Read Batak Toba Génesis 39 Bible Online

Génesis 39 - Batak Toba bible

Génesis 39

¹Qaq som Ismael llalaqpi ỹauec co'ollaxa so José, ỹauega ye Egipto, qaq huaña yemaye nache desheenaxana somaye so lma' ye Egipto maye le'enaxat da Potifar maye ltaua so Faraón, qataq lataxala' so alleppi maye nauaatalec naxa somaye.

²Qalaxaye Ñim Nataxala' hueta'aguet co'ollaxa so José, qaq ỹoqo'oye ỹataqta ỹaỹamaqchiguiñi 'enauac nam ỹo'otpi, co'ollaq hueta'a so lma' so na'aco' Egipto le'ec.

³Qaq so na'aco' noma co'ollaxa da Ñim Nataxala' hueta'aguet so José, qaq ỹoqo'oye so José ỹaỹamaqchiguiñi 'enauac nam ỹo'otpi.

⁴Qaq de'era, nachera da ỹo'ot da som na'aco' so José, ỹataqta ỹauotec somaye, qaq ỹoqo'oye nache ỹauo'o ltaua somaye, qataq ipataxalec da ilo'ogue so lma', qataq 'enauac som logoxoshetpi somaye.

⁵Qaq nache chegoqchiguiña se'eso na'a'q, co'ollaq so Potifar ipataxalec so José da ilo'ogue so lma', qataq 'enauac som logoxoshetpi, da Ñim Nataxala' ỹasaxalec da lchoxonnataxanaxa so Potifar, som hueta'a so lma', qataq som huetauga so no'onaxa.

⁶Qaq so José nache ilotague' 'enauac so nogoxoshetpi. Huaña, nache so Potifar ỹaxaañi da ldaxac, chaqrata da nalemaqte' da lquia'axac. Qaq so José ỹataqta 'onaxaic, qataq nalochiguiñi da lataxac, qaq ỹoqo'oye da qaila'a, nache ỹataqta qanqopita.

⁷Qaq co'ollaq qaỹoqtegue de'era, nache aso lhua so na'aco' nqopittega somaye, qaq huo'o so na'a'q nache 'enapega, 'eeta': «Aỹem 'arauañi' qome.»

⁸Qalaxaye so José saỹaỹamaxaren co'ollaxa damaye, nache 'enapego' asomaye, 'eeta': «'Am 'auaỹateeta da so ña'aco' aỹem ipataxalec da selo'ogue 'enauac nam logoxoshetpi. Qaq nagui da soota'a ne'ena, nache somaye qaica ca lhuogoxo.

⁹Qaq ỹoqo'oye ne'ena nỹec qaica ca lỹa 'amaqtaqaic nachaqaỹemta. So ña'aco' qaica ca aỹem illapeguem, qaq nachaq'amta, cha'aye 'am lhua. Qaq ỹoqo'oye, ¡ca 'eeteco' da so'ot ca qauem, qataq da sacho'ot ca ỹasouaxashet Ñim Lo'onatac 'Enauacna!»

¹⁰Qaq na'aictaxa da 'enauaque soua na'axa'te da asomaye dequicto'ot da lauañi' so José, qataq da nache huetaua'a na laỹe, qalaxaye somaye saishet da ỹoqocha'a.

¹¹Qalaxaye huo'o so na'a'q, nache so José taigui so nỹec da yaqto' ỹo'ot so lo'onatac, qaq cha'aye qaica ca lỹa da hueta'a se'eso nỹec,

¹²nache asomaye ỹaconeua'alo soua alogo da nllañi somaye, nache 'enapego', 'eeta': «Aỹem 'arauañi'.» Qalaxaye so José, pa'auec nache datauec, no'onaxatchiguilo soua alogo da nache hueto'oto asomaye.

¹³Qaq asomaye co'ollaq ila'a da somaye inoxonec, qataq no'onaxatchiguilo soua alogo,

¹⁴nache asomaye iỹaxaneuga so namaxashecpi maye hueta'a se'eso nma', nache 'enapego', 'eeta': «Ña qauloỹa som hebreo maye nauegueuo so ihua, somaye anac da qomi' ỹi'inai'salo. Somaye aỹem nnoxoneua'a, nache huotaique da aỹem lauañi', qalaxaye aỹem ña'axannec da ỹa'alaxac.

¹⁵Qaq so hua'axaỹa da ỹataqta ña'axannec da ỹa'alaxac, nache pa'auec da datauec, nache no'onaxatchiguilo naua alogo.»

¹⁶Qaq ime, co'ollaxa nache asomaye ỹaỹamaxa't soua alogo so José, nache ivitta'a da nvireua'a so lma' so lhua.

¹⁷Qaq co'ollaq mashe nvireuo so lhua, nache da'aqtaxanem, 'eeta': «Som 'arlatac hebreo, maye qomi' 'anauegueua'alo, somaye inoxonoigui ñi ima', nache huotaique da aỹem lauañi'.

¹⁸Qalaxaye so hua'axaỹa da ỹataqta ña'axannec da ỹa'alaxac, nache pa'auec da datauec, nache no'onaxatchiguilo yeua alogo.»

¹⁹Qaq 'era da aỹem ỹo'otec so 'arlatac. Qaq so na'aco' so José, co'ollaq hua'axaỹa de'era la'aqtaxanaxac aso lhua, nache ỹataqta dalemata,

²⁰qaq huaña nache ỹaconeua'a so José da icoñi', ime nache damaxasoxoolec da qoỹanaigui aso ncoñetaxanaxaqui, asom netaigui so lcoñeteguishecpi so nta'a. Qaq na'aictaxa da so José netaigui aso ncoñetaxanaxaqui,

²¹qalaxaye nache 'ena'am Ñim Nataxala' hueta'aguet somaye, qataq nache queto'ot da ỹachaxaatega da lauotaxanaqtaic, qataq ỹo'ot da so ilotague' aso ncoñetaxanaxaqui ỹauotec somaye,

²²ỹoqo'oye ipataxalec da ilo'ogue 'enauac so ncoñeteguishecpi. Qaq so José nacheso som damaxasoxoolec naxa da huo'o na qaỹo'ot da huaña yemaye,

²³qaq som ilotague' aso ncoñetaxanaxaqui, saiuen da nmittac som ilotague'pi so José, cha'aye Ñim Nataxala' hueta'aguet somaye, qataq nacheñi Ñim ỹo'ot da ỹaỹamaqchiguiñi 'enauac nam ỹo'otpi somaye.