Read Batak Toba Génesis 32 Bible Online

Génesis 32 - Batak Toba bible

Génesis 32

¹Qaq so Jacob, nataqa'en jec, qalaxaye co'ollaq huangui so nqa'aic, nache soua lamaxa'she piguem lashe' Ñim Lo'onatac 'Enauacna, nachaxanegueta somaye.

²Qaq so Jacob, co'ollaq ila'alo soomaye, nache 'enapeco': «Ne'ena, nachena na nalleppi Ñim Lo'onatac 'Enauacna.» Qaq ỹoqo'oye nache ỹanagui da le'enaxat Majanayin yi'iye 'alhua.

³Qaq ime co'ollaxa, nache so Jacob ỹauo'oi soua ỹama'q da taỹalo naqa'en ye 'alhua Seir, maye huaigui ye 'alhua Edom, da ỹauo'o da la'axaỹaxac so lqaỹa Esaú.

⁴Qaq ỹanema soomaye da la'aqtac, maye, 'eeta': «Qaua'aqtaxañim qome ca ỹaqaỹa Esaú, qoñiita': Ñi 'arqaỹa Jacob, 'am nañanot da 'am ỹalaxaguet, qaq ỹoqo'oye 'am namaxa da la'aqtac maye, 'eeta': Aỹem sootaña ye lma' ñi Labán 'enauaque se'esoua vi'iye,

⁵qaq huo'o nagui ana ilo huacapi, qataq na 'ashenapi, qataq ana qaguetapi, qataq na ỹamaxashecpi, qataq ana ỹamaxashepi. Qaq 'am samaxa de'era ỹa'aqtac, 'am ỹataxala', cha'aye sauotaique da aỹem 'auchoxoren.»

⁶Qaq co'ollaq mashe ñe'eguela'q soua namaxa'she, nache da'aqtaxaarem so Jacob, 'eetra': «Qomi' mashe sachegoxosoqa'a ñi 'arqaỹa Esaú. Qaq namaye mashe 'anacta da 'am nca'ata'aguet, nnaictague' na cuatrocientos nalleppi.»

⁷Qaq so Jacob, co'ollaq hua'axaỹa de'era, nache ỹataqta huo'o da lcolanaxa, qataq ỹataqta lta'araic da 'eeta. Qaq huaña, nache dos naqa'en naua lpa'axaco som shiỹaxauapi maye nnaictague' somaye, qataq nataqa'en aso qaguetapi, huacapi, qataq aso cameellopi,

⁸cha'aye da lhuennataxac somaye, 'eeta': «Ca Esaú, da iloquiaxan ca 'oonolec lpa'axac ne'ena shiỹaxauapi, nache ca laỹepi ishet da naneltaxan.»

⁹Ime, nache so Jacob natamen, 'eeta': «'Am Nataxala', maye 'Am Natamnaxala' so ỹape Abraham, qataq ca ita'a Isaac. 'Am maye aỹem qonapega co'ollaxa da she'eguelaxa ye ña'alhua, qataq ye ihuo' le'ecpi, qataq aỹem 'auo'otec da qaica camachaqca da ỹecỹaxac,

¹⁰qaq aỹem, ỹataqta saq saiguet da 'arauotaxanaqtaic qataq 'artelaxa da sheeta, cha'aye co'ollaq sa'axasoxoolec aso tala Jordán, nache qaica ca lỹa sachetac, nachaqanata ana ỹashelte. Qaq nagui qalaq sevira'a da dos naua lma'ate na ñenaictague'pi.

¹¹¡Qaq ñaq aỹem 'arqouaguec qome, da aỹem 'anca'alaxateeguesop da lhuaqỹaxac na ỹaqaỹa Esaú! Cha'aye huo'o da icolanaxa da anac da aỹem iloquiaxan, nache ỹalauat na 'alpi, qataq na ñaqpiolec.

¹²Qaq 'Am, ỹataqtegue co'ollaxa da 'ara'aqtac, da qaica camachaqca 'anqa'en da ỹecỹaxac, qataq cam aỹem chegoxoguetpi, ỹataqta qalota 'eeta'am na lsoche na 'alhua maye huo'ot na loigue aso auaxai, maye saqaivi' da qanaloqten.»

¹³Qaq so Jacob, nache lo'ochaqa' yemaye se'eso pe, nache som hueto'otpi somaye, iỹotauga so nme naqa'en so lqaỹa Esaú,

¹⁴doscientas aso quetaqpi, qataq veinte so quetaq lhuaraicpi, qataq doscientas aso qaguetapi, qataq veinte so qagueta lhuaraicpi,

¹⁵qataq treinta aso cameellopi maye cheta'ague da deco'otac, nache lỹaueegue' so llalaqpi, qataq cuarenta aso huacapi, qataq diez soua huaca llalqa, qataq veinte aso 'ashenapi, qataq diez so 'ashena lhuaraicpi.

¹⁶Qaq ime, nache ỹanema soua lamaxa'she da ilo'ogue asomayepi, qalaxaye iỹottecache so ỹotta'a't shiguiỹacpi. Nache 'enapegalo' soomaye, 'eeta': «Qaua'aviita qome, qalaxaye ca hua'auta qaỹata'aguet naqa'en qome ca laỹepi nlopi maye nca'attauo.»

¹⁷Qaq som hua'autec da ỹamaq, qalaq ỹanem da lqataxac, 'eeta': «Qom 'am natena'aguet ca ỹaqaỹa Esaú, nache da 'am inat, negue't ca 'ana'aco', qataq hua'ague ca 'ata'ague, qataq negue't cam lalamaxat nam shiguiỹacpi maye 'auo'ottalec,

¹⁸nache 'auasateguet qome, qoneta': Qomye namayepi 'am qanamaxa da 'anme, 'am ỹataxala' Esaú, chegaqa'a ñi Jacob maye 'aramaxashec. Qaq namaye qomi' nca'attaleguete.»

¹⁹Qaq nataqa'en huaqata som ca'attaueegue som hua'autec, qataq so lỹa maye ca'attaueegue somaye, qataq 'enauac som ỹo'ottalec so nlopi 'enapega, 'eeta': «Qom qanachiñiỹa'aguet ca Esaú, qaq nataqa'en nache qoñiitec qome de'era da qara'aqtaqui.

²⁰Qaq nataqa'en qoñiỹapega qome, qoñiita': Na 'aramaxashec Jacob nataqa'en anacta, qomi' nca'attaueeguelo.» Cha'aye da lhuennataxa so Jacob, 'eeta': Cheqoqchigui qome ne'ena nme maye sa'auaxan da samaxa camaye, da nmooñi ñaqa'en da layiloxo, qaq qom ime, nache ñema'ai' da ñauane'. Saiuena'a da 'eetec de'era, nache aỹem ỹaỹamaxatta da ñauane'.

²¹Qaq 'era da 'eetec da hua'auta naqa'en so nmepi, qaq somaye no'onaña se'eso lanataqa' se'eso pe.

²²Qaq nacheso se'eso pe, da ñisheguem so Jacob, nache ỹaconeua'alo soua dos lhua't, qataq soua dos lamaxashe, qataq soua once llalqa. Ime, nache ỹa'axasoxoolec naqa'en somayepi so la'auaxac le'enaxat Yaboc,

²³lỹatec naqa'en 'enauac so lalamaxatpi.

²⁴Qaq so Jacob co'ollaq mashe nda'a't, qaq huo'o so shiỹaxaua iloquiaxan somaye, nache somaye deloctague' ivitta'a so yo'oxoñi,

²⁵qalaxaye se'eso shiỹaxaua co'ollaq ila'a da saishet da nauec so Jacob, nache iuaxangui na lleegue lqaic, nache naquiigui ana lleegue so Jacob co'ollaq ñaq deloctague' somaye.

²⁶Qaq huaña nache se'eso shiỹaxaua 'enapego' somaye, 'eeta': «Aỹem 'axanec, ten mashe yaqta'a da yo'oxoñi.» Nache so Jacob 'enapeco': «Saishet da 'am saxanec, da saishet da aỹem 'auasaxalec ca 'archoxonnataxanaxa.»

²⁷Nache se'eso shiỹaxaua inat somaye, 'eeta': «¿'Eetec cam 'are'enaxat?» Nache somaye 'enapeco': «Aỹem ỹe'enaxat da Jacob.»

²⁸Nache se'eso shiỹaxaua 'enapego' somaye, 'eeta': «Saishet nagui da 'are'enaxat da Jacob, maye 'are'enaxat qome da Israel, cha'aye 'auloctague' Ñim Lo'onatac 'Enauacna, qataq na shiỹaxauapi, qalaxaye 'anauec.»

²⁹Qaq huaña nache so Jacob inato' somaye, 'eeta': «Nagui nache aỹem 'aua'aqtaxanem 'eetec ca 'are'enaxat.» Nache se'eso shiỹaxaua 'enapeco': «¿Ta'ainco' da 'aunataxaateguec ca ỹe'enaxat?» Qaq nache huaña yemaye da se'eso shiỹaxaua, ỹasaxalec da lchoxonnataxanaxa so Jacob.

³⁰Qaq so Jacob, nache ỹanagui da le'enaxat «Peniel» yi'iye 'alhua, cha'aye 'enapeco': «Aỹem ñema'ai' da ñauane' Ñim Lo'onatac 'Enauacna, qalaq ñaq 'eetalec da ñeca'altauec.»

³¹Qaq mashe nnoxoosheguem co'ollaxa aso nala', nache so Jacob cheta'ague da ca'ai ye Peniel, qaq souaxat da naquiigui ana lleegue, nache huaỹoraxaata.

³²Qaq ỹoqo'oye choche ivitta'a nagui da na chegoxoguetpi so Israel, saishet da chec ana lleegue lqaic lo'ota ca camachaqca shiguiỹac, cha'aye nacheye yem qaiuaxaachiguiña co'ollaxa so Jacob.