Read Batak Toba Génesis 34 Bible Online

Génesis 34 - Batak Toba bible

Génesis 34

¹Qaq aso Dina maye llale aso Lea qataq so Jacob, asomaye jec co'ollaxa da namaqtega som qa'ampiolec maye lma' yi'iye 'alhua.

²Qalaxaye so Siquén som llalec so Jamor, maye jiviita, som nataxala' yi'iye 'alhua, ila'a co'ollaxa asomaye, nache saicherapec co'ollaxa da ỹaconeua'a da lauañi', nache choche ỹe'en.

³Qalaxaye somaye ye ỹataqta nqopita asomaye, nache huo'o da lyaxa da ỹañoxot asomaye da nataqa'en nqopita somaye.

⁴Qaq huaña nache detaxaỹot so lta'a Jamor, 'eeta': «'Onaxaic da qojec da 'auquiguiỹaua'a aña'añi qa'añole. Cha'aye sauotaique da saroneguet añimaye.»

⁵Qaq so Jacob ỹaỹaten co'ollaxa da so Siquén ỹe'en aso llale Dina, qalaxaye souaxat da ñaq netrauga so no'onaxa soua llalqa da ilotrague' so 'atetpi, nache somaye qaica ca la'aqtac, choche ivitta'a co'ollaq nvildeuo soomaye.

⁶Qaq som Jamor, som lta'a so Siquén jec da nqo'ona so Jacob da yaqto' detaxaỹapegue'.

⁷Qaq co'ollaq nvildeuo soua llalqa so Jacob chegoqtrauga so no'onaxa, nache co'ollaq ỹaỹate'n da qanayeuaigui, nache soomaye ỹataqta dalematai'. Cha'aye damaye ỹo'ot da ỹataqta lta'araic ne'enaguec so Israel, da so Siquén lauañe' co'ollaxa aso llale so Jacob. ¡Damaye ỹataqta sa qaishetapec da qaỹo'ot!

⁸Qalaxaye so Jamor detaxaỹapegueto soomaye, nache 'eeta': «Ñi ỹalec Siquén ỹataqta nqopita añi qarqaỹai, ñaq qauashiñiitem ctaxa añimaye, da huaroneguet ñimaye

⁹qataq no'on da nache qomi' nhuo' lashe', yaqto' qomi' ishet qome da saronaxaguet ana qaỹa'allipi, qataq qami' ishet da qauaroñiiguet ana qoyalepi.

¹⁰Qaq yaqto' ishet da qomi' qoñiỹaiguilo, qataq na 'alhua maiche qo'oicquiñiitac da qoñiỹalec, qauo'oche ca qanmenaxaqui qataq qausheenaxañiỹa ca qana'alhuai.»

¹¹Qaq so Siquén, nataqa'en 'enapega so lta'a aso Dina, qataq soua lqaỹa't, 'eeta': «Aỹem qami' ñachoxonnoto da qauasacheeguet de'era, qaq aỹem qami' sanema qome cam qauỹaxañiỹaique.

¹²Na'aictaxa da late'erai aca qauỹaxañiỹaique da napactelec dam 'eetec naxa, qataq da qalota ca ỹachetaqtaxanaxat, qalaq nache 'ena'am ishet da qami' sanema, qalaxaye qauaqaita'a añi qa'añole da aỹem huaroneguet.»

¹³Qalaxaye ye so Siquén, ỹe'en co'ollaxa aso Dina, nache soua llalqa so Jacob ỹasatreguet da 'eetapeguec somaye qataq so lta'a Jamor, qalaxaye choche ỹatenache't, nache

¹⁴'eeta' da la'aqta'c: «Qomi', saishet da sanaxam añi qarqaỹa cam shiỹaxaua maye qaica ca na'anaxashet na lo'oc, cha'aye damaye ỹo'ot qome da qarcoxo.

¹⁵Qomi', seshetaq qalaxaye da qauasachiiguet dam lataxac maye shenaqtapeguec, qaq damaye 'eeta': qami' iuen da qoñiita'am da shenaqta, da 'enauac na ỹalleppi da qoñiita, iuen da qaỹauo'o ca na'anaxat na lo'oc.

¹⁶Qaq huaña, nache qami' ishet da qauaroñiiguet ana qoyalpi, qataq qomi' ishet da saronaxaguet ana qaỹa'allipi, qaq nache qami' sonqaiguilo qome, huaña nache ỹataqta qomi' nhuo' le'ecpi.

¹⁷Qaq da saishet da qauasachiiguet dam shenaqtapeguec, da ñi 'oonolec da qoñiita qaỹauo'o ca na'anaxat na lo'oc, nache qomi' qolaqa'ai ne'ena, qataq sauegaq añi qarqaỹa.»

¹⁸Nache so Jamor qataq so llalec Siquén, ỹataqta ỹaỹamaxareete' de'era 'eetrapeguec soomaye.

¹⁹Nache se'eso nsoqolec, saqaỹaloq naqa'en da qaỹauo'o so na'anaxat na lo'oc, cha'aye somaye ỹataqta nqopita aso llale so Jacob. Qaq som Siquén, ye som llalaqpi so lta'a ỹataqta huo'o naq 'enec naqa'en,

²⁰nache somaye jec, nnaicapegue' so lta'a Jamor, tareuga so ñegueuo so huaqta'a't nỹecpi, som huaña naxa da qaitaxaỹapigui da menaxac. Qaq huaña yemaye, nache da'aqtaxaarem so shiỹaxauapi, maye lma' yi'iye 'alhua, 'eetra':

²¹«Yi'iye shiỹaxauapi maiche qanauochaxauapi. Yemayepi qomi' naiguilo, qataq ỹo'ot qome ca nmenaxac ne'ena souaqta'a, cha'aye na qana'alhua qalochiguiñi da huo'o ca sanaxam yemayepi. Nache qomi' ishet qome da saronaxaguet ana llalpi, qataq yemayepi ishet da huaroneguet ana qoyalepi.

²²Qaq da yaqto' ishet da ỹataqta qomi' nhuo' le'ecpi, nache yemayepi qomi' ỹasategueta da qomi' naiguilo, qalaxaye iuen da so'otaq dam lataxac maye, 'eeta': 'enauac na ỹalleppi da shenaqta, qaỹauo'o qome ca na'anaxat na lo'oc, nache 'eeta'am da lataxac yemayepi.

²³Qaq 'enauac na lalamaxatpi, qataq 'enauac na na'atetpi da qaralamaxatpi qome. Qaq nacherata da sasataq, nache yemayepi qomi' naiguilo qome.»

²⁴Qaq 'enauac se'eso lapoota'a't maye hueta'a so ñegueuo so huaqta'a't nỹecpi, ỹaỹamaxareeta dam 'eetapeguec so Jamor, qataq som llalec Siquén, qaq huaña nache 'enauac so ỹalleppi da qaỹauo'o na na'anaxat na lo'oc.

²⁵Qalaxaye so Simeón qataq so Leví, som llalqa so Jacob maye lqaỹa't aso Dina, tareua'a co'ollaxa so huaqta'a't nỹecpi, co'ollaq inoxoorec soua tres na'axa'te, co'ollaq so ỹalleppi ñaq huetagui da nqui'ic souaxat da qaỹo'ot na na'anaxat na lo'oc. Nache irota'alo soua lainaqa da ỹalauat 'enauac somayepi, cha'aye qaica ca ishet da ỹashela'agueta soomaye.

²⁶Qaq nataqa'en iroleguete soua lainaqa da ỹalaua't so Jamor, qataq so llalec Siquén, ime nache nqateeguesop aso Dina so lma' so Siquén. Ime, nache je'c.

²⁷Qaq nataqa'en ivildeuo co'ollaxa soua llalqa lỹa't so Jacob, nache quetragui so nalaatacpi, nache deuotaxanec so logoxoshetpi se'eso nhuo' le'ecpi, cha'aye ipalaique lvi' souaxat da ne'enaguec aso lqaỹa.

²⁸Qataq ỹauec aso qaguetapi, huacapi, 'ashenapi qataq ỹache 'enauac som nogoxoshetpi maye hueta'a se'eso huaqta'a't nỹecpi, qataq som huetauga so no'onaxa.

²⁹Qataq nataqa'en, ỹache 'enauac so nogoxoshetpi maye huetaigui so nma'pi, qataq ỹauec da icoñi' 'enauac so 'alpi qataq so ñaqpiolec.

³⁰Qaq huaña nache so Jacob 'enapego' so Simeón, qataq so Leví, 'eeta': «Qami' aỹem qauo'ochec da lta'araic qauem. Cha'aye nagui na lma' ne'ena 'alhua, nam cananeopi, qataq na ferezeopi, aỹem nquiỹa qome. Qaq namayepi ishet da laỹona't qome da yaqto' aỹem iloquiaxan, qaq nam ñalleppi ye saq 'amaqtaq, nache namayepi aỹem ỹalauat qome, qataq na ỹalaqpi.»

³¹Qalaxaye soomaye ỹasa't, nache 'eetra': «¿Maye isheto' peta'a da sa'axasoqta'a somaye da 'eeta'am naqa'en aca quisheguetaxai añi qarqaỹa?»