhua so Mamre maye huaigui yem na'alhua so Efrón, som llalec so Sojar maye hitiita.

¹⁰Qaq se'eso 'alhua lalamaxat co'ollaxa so hitiitapi, qalaxaye desheenaxana co'ollaxa so Abraham. Qaq nacheso som qailareña so Abraham, huaqta'ai' qanqa'en aso lhua Sara.

¹¹Qaq co'ollaq mashe ileu so Abraham, nache Ñim Lo'onatac 'Enauacna, ỹaalec da lchoxonnataxanaxa so Isaac, maye naña co'ollaxa yem sa qaỹapeque aso nshere maye le'enaxat «Ñim nca'altauec qataq aỹem ila'a.»

¹²Qaq 'esoua soua llalqa so Ismael som llalec so Abraham, qataq aso Agar, asom Egipto lashe maye l-lata aso Sara.

¹³Qaq 'enaua naua le'enaqa'ate soua llalqa so Ismael, da naneraguec chegoqchiguiña qanqa'en so ỹe llalec: Nebayot, Cedar, Adbel, Mibsán,

¹⁴Misma, Duma, Massa,

¹⁵Hadar, Tema, Jetur, Nafis qataq so Quedemá.

¹⁶Qaq 'enaua naua le'enaqa'ate soua doce llalqa so Ismael. Qaq nachenaua ne'enaua le'enaqa'ate soomaye da chegoqchigui da qaỹaỹaten na lalamaxat 'alhuapi, qataq naua lanataqa'ate. Qaq ñi 'oonolec soomaye, nache lataxala' na maiche lauo' le'ecpi.

¹⁷Qaq so Ismael ivi' soua ciento treinta y siete vi'iye da nachaalataxac co'ollaq ileu, nache jec, da ỹalegoigui so hua'au lta'alpi.

¹⁸Qaq soua chegoxogueta somaye, qalaq nache naña yem 'alhua maye vichiguinguilo yeua Javilá qataq ye Shur, yem nalotta ye Egipto da qaỹachegaqa'a ye Asiria. Qaq nache neraña yemaye, na'aictaxa da so lqaỹañecpi saiuoonegueta soomaye.

¹⁹Qaq 'era da 'eetec da na'aqtaguec so Isaac, som llalec so Abraham.

²⁰Qaq so Isaac mashe ivi' co'ollaxa soua cuarenta vi'iye, co'ollaq huaroneguet aso Rebeca, asom llale so Betuel, qataq lqaỹa so Labán som arameo maye netaña co'ollaxa ye Padán Aram.

²¹Qaq aso Rebeca, saishet co'ollaxa da huo'o ca llalec, qaq ỹoqo'oye so Isaac nqouagaxaunot Ñim Nataxala', da nqouagaxaueelec asomaye. Qaq Ñim Nataxala' hua'axaỹa co'ollaxa da nqouagaxaunaxac somaye, nache aso Rebeca hualaxai.

²²Qalaxaye soua llalqa, deloctega't co'ollaq ñaq huetraigui na lauel aso late'e'. Nache asomaye 'enapeco': «Da nache 'eeta'ac de'era, ¡qaq shaco' da nache queta da ñeca'altauec!» Qaq huaña, nache jec da inat Ñim Nataxala',

²³qaq Ñimaye ỹasateguet asomaye, 'eeta': «Na 'arhuel huetaiguilo yeua dos, maye chegaqaiguilo qome ca ỹotta'a't shiỹaxauapi, qataq dos nhuo' lashe' deloctega't da ñaq taỹa'a da ñiyiñi. Qaq ye 'oonolec ỹataqta 'añaxaic qome, saq 'ena'am ye lỹa da la'añaxac, qaq ye na'asa qalaq ilo'ogue qome ye ỹe.»

²⁴Qaq co'ollaq ivita so laloqo' da deco'o aso Rebeca, nache huayaye soua llalqa.

²⁵Qaq so hua'auñi da ñiguiñi, qalaq tocalec ana laso, qataq 'enauac na lo'oc da huo'o ana laso, qaq somaye qoỹanagui da le'enaxat Esaú.

²⁶Qaq ime, qaltaq ñiguiñi so lqaỹa, qaq somaye ỹacootagui ana lla'axa so Esaú, qaq ỹoqo'oye qoỹanagui da le'enaxat Jacob. Qaq so Isaac mashe ivi' co'ollaxa soua sesenta vi'iye da nachaalataxac, co'ollaq deco'o aso Rebeca.

²⁷Qaq se'esoua nogotolqa nquictrasheguem da lañaxataxa'c. Qaq so Esaú qalaq ỹataqta nqopita da netalec na no'onaxa, nache ivitta'a da ỹataqta ỹaỹaten da ñi'ipiaxac. Qaq so Jacob qalaxaye qaica ca taigue, nacherata da nqopita da hueta'a so nanataqa'.

²⁸Qaq so Isaac ỹataqta lauotaxat co'ollaxa so Esaú, souaxat da chectac naxa na ne'epet somaye. Qaq aso Rebeca, qalaq ỹataqta lauotaxat so Jacob.

²⁹Qaq huo'o so na'a'q, co'ollaq deuoistac so Jacob, nache nvireuo so Esaú chegaqauga so no'onaxa, ỹataqta nasamñi.

³⁰Nache 'enapego' so Jacob, 'eeta': «Ñaq aỹem 'arqouaguec da aỹem 'aỹa'anem, catai' saq 'amaqtaq laỹolec de'era 'arhuoshec togaxaraic maye deqaqchigui, cha'aye aỹem huotaique da selem na ỹoqouaxa.» Qaq ỹoqo'oye so Esaú, qaỹaỹaten nataqa'en da le'enaxat da Edom.

³¹Nache so Jacob, 'enapeco': «Iuen da hua'auñi da aỹem 'aumenot da qonec da 'am na'auaxanec ñalec.»

³²Nache so Esaú 'enapeco': «¿Negue'to' ca naigui, dam 'enec da aỹem na'auaxanec ñalec, ye mashe huotaique selem na iqouaxa?»

³³Nache so Jacob, 'enapeco': «Qaq 'aỹa'an qone' ca 'ara'aqtac da aỹem 'aumenot da qonec da 'am na'auaxanec ñalec.» Nache so Esaú ỹanem somaye so la'aqtac, qaq 'era da 'eetec somaye da imenot so Jacob, dam 'enec da na'auaxanec ñalec.

³⁴Qaq huaña, nache so Jacob ỹanem so Esaú, aso nauole, qataq so lhuoshec lenteja maye deqaqchigui. Qaq so Esaú co'ollaq ime da lquia'axac, qataq da nỹomaxac, nache ñisheguem, nache jec. Qaq nache qaica ca naigui naqa'en, da 'enec da na'auaxanec ñalec.