Read Batak Toba Génesis 38 Bible Online

Génesis 38 - Batak Toba bible

Génesis 38

¹Qaq se'esoua na'axa'te, nache so Judá ca'ai so lqaỹañecpi da nqo'ona so lma' so ỹale le'enaxat Jirá, maye lma' co'ollaxa ye saq 'amaqtaq nỹecpiolec le'enaxat Adulán.

²Qaq huaña yemaye, nache ỹauatton aso llale so cananeo maye le'enaxat Súa, nache huaroneguet asomaye. Qaq co'ollaq qaỹata'ague da lhua asomaye,

³nache asomaye hualaxai. Qaq co'ollaq ñiguiñi so llalec, nache ỹanagui da le'enaxat Er.

⁴Qaq co'ollaq qaltaq hualaxai, nache co'ollaq ñiguiñi so llalec, nache ỹanagui da le'enaxat Onán.

⁵Qaq asomaye qaltaq ỹe'eguelaxalec da huo'o so llalec, nache ỹanagui da le'enaxat Selá, som ñiguiñi co'ollaq so Judá netaña ye Quezib.

⁶Qaq so Judá ỹaronaxanaxan co'ollaxa so Er som llalec ỹe, ỹaronaxanaxaneguet aso 'alo le'enaxat Tamar.

⁷Qalaxaye Ñim Nataxala', sa ỹaỹamaxaren co'ollaxa da qauem lataxac so Er, nache nqat da nachaalataxac.

⁸Qaq huaña, nache so Judá 'enapega so llalec Onán, 'eeta': «'Auaroneguet qome añi pa'ai maye lhua co'ollaxa so 'arqaỹa. Yaqto' 'aupaqueelec da lataxac ca ndaua, yaqto' huo'o qome ca chegoxoguetpi so 'arqaỹa, chegoqchigui 'am.»

⁹Qalaxaye so Onán, ye ỹaỹaten da ivita da huo'o ca chegoxoguetpi somaye, nache saishet da ỹoqta 'itchiguiñi da llalaqpi. Qaq ỹoqo'oye, naxa da hue'eguet aso pa'ai, nache ỹauo'o da lataxac da yaqto' asomaye saishet da hualaxai, yaqto' so lqaỹa saishet da huo'o ca chegoxoguetpi, da chegoqchigui somaye.

¹⁰Qaq Ñim Nataxala', ỹataqta sa ỹaỹamaxaren da ỹo'ottac so Onán, qaq ỹoqo'oye nataqa'en somaye nqat da nachaalataxac.

¹¹Qaq huaña, nache so Judá 'enapega aso late Tamar, 'eeta': «Qonaña qome ca lma' ca 'arta'a, qaq nache qonetai' qome da 'am pa'ai, nato' qom ivita da ỹe ñi ỹalec Selá.» Qalaxaye so Judá, ye tatapigui lauel da so llalec Selá da nataqa'en ishet da ileu, da 'eeta'ama soua lqaỹa't. Nache aso Tamar jec co'ollaxa da naña so lma' so lta'a.

¹²Qaq co'ollaq mashe qaỹoqteguelo soua vi'iye, nache ileu aso lhua so Judá, asom llale so Súa. Qaq co'ollaq mashe inoxonec da lasouaxac so Judá, nache nqo'ona ye Timnat, maye hueta'a so npetectac aso qaguetapi maye lalopi somaye, qaq nnaictague' co'ollaxa so nauochaxaua le'enaxat Jirá, som lma' ye Adulán.

¹³Qaq aso Tamar, co'ollaq ỹaỹaten da so lacho' nqo'ona ye Timnat, da npetec aso lalo qaguetapi,

¹⁴nache asomaye, nqa't soua alogo maye no'otaqa'ate aca pa'ai, qataq ỹauo'o so lapaxalec na lqaic, da yaqto' saishet da qaỹauatton, nache nso'ooñi netaña so ñegueuo ye Enayin, maye hueteua'a na laỹe so nqa'aic maye taỹa'a ye Timnat. Qaq asomaye ỹo'ot de'era, cha'aye ỹaỹaten da mashe ỹe so Selá, qalaxaye somaye saishet da huaroneguet qanqa'en asomaye.

¹⁵Qaq so Judá, co'ollaq ila'a asomaye, nache ipi'itaxano' da quisheguetaxai, cha'aye souaxat da asomaye ỹapotalec na lashec.

¹⁶Nache so Judá huaỹoxota asomaye, qaq sa ỹaỹaten co'ollaxa da asomaye nachaso aso maiche late, nache 'enapego', 'eeta': «¿Ishet peta'a da 'am ỹauañi'?» Nache asomaye 'enapeco': «¿Negue't ca aỹem 'aỹa'anem da 'am ỹauañi'?»

¹⁷Nache so Judá 'enapeco': «Qomye 'am ñamaxa qome, ca 'oonolec quetaq llalec maye sachegoxotaigui aye ilopi.» Nache asomaye 'enapeco': «Aja', ỹaỹamaqchiguiñi. Qalaxaye huo'o qome ca 'ano'onaxatañi na 'ogoxoshetpi, nato' qom ivita da aỹem 'anamaxa camaye.»

¹⁸Nache so Judá, 'enapeco': «¿Negue't cam 'auauotaique da 'am ño'onaxato'ot?» Nache asomaye 'enapeco': «Aỹem 'aỹa'anem añi 'ara'anaxanaqte, lỹaueegue' 'anqa'en na lquet, qataq ana 'arashelte, maye 'anasoqta'a.» Nache so Judá, ỹanema asomaye, ime nache lauañi' asomaye nache hualaxai naqa'en.

¹⁹Qaq ime co'ollaxa nache aso Tamar, nqat so lapoxot na lqaic, nache qaltaq ỹaayiñi soua logo da pa'ai.

²⁰Qaq co'ollaq qaỹata'ague de'era nache so Judá, ỹamaq so quetaq llalec, ỹache naqa'en so nauochaxaua maye lma' ye Adulán, da yaqto' aso 'alo ỹe'eguelaxa't soua 'otaqa'ate, qalaxaye som nauochaxaua saishet co'ollaxa da ỹanata asomaye.

²¹Nache somaye inat so shiỹaxauapi maye lma' yi'iye 'alhua, 'eeta': «¿Hua'ague ca hueta'ague aca'aca 'alo quisheguetaxai, maye lma' ye Enayin, acam hueta'a naxa na loigue na nqa'aic?» Nache somayepi, 'enapeco': «Ne'ena saỹauano' da huo'o aca hueta'a quisheguetaxai.»

²²Qaq huaña, nache somaye ỹe'eguelaxa som netaña so Judá, nache da'aqtaxanem somaye, 'eeta': «Saishet da sanata aca'aca 'alo, qataq yem shiỹaxauapi maye lma' yi'iye 'alhua, 'eetega saỹauano' da huo'o aca 'alo quisheguetaxai da hueta'a yemaye.»

²³Nache so Judá, 'enapeco': «No'on da nache hueto'oto caua 'otaqa'ate acamaye, yaqto' saishet da huo'o ca qomi' ỹe'eeta'ape, cha'aye mashe qaỹaỹaten, da aỹem samaq so quetaq llalec, qalaxaye 'am saishet da 'auanata acamaye.»

²⁴Qaq co'ollaq mashe inoxoorec soua tres ca'agoxoiqa, nache qaỹauo'o da la'axaỹaxac so Judá, maye 'eeta': «Añi Tamar maye 'arate, yo'oqta da lauatapiguiñi' ca lỹa ỹale, ỹoqo'oye añimaye hualaxai.» Nache so Judá, 'enapeco': «¡Qanqacheeuec qome acamaye! ¡Ime, nache qauavigaxache!»

²⁵Qalaxaye co'ollaq qanqatteguec asomaye, nache ỹamaxa so la'aqtac so lacho', 'eeta': «Cam lalamaqa'ate ne'enaua 'otaqa'ate, nacheca cam aỹem iualaqchet. Ña 'aumeteete' naamaye, shapegueto' 'auauatton cam lalamaqte anam na'anaxanaqte, qataq na lquet anamaye, qataq ana nashelte.»

²⁶Qaq so Judá co'ollaq ỹauatto'n soua maiche no'otaqa'ate, nache 'enapeco': «Acamaye ỹataqta ỹaỹamaqchiguiñi da ỹo'ot, qaq aỹem qalaq qauem da so'ot, cha'aye saishet da huaroneguet ñaqa'en so ỹalec Selá.» Qaq huaña, nache saishet da qaltaq ỹe'eguelaxa da lauañi' asomaye.

²⁷Qaq aso Tamar co'ollaq ivita da deco'o, nache huayaye soua llalqa.

²⁸Qaq co'ollaq ñiyiñi soomaye, nache so 'oonolec soomaye na'auec naqa'en na lhuaq. Nache aso nogotolec lo'o, ỹaxachigui na lhuaq so nogotolec so hiilo togaxaraic, nache 'enapeco': «'Ena na la'auaxanec.»

²⁹Qalaxaye so nogotolec ỹe'eguelaxateuo co'ollaxa so lhuaq, nache hua'auñi so lqaỹa da ñiguiñi. Qaq ỹoqo'oye aso nogotolec lo'o, ỹanagui somaye da le'enaxat Fares, cha'aye 'enapeco': «¡Ye ishesso' da 'ana'auec!»

³⁰Qaq ime, nache qaltaq ñiguiñi so lỹa nogotolec, som netagui na lhuaq so hiilo togaxaraic, nache aso nogotolec lo'o, ỹanagui da le'enaxat Zeraj.