Read Batak Toba Génesis 3 Bible Online

Génesis 3 - Batak Toba bible

Génesis 3

¹Qalaxaye so na'araxanaq ỹataqta sa nqalat, napacalec 'enauac na laỹepi shiguiỹacpi maye lo'onatacpi Ñim Nataxala', qaq somaye inato' aso 'alo, 'eeta': «¿'Eesa peta'a da Ñim Lo'onatac 'Enauacna da saishet da qami' ỹashenema da qolliqui ana ala ana qo'oipaqpi maye huaigui ne'ena nanqa' ana nañiguishe?»

²Nache aso 'alo 'enapeco': «Seshetaq da sacheguenaq ana ala camachaqca ana qo'oipaqpi maye huaigui ne'ena nanqa' ana nañiguishe,

³qalaxaye chaqarata ara qo'oipaq maye nangui na laiñi ne'ena nanaxanaqa', Ñim Lo'onatac 'Enauacna qomi' 'enapegalo da saishet da sacheguenaq, qataq saishet da sepotaqpegueua'a ana ala aramaye. Cha'aye da shenaqtec de'era, nache seleuaq.»

⁴Qalaxaye so na'araxanaq 'enapego' aso 'alo, 'eeta': «Saishet da 'en. Saishet qome da qaullivi.

⁵Ñim Lo'onatac 'Enauacna ỹaỹateeta da qom qolliqui ana ala ara'ara qo'oipaq, nache huo'o da qarauattonaxanaxaqui, da qauauattoñi ca no'on qataq ca qauem, qaq huaña nache qoñiita'am Ñimaye.»

⁶Nache aso 'alo ila'a co'ollaxa da ana ala asa'aso qo'oipaq ỹataqta 'onaxai, nache huo'o da lyaxa da chec, qataq da lyaxa da huo'o da lauattonaxanaxac. Nache nqat aso 'oonole ala asomaye nache chec, qaq ime nache ỹanem so lhua, nache somaye nataqa'en chec.

⁷Qaq huaña, nache soomaye ne'ettrec naua la'ai'te, qataq ntoue'n, nache ilora'a da huetrauec. Qaq huaña nache ỹo'o't aso higo laue da ỹauo'o lo'ola't.

⁸Qaq so ỹale qataq aso 'alo, co'ollaq hua'axaira'aguet Ñim Lo'onatac 'Enauacna da coleetapeguelec so nanqa' ana nañiguishepi, quetaigui so la'at atomteguet so avit, nache soomaye nqañoxooyiñi co'ollaxa, taroigui so qo'oipaqsat se'eso nanaxanaqa'.

⁹Qalaxaye Ñim Lo'onatac 'Enauacna maye Nataxala', iỹaxanaique co'ollaxa se'eso ỹale, 'eeta': «¿Hua'ague ca qoueta'ague?»

¹⁰Nache so ỹale ỹasat, 'eeta': «'Am sa'aqta'aguet da 'aucoleetapeguelec na nanqa' ana nañiguishe, nache huo'o da icolanaxa, cha'aye sootauec. Ỹoqo'oye ñeqañoxooñi.»

¹¹Nache Ñim Lo'onatac 'Enauacna inat 'eeta': «¿Negue't ca 'am da'aqtaxanem da qouetauec? ¿Qollec peta'a ana ala ara qo'oipaq maye 'am shenapega co'ollaxa da sa qollec?»

¹²Nache so ỹale ỹasat, 'eeta': «Ara 'alo maye aỹem 'aỹa'anem da ñauegaxaua, aramaye aỹem ỹanem aso ala ara'ara qo'oipaq, nache aỹem sachec.»

¹³Nache Ñim Lo'onatac 'Enauacna maye Nataxala', inat aso 'alo, 'eeta': «¿Ta'ainco' da 'auo'ot de'era?» Nache asomaye ỹasat, 'eeta': «So na'araxanaq aỹem ỹatenachet, ỹoqo'oye sachec aso ala ara'ara qo'oipaq.»

¹⁴Nache Ñim Lo'onatac 'Enauacna 'enapega so na'araxanaq, 'eeta': «Qaq souaxat de'era 'auo'ot, nache qauem qome da 'icỹaxac da 'aualectaigui 'enauac na laỹepi shiguiỹacpi. Qaq nache chegoqchiguiña nagui da 'am 'auaualectapigui', qataq qollectac na lsoche na 'alhua, 'enauaque naua na'axa'te da 'arca'alaxa.

¹⁵Qaq Aỹem, so'ot da 'am, qataq ara 'alo qami' npa'aguenaxau', nache 'ena'am qome ca 'aỹa'alaqpi, qataq ca llalaqpi aramaye. Ca llalaqpi aramaye pigui qome na 'arqaic, qaq 'am 'anaigui qome ana lla'axa.»

¹⁶Qataq 'enapega aso 'alo, 'eeta': «Ñequigaxatec qome da 'anque'eenaxac qom ivita da huo'o ca 'aỹa'alec, qataq ỹataqta huo'o da 'anqui'ic qom 'auco'o. Qalaxaye imalec qome da 'arauoche da 'arhua, qaq damaye 'am ilo'ogue qome.»

¹⁷Qataq 'enapega so ỹale, 'eeta': «Qaq souaxat da 'aualaxaguet ara 'arhua, da qollec aso ala ara qo'oipaq maye sheetega co'ollaxa da saishet da qollec, nache nagui ana 'alhua talec qome da qauem, souaxat 'am. Qataq ỹataqta huo'o qome da 'anque'eenaxac da 'auo'onataxan, da yaqto' 'auachiguiñi ca qollec, 'enauaque naua na'axa'te da 'anachaalataxac.

¹⁸Ana 'alhua ñaxaalec qome ana ỹotta'a't ỹaxat, nache qollectac qome ana huoue no'onaxa lashe.

¹⁹Qataq ỹataqta 'anchelchaqchiguiñi qome da 'auo'onataxaatac, da yaqto' 'auachiguiñi ca qollec, choche ivitta'a da 'avi'eguelaxaigui ana 'alhua, maye 'auachegaqaigui co'ollaq 'am qaỹo'ot, cha'aye 'am 'alhua lsoche, qaq nam 'alhua lsoche 'apactoigui qome.»

²⁰Nache so ỹale ỹanagui da le'enaxat Eva aso lhua, cha'aye asomaye nache late'e qome 'enauac na shiỹaxauapi.

²¹Nache Ñim Lo'onatac 'Enauacna, ỹo'o't soua alogo soomaye, ỹachegoxotaigui na lo'oc na shiguiỹacpi, da yaqto' so ỹale qataq aso lhua ỹaayeñi.

²²Qataq 'enapeco': «Nagui dam shiỹaxaua, damaye 'eeta'ama qomi', da ỹaỹaten da no'on qataq da qauem. Qaq saiueno'o' da nataqa'en nqat ana ala ara qo'oipaq maye chegaqaigui da nca'alaxa, cha'aye da chec nache chochaq tatec da lca'alaxa.»

²³Qaq ỹoqo'oye Ñim Lo'onatac 'Enauacna maye Nataxala', ỹo'orauec so shiỹaxaua, ca'ai naqa'en so nanaxanaqa' maye huaigui ye 'alhua Edén, nache ỹamaxalec da ỹo'ot na 'alhua, maye maiche chegaqaigui co'ollaxa.

²⁴Qaq co'ollaq ime da ỹo'orauec so shiỹaxaua, nache da pa'aigui da nala' lliguisheguem yem nanaxanaqa' maye huaigui ye Edén, ỹanaleguete soua huo'o da lca'alaqa' maye huo'oi naua laua't, qataq som ỹeelonec 'ettaigui maye coleetagui, da yaqto' saishet da huo'o ca ivireua'a aso qo'oipaq, maye chegaqaigui da nca'alaxa.