Read Batak Toba Génesis 40 Bible Online

Génesis 40 - Batak Toba bible

Génesis 40

¹Qaq co'ollaq mashe qaỹoqtegue de'era, nache soua lamaxa'she so nta'a, som ỹomaxaqui lo'o, qataq som nauole lo'o, soomaye npa'agueneto co'ollaxa so na'aco't som nta'a ye Egipto.

²Qaq somaye nache dalemataỹalo co'ollaxa soua dos ltau'. Qaq soomaye nachesoua som lataxala'ate so ỹomaxaqui lo'opi, qataq som nauole lo'opi,

³nache icoñe't soomaye, ỹamaxalo so lma' som ilotague' so nhuataxauapi so nta'a, maye naña aso ncoñetaxanaxaqui. Qaq asomaye nachaso aso netaigui so José da qaicoñettai'.

⁴Nache se'eso lataxala' so nhuataxauapi so nta'a, ipataxalec co'ollaxa so José da ilo'oguelo se'esoua dos ltau' so nta'a, nache soomaye ỹataqta qaỹoqteguelo soua na'axa'te da netraigui aso ncoñetaxanaxaqui.

⁵Qaq huo'o so pe, nache se'esoua dos ncoñetegui'she, som ỹomaxaqui lo'o qataq so nauole lo'o, soomaye huo'o so lchoxonaxa'c, qaq ñi 'oonolec se'esoua nchoxonaxaco, huo'o da naigui.

⁶Qaq som nte'etom co'ollaq so José demeenaxaneua'alo soomaye, nache ilaleguete da ỹataqta huo'o da laquicoqo'.

⁷Nache inatta'ape, 'eeta': «¿Ta'ainco' nagui da daquicota dam qarashecquiaxaqui?»

⁸Nache soomaye 'ena'apo': «Qomye huo'o so qarchoxonaxac, qalaxaye qaica ca qomi' da'aqtaxanema ca naigui.» Nache so José 'enapeco': «¿Peta'a sa nacheño' Ñim Lo'onatac 'Enauacna ñim ishet da ỹa'axat ca naigui ca nchoxonaxac? Ñaq aỹem qaua'aqtaxañim nagui, cam qauchoxoñiitega.»

⁹Qaq huaña nache so lataxala' so ỹomaxaqui lo'opi, da'aqtaxanem so José so lchoxonaxac, 'eeta': «Aỹem sechoxootega da satato'ot aso uva lcheyec,

¹⁰qaq asomaye tres soua lcoue. Qaq asa'aso uva lcheyec ñaxatec ana laue, nache huo'o aso lauoxo. Qaq aso lauoxo nañigui aso mashe ỹe uva ala.

¹¹Qaq aỹem lloxoche ñasoqta'a aso nỹomaxaqui ñi faraón. Nache sacona asa'aso uva ala, nache ñelom da selomaxaangui aso ỹomaxaqui. Qaq ime, nache sanem aso ỹomaxaqui ñi faraón.»

¹²Nache so José 'enapeco': «Se'eso 'archoxonaxac, 'eeta' da naigui: soua tres lcoue aso uva lcheyec, soomaye naiguilo caua tres na'axa'te.

¹³Qaq qom inoxoorec caua tres na'axa'te nache ñi faraón qaltaq nmit qome so 'arasouaxashet. Qaq ime qome, nache qaltaq 'am ỹe'eguelaxatem da 'aro'onataxanaxac co'ollaxa. Qaq huaña nache qaltaq 'aupacta da 'aỹa'aatapeguem aca nỹomaxaqui ñi faraón, 'eeta'am so hua'autec 'aro'onataxanaxac.

¹⁴Qaq qom ipacchigui de'era, qaq no'on da aỹem 'auennata'a qome, nache aỹem 'anqouaguec qome da qonapega ñi faraón, da ñaq aỹem nqateeguesop ne'ena soota'a. ¡Ñaq aỹem 'anqouaguec qome!

¹⁵Cha'aye aỹem choche aỹem qaicachiỹa co'ollaxa, aỹem qaỹachegoxotchiguiña ye na'alhua na hebreopi, qaq ne'ena soota'a qaica ca so'ot saỹaỹamaxañi da yaqto' aỹem qoỹaataigui ana ncoñetaxanaxaqui.»

¹⁶Qaq so lataxala' so nauole lo'opi co'ollaq ila'a da so José ỹaỹamaqchiguiñi so la'aqtaxanaxac da ỹa'axat da naigui so nchoxonaxac, nache somaye 'enapeco': «Aỹem nataqa'en huo'o so ichoxonaxac, sechoxootegalo soua tres npaqtal maye laỹe' ana nauole, netaleguete na iqaic.

¹⁷Qaq aso pa'atcheguem npaqta maye laỹe' aso nauole, asomaye nlaqchigui aso ỹotta'a't pastelpi maye qaỹauotaique lqo ñi faraón, qalaxaye anac so maỹopi nache lloxoche chec aso huetagui aso npaqta maye nauole laỹe', maye netalec na iqaic.»

¹⁸Qaq huaña nache so José 'enapeco': «Som 'archoxonaxac, 'eeta' da naigui: soua tres npaqtal maye laỹe' ana nauole, soomaye naiguilo caua tres na'axa'te,

¹⁹qaq qom inoxoorec caua tres na'axa'te, nache ñi faraón qaltaq nmit qome so 'arasouaxashet, qaq qom ime, nache 'am damaxasoxoolec da 'am qaicoñerasheguemec aca qo'oipaq, nache anac qome na maỹopi da chec na 'arapat.»

²⁰Qaq co'ollaq mashe ivita so na'a'q tres, maye laloxoqui som lañoxoc so faraón, nache ỹo'ot so lta'araic lquia'axac da dequi'iỹa'ai' 'enauac so ltauapi. Qaq so faraón co'ollaq ña datataigui so lquia'axauapi, nache damaxasoxoolec da qanqateeguesopa aso ncoñetaxanaxaqui so lataxala' so ỹomaxaqui lo'opi, qataq so lataxala' so nauole lo'opi.

²¹Qaq som lataxala' som ỹomaxaqui lo'opi qalaq ỹe'eguelaxatem da lo'onataxanaxac co'ollaxa, nache somaye qaltaq ipactegue da ỹaatapeguem aso nỹomaxaqui so faraón, 'eeta'am so hua'autec lo'onataxanaxac.

²²Qaq so lataxala' so nauole lo'opi, qalaq damaxasoxoolec da qaicoñerasheguem, qaq nache ipacchigui da la'aqtaxanaxac co'ollaxa so José.

²³Qalaxaye so lataxala' so ỹomaxaqui lo'opi, saishet da tagui lauel so José.