Read Batak Toba Génesis 4 Bible Online

Génesis 4 - Batak Toba bible

Génesis 4

¹Qaq so ỹale hue'eguet co'ollaxa aso lhua Eva, nache asomaye hualaxai, nache huo'o so llalec le'enaxat Caín. Nache 'enapeco': «Mashe huo'o na ỹalec ỹale. Ñim Nataxala' aỹem ỹanem.»

²Qaq ime co'ollaxa, nache qaltaq huo'o so lỹa llalec, le'enaxat Abel, som lqaỹa so Caín. Qaq so Abel, ỹataqta nalemaqteguet co'ollaxa da ilotague' ana qaguetapi, qaq so Caín, qalaq nalemaqteguet da ỹo'ottac na 'alhua.

³Qaq co'ollaq qaỹoqteguelo soua na'axa'te, nache huo'o so na'a'q da so Caín ndoua'a Ñim Nataxala' aso lachetaqtaxanaqte, ỹachegoxotaigui da lo'onataxanaxac na 'alhua.

⁴Qaq nataqa'en so Abel ndoua'a Ñim Nataxala' so ỹataqta 'onaxaic la'auaxanec llalaqpi aso lalo qaguetapi. Qaq Ñim Nataxala' ỹataqta ỹamaateguet so Abel, qataq aso lachetaqtaxanaqte,

⁵qalaxaye saishet da 'eetec de'era da ỹamaateguet so Caín, ivira'a aso lachetaqtaxanaqte. Ỹoqo'oye so Caín ỹataqta dalemata, nache qauem naqa'en da lashiguiỹaxac.

⁶Nache Ñim Nataxala' 'enapego' somaye, 'eeta': «¿Ta'ainco' da 'aualemata, qataq da qauem da 'arashiguiỹaxac?

⁷Da 'auo'ot taxa ca ỹaỹamaqchiguiñi, qaq ishet taxa da 'anamatasheguem. Qalaxaye ye saishet da 'auo'ot, nache dam nasouaxashet mashe naỹamaxattai' da 'am loxonec qome. Qamaq 'am maye ishet taxa da 'oxonec damaye.»

⁸Qaq huo'o so na'a'q, nache so Caín icoyeguen so lqaỹa Abel da yaqto' tareuga so no'onaxa. Qaq co'ollaq mashe huetrauga so no'onaxa, nache so Caín iloquiaxan so lqaỹa Abel, nache ỹalauat.

⁹Qaq huaña nache Ñim Nataxala' inat so Caín, 'eeta': «¿Hua'ague ca hueta'ague ca 'arqaỹa Abel?» Nache so Caín ỹasat, 'eeta': «Aque', sa saỹaten. ¿Maye nachaỹemo' da selotague' so ỹaqaỹa?»

¹⁰Nache Ñim Nataxala', 'enapego' somaye, 'eeta': «¿Ta'ainco' da 'auo'ot de'era? Cha'aye naua ltago'q so 'arqaỹa, maye 'aucoreleguete ana 'alhua, aỹem ỹa'alaqto'oto da so'oteque ca nalochiguiñi lataxac.

¹¹Qaq ỹoqo'oye qauem qome ca 'am talec, qataq 'am qanqateeguesop nam 'alhua maye huecoreleguete soua ltago'q so 'arqaỹa maye 'aualauat.

¹²Qaq na'aictoxo' da 'auo'onataxaalec na 'alhua, qalaxaye qaica qome ca ala ca 'añiguishec. Qataq chochaq tatec qome da 'aucoleeteguelec ana 'alhua, nache saishet da 'anmatec.»

¹³Qaq huaña, nache so Caín ỹasateguet Ñim Nataxala', 'eeta': «Aỹem, saishet da ñalo'oguet de'era lta'araic ñeuaxanaguec.

¹⁴Nagui aỹem 'auo'orauec da sheca'ai ne'ena 'alhua, qaq chochaq tatec qome da secoleeteguelec ana 'alhua qaica ca ñemataxac, nache qaỹoqtaique da qoneta. Qaq da nache 'eetec de'era, nache camachaqca ca aỹem natenalec, nache aỹem ỹalauat.»

¹⁵Qalaxaye Ñim Nataxala', ỹasateguet somaye, 'eeta': «Da huo'o ca 'am ỹalauat, nache camaye siete da qaỹe'eguelaxalec da qaỹauo'o ca nhuaxanaguec.» Nache Ñim Nataxala', ỹauo'o so na'anaxat so Caín, da yaqto' cam natenalec somaye, nache saishet da ỹalauat.

¹⁶Nache so Caín jec da ca'ai yem huaña da na'aqtaxaatague' Ñim Nataxala', nache nqo'ona da nalec ye 'alhua maye le'enaxat Nod, maye pa'aỹa'ague da nala' lliguisheguem ye Edén.

¹⁷Qaq so Caín hue'eguet co'ollaxa aso lhua, nache asomaye hualaxai, qaq ñiguiñi co'ollaxa so llalec nache ỹanagui da le'enaxat Enoc. Qaq ime co'ollaxa, nache so Caín no'oxoosheguem so huaqta'a't nỹecpi, som ỹamata'ac da le'enaxat Enoc, maye 'eeta'am da le'enaxat som llalec.

¹⁸Qaq so Enoc, nacheso so lta'a so Irad, qaq so Irad, nacheso so lta'a so Mejuyael, qaq so Mejuyael nacheso so lta'a so Metusael. Qaq so Metusael nacheso so lta'a so Lamec.

¹⁹Qaq so Lamec dos co'ollaxa soua lhua't. Aso 'oonole le'enaxat Ada, qaq aso lỹa le'enaxat Silá.

²⁰Qaq aso Ada, huo'o so llalec le'enaxat Jabal. Qaq somaye, nacheso som hua'auchiguiñi co'ollaxa da netaigui na npe'l, qataq lalo ana huaca.

²¹Qaq so Jabal huo'o so lqaỹa le'enaxat Jubal. Qaq nacheso som chegoqchigui da huo'o ana nvique arpa, qataq ana nasheere.

²²Qaq nataqa'en aso Silá deco'o co'ollaxa, nache huo'o so llalec le'enaxat Tubal Caín. Qaq nacheso so ỹo'ottac co'ollaxa na bronce qataq na lcat. Qaq so Tubal Caín huo'o aso lqaỹa maye le'enaxat Noamá.

²³Qaq huo'o so na'a'q, nache so Lamec 'enapegalo soua lhua't Ada qataq aso Silá, 'eeta': «Ñaq qana'axaỹaxañiichigui da ỹa'aqtac: salauat co'ollaxa so shiỹaxaua souaxat da aỹem ique'emaqchet, qataq salauat co'ollaxa so nsoqolec souaxat da aỹem iuaxaatac.

²⁴Qaq so Caín da siete da qaỹe'eguelaxalec da qaỹauo'o ca lvi', nache aỹem iuen qome da setenta y siete da qaỹe'eguelaxalec da qaỹauo'o ca ivi'.»

²⁵Qaq so Adán qaltaq ỹe'eguelaxalec da hue'eguet co'ollaxa aso lhua, nache asomaye huo'o so llalec, nache ỹanagui da le'enaxat Set, cha'aye 'enapeco': «Ñim Lo'onatac 'Enauacna, aỹem ỹanem na lỹa ỹalec da nmeneguet naqa'en so Abel, som ỹalauat so Caín.»

²⁶Qaq nataqa'en so Set, huo'o co'ollaxa so llalec, nache ỹanagui da le'enaxat Enós. Qaq nacheso so chegoqchigui da qaỹo'oxoren da le'enaxat Ñim Nataxala'.