Read Batak Toba Génesis 36 Bible Online

Génesis 36 - Batak Toba bible

Génesis 36

¹Qaq 'esoua soua chegoxogueta so Esaú, som nataqa'en le'enaxat da Edom.

²So Esaú huaronegueta co'ollaxa soua 'alo maye lma' ye Canaán: aso Ada maye llale so Elón som hitita, qataq aso Aholibama asom llale so Aná maye llalec so Sibón som jivita.

³Qataq aso Basemat asom llale so Ismael maye lqaỹa so Nebayot.

⁴Qaq aso Ada, co'ollaq deco'oiguet so Esaú, nache so llalec le'enaxat Elifaz. Qaq so llalec aso Basemat qalaq le'enaxat da Reuel.

⁵Qaq soua llalqa aso Aholibama le'enaxat Jeúz, Jalán qataq so Coré. Qaq 'esoua soua llalqa so Esaú maye lañoqo' ye 'alhua Canaán.

⁶Qaq so Esaú ỹaconeua'alo co'ollaxa soua lhua't, qataq soua llalqa, qataq soua llalel, qataq 'enauac som shiỹaxauapi maye neto'ot somaye, nache taỹa so lỹa nma' da yaqto' ca'ai so lqaỹa Jacob. Qaq lỹatec 'enauac so na'atetpi, qataq 'enauac som logoxoshetpi maye ỹachegoxotaña ye 'alhua Canaán,

⁷cha'aye ỹataqta mashe qalota so na'atetpi, qataq so logoxoshetpi soomaye, ỹoqo'oye soomaye saishet da queta da nhuoreu', cha'aye so 'alhua maye netralec mashe saq 'amaqtaq da lquia'aqa' so lalopi soomaye.

⁸Qaq ỹoqo'oye so Esaú, som nataqa'en le'enaxat Edom, taỹa co'ollaxa da nalec ye 'alhua qasoxonaxasat ye Seir.

⁹Qaq 'esoua soua chegoxogueta so Esaú, som chegoxogueta na Edom le'ecpi maye netalec co'ollaxa ye 'alhua qasoxonaxasat ye Seir.

¹⁰Qaq 'ena nam le'enaxatpi so llalaqpi so Esaú: So Elifaz late'e aso Ada, qaq so Reuel late'e aso Basemat.

¹¹Qaq soua llalqa so Elifaz, Temán, Omar, Sefó, Gatán qataq so Cenaz.

¹²Qaq so Elifaz, huo'o aso ỹaqauga lhua lỹa le'enaxat Timna, qaq asomaye nache late'e so Amalec. Qaq 'esoua soua chegoxogueta aso Ada, maye lhua lỹa so Esaú.

¹³Qaq soua llalqa so Reuel: Najat, Zeraj, Sama qataq so Miza. Qaq 'esoua soua llalqa aso Basemat asom lhua lỹa so Esaú.

¹⁴Qaq aso Aholibama, asom lhua lỹa so Esaú, qalaq llalqa soua: Jeúz, Jalán qataq so Coré. Qaq asomaye nachaso aso llale so Aná qataq laual so Sibón.

¹⁵Qaq som nataxala'pi maye chegoxoguetpi so Esaú, qalaq 'ena na le'enaxatpi: so Elifaz som la'auaxanec llalec so Esaú, qalaq chegoxogueta soua nataxala'ate, Temán, Omar, Sefó, Cenaz,

¹⁶Coré, Gatán qataq so Amalec. Qaq 'enaua naua le'enaqa'ate soua nataxala'ate maye llalqa so Elifaz maye netalec co'ollaxa ye 'alhua Edom, qaq 'enauac somayepi nache chegoxoguet aso Ada.

¹⁷Qaq soua llalqa so Reuel som llalec lỹa so Esaú. Qaq 'enaua naua le'enaqa'ate soua nataxala'ate: Najat, Zeraj, Sama qataq so Miza. Qaq 'esoua soua nataxala'ate maye chegoxogueta so Reuel maye netaña co'ollaxa ye 'alhua Edom. Qaq 'enauaque soomaye chegoxogueta aso Basemat, asom lhua lỹa so Esaú.

¹⁸Qaq soua llalqa aso Aholibama asom llale so Aná, maye lhua lỹa so Esaú, qaq 'enaua naua le'enaqa'ate soua nataxala'ate: Jeúz, Jalán qataq so Coré.

¹⁹Qaq 'enauaque soomaye da chegoxogueta so Esaú som nataqa'en le'enaxat da Edom, qaq soomaye nache lataxala'ate so maiche lauo'.

²⁰Qaq 'ena na le'enaxatpi so llalaqpi so Seir som horeo, maye netalec co'ollaxa se'eso 'alhua: Lotán, Sobal, Sibón, Aná,

²¹Disón, Eser qataq so Disán. Qaq 'esoua soua lataxala'ate som horeopi maye chegoxogueta so Seir, som netalec co'ollaxa ye 'alhua Edom.

²²Qaq soua llalqa so Lotán: Jorí qataq so Hemán. Qaq aso Timna, qalaq lqaỹa so Lotán.

²³Qaq soua llalqa so Sobal: Alván, Manajat, Ebal, Sefo qataq so Onam.

²⁴Qaq soua llalqa so Sibón: Ayá qataq so Aná. Qaq se'eso Aná, nacheso co'ollaxa so ilalec aso lapelpi maye npaxaatasheguem na 'etaxat, co'ollaq somaye ilotague' so 'ashenapi maye lalo so lta'a Sibón.

²⁵Qaq so Aná, huo'o so llalec le'enaxat Disón, qataq aso llale le'enaxat Aholibama.

²⁶Qaq soua llalqa so Disón: Hemdán, Esbán, Itrán qataq so Querán.

²⁷Qaq soua llalqa so Eser: Bilán, Zaván qataq so Acán.

²⁸Qaq soua llalqa so Disán: Uz qataq so Arán.

²⁹Qaq soua lataxala'ate som horeopi: Lotán, Sobal, Sibón, Aná,

³⁰Disón, Eser qataq so Disán. Qaq 'esoua soua lataxala'ate som horeopi, ñi 'oonolec nataxala', ỹataqtac na maiche lauo' le'ecpi, co'ollaq netaña ye 'alhua Seir.

³¹Qaq 'ena na le'enaxatpi so nta'alpi maye ilotague' co'ollaxa ye 'alhua Edom, co'ollaq saxanaxa da huo'o ca lta'a na llalaqpi so Israel:

³²so Bela maye llalec so Beor, nacheso so nta'a co'ollaxa ye Edom, qaq som lalamaxat huaqta'a't nỹecpi, le'enaxat Dinaba.

³³Qaq co'ollaq ileu so Bela, nache da lo'onataxanaxac da nta'a talec so Jobab som llalec so Zeraj, maye lma' ye Bosra.

³⁴Qaq co'ollaq ileu so Jobab, nache da lo'onataxanaxac da nta'a talec so Jusán, som lma' co'ollaxa ye 'alhua Temán.

³⁵Qaq co'ollaq ileu so Jusán, nache da lo'onataxanaxac da nta'a talec so Hadad, som llalec so Bedad, som loxonec co'ollaxa so Madián le'ecpi, hualec so no'onaxa ye Moab. Qaq som huaqta'a't nỹecpi maye lalamaxat somaye, qalaq le'enaxat da Avit.

³⁶Qaq co'ollaq ileu so Hadad, nache da lo'onataxanaxac da nta'a talec so Samla, som lma' co'ollaxa ye Masreca.

³⁷Qaq co'ollaq ileu so Samla, nache da lo'onataxanaxac da nta'a talec so Saúl, som lma' co'ollaxa ye Rejobot, maye hueto'ot na loigue so tala Éufrates.

³⁸Qaq co'ollaq ileu so Saúl, nache da lo'onataxanaxac da nta'a talec so Baal Janán, som llalec so Acbor.

³⁹Qaq co'ollaq ileu so Baal Janán, nache da lo'onataxanaxac da nta'a talec so Hadar. Qaq so huaqta'a't nỹecpi maye lalamaxat somaye, qalaq le'enaxat Pau. Qaq aso lhua so Hadar, le'enaxat da Mehitabel, asom llale so Matred qataq laual so Mezab.

⁴⁰Qaq 'ena na le'enaxatpi so nataxala'pi maye chegoxoguetpi so Esaú, qaq ỹataqtac na maiche lauo' le'ecpi, qataq naua le'enaqa'ate naua lma'ate: Timna, Alva, Jetet,

⁴¹Aholibama, Elá, Pinón,

⁴²Cenaz, Temán, Mibsar,

⁴³Magdiel qataq Iram. Qaq 'ena na le'enaxatpi so nataxala'pi ye Edom. Ñi 'oonolec somayepi ỹataqtac na maiche lalamaxat lma', maye netalec. Qaq so Edom nacheso so Esaú, som chegoxoguet som Edom le'ecpi.