Read Batak Toba Génesis 27 Bible Online

Génesis 27 - Batak Toba bible

Génesis 27

¹Qaq so Isaac ye mashe ỹataqta ỹa'axaiquiolec, qataq mashe sa nauaañi. Nache huo'o so na'a'q, qaq iỹaxaneuga so Esaú som llalec ỹe, nache 'enapega, 'eeta': «¡'Am ỹalcolec!» Nache so Esaú ỹasat, 'eeta': «¿Negue'tca, 'am ita'a?»

²Nache so Isaac, 'enapeco': «'Am mashe 'aumeteetac da aỹem mashe aỹem ỹa'axaiquiolec, qaq huo'o ca na'a'q nache aỹem seleu.

³Qaq ỹoqo'oye sauotaique da 'anqo'oneuga na no'onaxa, 'auache ca 'archecnec qataq caua 'archecnal, da 'aulaique ca 'ane'epet shiguiỹac.

⁴Qaq ime qome, nache 'auo'ot ca 'arhuoshec, ỹataqta ama 'anqa'en, cam ỹataqta ñaman naxa, nache aỹem 'andoua'a qome da sachec. Qaq nache huaña qome da 'am sanem da ichoxonnataxanaxa, nagui da saxanaxa da seleu.»

⁵Qalaxaye aso Rebeca na'axaỹaxaataua'a so Isaac co'ollaq 'eetega so Esaú. Qaq ỹoqo'oye somaye co'ollaq tauga na no'onaxa da ne'eplec so lta'a,

⁶nache asomaye 'enapego' so Jacob som llalec na'asa, 'eeta': «Aỹem sa'aqchigui ñi 'arta'a, da 'eetega so 'arqaỹa Esaú, 'eeta':

⁷‹Ña 'aulaique qome ca 'ane'epet shiguiỹac, nache 'auo'ot qome ca 'arhuoshec, ama 'anqa'en da yaqto' sachec qome camaye. Qaq huaña qome, nache qomi' ỹauaachiguilo Ñim Nataxala' da 'am sanem da ichoxonnataxanaxa, nagui da saxanaxa da ivita da seleu.›

⁸Qaq ỹoqo'oye, 'am ỹalcolec, ña 'ana'axaỹaxaachigui da ỹa'aqtac:

⁹'Anqo'oneuga ye hueta'a ye qana'atetpi, nache 'andoreuo caua dos quetaq llalqa maye chaxaraiqa, yaqto' so'ot ca ỹataqta ama lhuoshec ñi 'arta'a, cam ỹataqta naman ñimaye.

¹⁰Qaq 'am 'auroua'a qome ñimaye, da yaqto' chec, qataq yaqto' 'am ỹanem da lchoxonnataxanaxa, nagui da saxanaxa da ileu.»

¹¹Qalaxaye so Jacob 'enapega aso late'e, 'eeta': «So ỹaqaỹa ỹataqta qalota ana laso na lo'oc, aỹem qalaxaye qaca aca ỹaso.

¹²Qaq ñim ita'a da huo'otaq aỹem ipoteua'a, nache aỹem ỹauatton, qaq huaña qome nache ipeta'a da choche she'eetac. Nache aỹem ỹasaxalec qome ca qauem la'aqtac, qaq saishet da aỹem ỹanem ca lchoxonnataxanaxa.»

¹³Qalaxaye aso late'e 'enapeco': «'Am ỹalcolec, que'eca qauem na'aqtac no'on da aỹem talec qome. Qaq 'am 'auo'ot da 'am samaxalec, 'andoreuo que'ecaua dos quetaq llalqa.»

¹⁴Nache so Jacob jec da ỹe'eguenaugalo soua quetaq llalqa, nache ndoua'alo aso late'e. Nache asomaye ỹo'ot so ỹataqta ama lhuoshec, som ỹataqta naman naxa so Isaac.

¹⁵Qaq ime, nache asomaye nqatrec soua ỹataqta 'onaxaiqa alogo so ỹe llalec Esaú maye ỹaỹamaxatta'ape. Nache ỹanaxanaxaanguilo so Jacob som llalec na'asa.

¹⁶Qaq ime, nache ỹaxateguelo naua lhua'q somaye, soua lo'oc soua quetaq llalqa, qataq na lqosot nam huaña da qaca aca laso somaye,

¹⁷nache ỹanem somaye so lhuoshec qataq aso nauole maye ỹo'o't co'ollaxa.

¹⁸Qaq huaña, nache so Jacob taua'a so hueta'a so lta'a, nache 'enapega, 'eeta': «¡Taxare!» «Nache so Isaac 'enapeco', aja', aỹem soota'a ne'ena. ¿Negue't 'am, ỹalcolec?»

¹⁹Nache so Jacob, 'anapeco': «Qomye nachaỹem Esaú, maye aỹem 'ara'auaxanec 'aỹa'alec. Mashe ime da so'ot nam 'auỹaxanaique. Aỹem 'arqouaguec qoñisheguem, 'anso'ooñi, nache qollec na lapat som shiguiỹac maye ỹo'oxonec. Qaq ime qome nache aỹem 'aỹa'anem ca 'archoxonnataxanaxa.»

²⁰Qaq huaña nache so Isaac inat somaye, 'eeta': «¿Ca 'eeteco' da ỹataqta saqaỹaloq da 'auanata somaye 'am ỹalcolec?» Nache so Jacob 'enapeco': «Qomye Ñim Nataxala' maye 'Anatamnaxala', aỹem itauan da sanata.»

²¹Nache so Isaac, 'enapego' somaye, 'eeta': «Ñaq aỹem 'anquigueua'a, qataq aỹem 'auasheetem da 'am sepot, shapegueto' da 'eesa da nache'am ỹalec Esaú.»

²²Nache so Jacob nquigueuo, nache so lta'a ipot somaye. Qaq huaña nache so Isaac 'enapeco': «Da lavilỹaxac nachera da lavilỹaxac ca Jacob, qalaxaye naua lhua'q, qalaq 'eeta'ama naua lhuaxaye ca Esaú.»

²³Qaq saishet da ỹauatton somaye, cha'aye naua lhua'q ỹataqta qalota ana laso, 'eeta'ama naua lhua'q so lqaỹa Esaú. Qalaxaye co'ollaq mashe huotaique da ỹasaxalec da lchoxonnataxanaxa,

²⁴nache qaltaq ỹe'eguelaxalec da inat somaye, 'eeta': «¿Peta'a 'eesa da nache'am ỹalec Esaú?» Nache so Jacob, 'enapeco': «Aja', nachaỹem Esaú.»

²⁵Nache so lta'a, 'enapego' somaye, 'eeta': «Ñaq aỹem qouapegue' 'am ỹalcolec, yaqto' sachec nam 'ane'epet, qaq ime qome nache 'am sasaxalec da ichoxonnataxanaxa.» Nache so Jacob iquia'axan so lta'a, qataq iroua'a nataqa'en so lataxa. Nache so Isaac deque'e qataq nỹom,

²⁶qaq co'ollaq ime, nache 'enapega somaye, 'eeta': «Ñaq 'anquigueuo, 'am ỹalec, nache aỹem 'anapigoxoi'.»

²⁷Qaq so Jacob, co'ollaq nquigueua'a so lta'a da napigoxoi', nache so Isaac ncoỹaxanalo soua alogo. Qaq huaña nache ỹasaxalec da lchoxonnataxanaxa, 'eeta': «Aja', de'era alaitaỹaxac nacheca ca ỹalec. Damaye, 'eeta'am da alaitaỹaxac ca no'onaxa maye Ñim Nataxala' ỹasaxalec da lchoxonnataxanaxa.

²⁸Qaq Ñim Lo'onatac 'Enauacna, 'am ỹanem qome ca auot maye chegoqo'ot na piguem, qataq ca no'on alaỹaxac nam nañiguishecpi ana 'alhua, qataq 'am ỹanem qome ca saqalota trigo qataq ca lataxa.

²⁹Qataq qalota qome cam shiỹaxauapi 'am do'onataxaatacot, qataq cam ỹotta'a't shiỹaxauapi 'am ỹa'aroto qome naua l-llecte. Qataq 'aulo'ogue qome ca 'aralamaxat 'arqaỹañecpi, ¡maye 'am ỹa'aroto qome naua l-llecte! Qaq ca 'am ỹasaxalec ca qauem, qalaq talec qome cam qauem, qaq ca 'am ichoxoren, qalaq talec qome ca nchoxonnataguec.»

³⁰Qaq so Isaac, co'ollaq imat da ỹasaxalec da lchoxonnataxanaxa so Jacob, qaq co'ollaq chochaq ca'ai so lta'a so Jacob, nache nvireuo so Esaú da ne'eptac.

³¹Qaq nataqa'en somaye ỹo'ot so ỹataqta ama lhuoshec. Ime qaq iroua'a so lta'a, nache 'enapega, 'eeta': «Qoñisheguem qome 'am taxare, nache qollec nam ne'epet shiguiỹac na 'aỹa'alec. Qaq ime qome, nache aỹem 'auasaxalec ca 'archoxonnataxanaxa.»

³²Qaq huaña nache so Isaac inat somaye, 'eeta': «¿Negue't 'am?» Nache so Esaú 'enapeco': «Qomye aỹem Esaú, maye aỹem ỹe 'aỹa'alec.»

³³Nache so Isaac ỹataqta ỹe'elaq, nache iviloxo'l naua la'aqtaqa co'ollaq 'enapec: «Qaq ¿negue'to' qone' som ne'epe co'ollaxa, som aỹem ndoua'a so lhuoshec? Qaq aỹem mashe ime dam iquia'axac, co'ollaq saxanaxa da 'anvireuo, qataq mashe sasaxalec somaye so ichoxonnataxanaxa, qaq nagui somaye mashe huo'o da nchoxonnataguec.»

³⁴Qaq so Esaú co'ollaq hua'axaỹa da la'aqtac so lta'a, nache ỹataqta lta'araic da nqui'ic nache nỹeetac, nache ỹa'alaq, 'eeta': «¡'Am Taxare, Aỹem 'aỹa'anem nataqa'en ca 'archoxonnataxanaxa!»

³⁵Qalaxaye so Isaac 'enapeco': «Mashe hueta'a ne'ena som 'arqaỹa, qaq somaye aỹem ỹatenachet, qaq ỹache so nchoxonnataxanaxa maye 'am talec taxa.»

³⁶«Nache so Esaú 'enapeco': ¡Mañaxasaco' ye qoỹanagui da le'enaxat Jacob! ¡Mashe dos nagui da aỹem nqovin! Hua'auñi da deuotaxanec da shenec da aỹem ỹe ñalec. Nagui qaltaq deuotaxanec da nchoxonnataxanaxa maye aỹem talec taxa.» ¿Peta'a saishet da huo'o ca lỹa 'auaỹamaxattac 'archoxonnataxanaxa da aỹem talec?

³⁷Nache so Isaac 'enapeco': «Aỹem mashe sanem so Jacob da 'arataxala', qataq sogote da sanem somaye da lamaxashecpi qome na lauo' le'ecpi, qataq sanem da ỹataqta qalota qome ca hueto'ot trigo qataq ca lataxa. Qaq ¿negue'to' ca 'am so'otec nagui, 'am ỹalcolec?»

³⁸Nache so Esaú qaltaq 'enapego' so lta'a, 'eeta': «'Am taxare, ¿peta'a saisheto' da 'aỹa'an ca lỹa 'archoxonnataxanaxa? ¡Ñaq aỹem 'auchoxoren nataqa'en 'am taxare!» Nache somaye qaltaq ỹe'eguelaxalec da na'alaqtapiguiñi.

³⁹Qaq huaña nache so Isaac 'enapego' somaye, 'eeta': «Qoueta'a qome ca 'alhua maye qaỹoqta ca 'onaxaic 'alhua, qataq saishet qome da 'am talec na auot maye chegoqo'ot na piguem.

⁴⁰Qataq 'auo'ogoxona qome ca 'ainec da 'ampaxaalec da 'anachaalaxataxac, qataq 'am lamaxashec qome so 'arqaỹa, qalaxaye qom ivita da 'aua'añi, nache 'ansoueguesop somaye.»

⁴¹Qaq nache chegoqchiguiña co'ollaxa da so Esaú nquiỹa so Jacob, souaxat so nchoxonnataxanaxa maye so lta'a ỹanem somaye, nache deuennataxaataco', 'eeta': «Mashe saqaỹaloq da huo'o ca qarasouaxac souaxat ca l-leuaxa ñi ita'a. Qaq qom ime camaye, nache aỹem salauat qome ñi ỹaqaỹa Jacob.»

⁴²Qaq aso Rebeca co'ollaq ỹaỹaten da lhuennataxa so Esaú, nache damaxasoxoneuga so Jacob, nache 'enapega, 'eeta': «Ñaq 'aula'a, da so 'arqaỹa Esaú ỹauotaique 'am ỹalauat da yaqto' ipalaique ca lvi'.

⁴³Qaq ỹoqo'oye 'am ỹalcolec, ñaq aỹem 'ana'axaỹaxana, sa 'anaỹaloxon qome da 'auatauec, 'anqo'ona ye Jarán yem lma' ca ỹaqaỹa Labán.

⁴⁴Qaq cara'acolec qome da qono'ot camaye, nato' qom inoxonec da lalemataic so 'arqaỹa,

⁴⁵qataq icoua'ai dam 'auo'otec. Qaq huaña qome, nache 'am secoyeguen da yaqto' 'añe'eguelaq. ¡Cha'aye sa saỹamaxaren da imerauec da deqa't naua dos ỹalqa ca 'oonolec na'a'q!»

⁴⁶Qaq ime, nache aso Rebeca 'enapega so Isaac, 'eeta': «Aỹem mashe ỹataqta ñasamñi souaxat ñeua hitiita maye huaronegueta ñi Esaú. Qaq ñi Jacob da huo'otaq huaroneguet aca hitiita da 'eeta'ama ñiimaye, anam hueta'a ne'ena Canaán, qaq no'on da seleu.»