Read Batak Toba Génesis 41 Bible Online

Génesis 41 - Batak Toba bible

Génesis 41

¹Qaq co'ollaq mashe inoxoorec soua dos vi'iye, nache huo'o so na'a'q da so faraón dechoxootega da nachattañi, hueto'ot na loigue so tala le'enaxat Nilo,

²nache se'eso tala chegoqchiguinguilo soua siete huaca maye ỹataqta 'onaxail qataq chaxarail, nache checta'ape so 'auaqpi maye huetaigui so na'aatesat.

³Qaq nca'attraueeguelo soomaye soua lỹa't siete huaca maye ỹataqta qauema qataq ỹataqta ỹapo'ote', chegoqchiguinguilo se'eso tala, nache huera'a so loigue sa qaỹapigui naqa'en soua lỹa't.

⁴Qaq ime, nache se'esoua huaca maye qauema qataq ỹapo'ote', che'c soua huaca maye 'onaxail qataq chaxarail. Huaña nache so faraón nlouec.

⁵Qalaxaye qaltaq ỹe'eguelaxañi co'ollaxa da do'oche, nache qaltaq huo'o so lỹa lchoxonaxac, somaye ilota'alo co'ollaxa soua siete ala na trigo maye ñaxattaua'alo so 'oonolec lpi'inec maye ỹataqta 'onaxaiqa, qataq nlaqchiguilo na ala.

⁶Ime, qaltaq ñaxatrec soua lỹa't siete ala na trigo maye daqaqte', qataq ỹavigaxatte' so la'at quenaquiaxaic.

⁷Nache se'esoua ala na trigo maye daqaqte', che'c soua lỹa't siete ala na trigo maye ỹataqta 'onaxaiqa. Huaña, nache nlouec so faraón, nache nanoma da choche lchoxonaxac somaye.

⁸Qalaxaye so nte'etom so lỹa na'a'q nache so faraón ỹataqta lta'araic da lhuogoxo, nache damaxasoxoneuga da qanauegueuo 'enauac som ilaviigui na lỹa, qataq so ỹaanaxanaxaicpi maye lma' ye Egipto. Qaq huaña nache so faraón da'aqtaxanem somayepi soua lchoxonaxaco, qalaxaye somayepi qaica ca ishet da ỹa'axat ca naigui.

⁹Qaq huaña nache so lataxala' so ỹomaxaqui lo'opi, 'enapego' so faraón, 'eeta': «Nagui, tachigui iuel da huo'o da so'ot sa ỹaỹamaxañi.

¹⁰Cha'aye 'am faraón, co'ollaq 'aualemataỹa so lataxala' so nauole lo'opi qataq aỹem maye aỹem 'aramaxashec, nache qomi' 'auamaxaiguilo añi ncoñetaxanaxaqui maye naña ye lma' som lataxala' nam 'am nauaatalecpi.

¹¹Qaq huo'o so pe, nache so lataxala' na nauole lo'opi huo'o so lchoxonaxac qataq aỹem huo'o so ichoxonaxac, qaq ñi 'oonolec soua qarchoxonaxaco huo'o da naigui.

¹²Qaq co'ollaq sonaqtaigui añi ncoñetaxanaxaqui, nache qomi' ỹalectaiguilo so nsoqolec hebreo, somaye l-latac som lataxala' na 'am nauaatalecpi naxa. Nache qomi' sa'aqtaxanaxam somaye soua qarchoxonaxaco, nache somaye qomi' ỹa'axatema so naigui.

¹³¡Qaq ipacchigui 'enauac nam qomi' ỹa'axatema somaye! Nache aỹem qaltaq she'eguelaxaua'a da ỹo'onataxanaxac, qaq so iỹa qalaq qaicoñerasheguem.»

¹⁴Qaq huaña nache so faraón damaxasoxoneuga so José, nache saqaỹaỹaloxon da qanqateeguesop aso ncoñetaxanaxaqui. Nache so José npetec na laue, qataq naralaxa't soua alogo, nache jec da nachaateua'a so faraón.

¹⁵Nache so faraón da'aqtaxanem somaye, 'eeta': «Aỹem huo'o so ichoxonaxac, qalaxaye qaica ca ishet da ỹa'axategue ca naigui. Qalaxaye aỹem, 'am ỹa'axaỹaxac da qoỹeetega da choche 'aua'axaỹa da qaỹa'axat ca nchoxonaxac, nache ishet da 'aua'axategue ca naigui.»

¹⁶Nache so José 'enapeco': «Damaye saishet da nachaỹem chegoqchigui. Qalaxaye 'am nta'a, Ñim Lo'onatac 'Enauacna, 'am ỹanem qome ca lasataxac maye ỹo'ot ca 'araỹamaxa.»

¹⁷Nache so faraón da'aqtaxanem so José, 'eeta': «So ichoxonaxac lloxoche ñachattañi sooto'ot na loigue so tala Nilo.

¹⁸Qaq se'eso tala chegoqchiguinguilo soua siete huaca chaxarail qataq ỹataqta 'onaxail, nache chectrac so 'auaqpi maye huetaigui so na'aatesat.

¹⁹Qaq nca'attraueeguelo soomaye soua lỹa't siete huaca maye ỹataqta qauema qataq ỹapo'ote'. ¡Qaq ỹataqta sa ỹauanapega da sauaachiguilo caua huaca da ỹataqta qauema, 'enauac ne'ena 'alhua Egipto!

²⁰Qaq se'esoua huaca maye ỹataqta qauema, che'c soua hua'auchiyiñi siete huaca maye chaxarail.

²¹Qalaxaye co'ollaq mashe ime da che'c soomaye, qaq saishet da huo'o ca nomalo da nquic da lataxa'c, cha'aye ñaq 'eetalec da ỹapo'ote' soomaye, 'eeta'am so hua'autec lataxa'c. Nache aỹem ñelouec,

²²qalaxaye qaltaq huo'o so lỹa ichoxonaxac, sechoxootegalo soua siete ala na trigo maye ỹataqta nlaqchiguilo ana ala qataq 'onaxaiqa ñaxattragui so 'oonolec lpi'inec.

²³Qataq huo'oi soua lỹa't siete ala na trigo maye ỹataqta daqaqte' qataq ỹavigaxa't so la'at quenaquiaxaic.

²⁴Qaq se'esoua ala na trigo maye daqaqte' qalaq che'c soua siete ala na trigo maye 'onaxaiqa. Qaq aỹem mashe sa'aqtaxaateguem de'era nam ilaviigui ca lỹa, qalaxaye namayepi qaica ca ishet da aỹem da'aqtaxanem ca naigui se'eso ichoxonaxac.»

²⁵Nache so José ỹasateguet so faraón, 'eeta': «'Am nta'a, soua dos 'archoxonaxaco, soomaye 'eeta'a't da naigui. Ñim Lo'onatac 'Enauacna, 'am ỹaỹaanaxanaxanec da huotaique da ỹo'ot Ñimaye.

²⁶Soua siete huaca maye ỹataqta 'onaxail, soomaye naiguilo caua siete vi'iye, qaq nache 'eeta'ama soua siete ala na trigo maye ỹataqta 'onaxaiqa, soomaye naiguilo caua siete vi'iye. Qaq se'esoua nchoxonaxaco 'oonolec da naigui.

²⁷Qaq soua siete huaca maye nca'attrauo, som ỹataqta qauema qataq ỹapo'ote', soomaye nataqa'en naiguilo caua siete vi'iye. Qaq nache 'ena'ama soua siete ala na trigo maye daqaqte' qataq ỹavigaxatte' so la'at quenaquiaxaic, soomaye nataqa'en naiguilo caua siete vi'iye da ỹataqta lta'araic ca nqouaxa.

²⁸Qaq 'era da ỹa'aqtaxanaxac 'am nta'a: Ñim Lo'onatac 'Enauacna, 'am ỹachaxana dam ỹauotaique ỹo'ot Ñimaye.

²⁹Qaq ana'c qome caua siete vi'iye maye ỹataqta qaica ca qaiueetac 'enauac na 'alhua Egipto.

³⁰Qaq qom ime, qaltaq ana'c caua siete vi'iye maye huaiguilo ca lta'araic nqouaxa. Huaña qome nache qaica ca ntooneque caua vi'iye maye huaiguilo da qaica ca qaiueetac na 'alhua Egipto. Cha'aye que'eca lta'araic nhuenaxanaxa, ỹataqta na'aqchet qome ne'ena 'alhua.

³¹Qaq ỹataqta lta'araic qome que'eca nhuenaxanaxa, huaña qome nache qaica ca ntooneque caua vi'iye maye huaiguilo da qaica ca qaiueetac.

³²Qaq 'am nta'a, dos co'ollaxa soua 'archoxonaxaco maye 'eeta'a't, cha'aye Ñim Lo'onatac 'Enauacna mashe lhuennataxac da ỹo'ot de'era, qaq damaye saqaỹaloq da ỹo'ot.

³³Qaq ỹoqo'oye 'am nta'a, no'on da 'anmitaique qome ca ỹale maye ỹataqta ỹaanataxanaxaic qataq ỹaanaxanaxaic, da yaqto' pa'aỹa'aguet da ilo'ogue ne'ena 'alhua.

³⁴Qataq 'auauo'o qome ca 'artauapi da ilo'ogue 'anqa'en 'enauaque naua 'aleu' da yaqto' laỹona't, ỹacootaua'a caua cinco nam ỹotta'a't ala na nañiguishec na 'alhua Egipto, ivitta'a da inoxoorec caua siete vi'iye maye huaiguilo da qaica ca qaiuen.

³⁵Qaq laỹona't qome 'enauac na trigo que'ecaua no'o'n vi'iye maye natrauo, nache ỹachaña cam laponqa' da yaqto' ishet da 'aulo'ogue, qataq camayepi ỹaỹamaxat, ỹachaña nam huaqta'a't nỹecpi maye ỹotta'a't naua nañalo, da yaqto' aloq na shiỹaxauapi.

³⁶Qaq yaqto' huo'o ca naỹamaqtac trigo ne'ena 'alhua, yaqto' na shiỹaxauapi saishet qome da huo'o ca ilem na lqouaxa, qom ivita da qanayeetaiguilo caua siete vi'iye maye huaiguilo ca lta'araic nqouaxa 'enauac ne'ena 'alhua Egipto.»

³⁷Qaq so faraón qataq 'enauac so ltauapi ỹataqta ỹaỹamaxareeta de'era 'enapec so José.

³⁸Nache so faraón 'enapego' somayepi, 'eeta': «¿Ishet peta'a da sanataxa ca lỹa ỹale cam 'eeta'am de'era, maye hueta'aguet som Saqcha'a La'añaxac Ñim Lo'onatac 'Enauacna?»

³⁹Nache so faraón 'enapego' so José, 'eeta': «Ỹataqta qaica ca ỹactec da ỹaanataxanaxaic qataq ỹaanaxanaxaic da 'eeta'am 'am, cha'aye Ñim Lo'onatac 'Enauacna 'am ỹaỹaanaxanaxanec 'enauac de'era.

⁴⁰Qaq nagui aỹem, 'am sepataxalec da 'aulo'ogue na ima' lta'araic qaq 'enauac qome na ihuo' le'ecpi da ỹalaxalec cam 'aramaxasoxonaxac. Qaq chaqaỹemta qome da 'am ñapactelec, cha'aye nachaỹem nta'a.

⁴¹Qaq ña 'aulochigui nagui da 'am sanem da 'aulo'ogue 'enauac na 'alhua Egipto.» Qaq co'ollaq 'enapec de'era,

⁴²nache so faraón nqat aso nchiguishaqte maye la'anaxanaqte maye netagui ana llaxaata, nache ỹanagui ana llaxaata so José. Ime, nache damaxasoxoolec da qoỹanaxanaxanguilo soua anogo maye chegaqaiguilo na lino, qataq qanqolanaxanaxaaña so nqolac oro.

⁴³Qaq ime, nache so faraón inotaxanaxaangui aso naigona maye ca'attaueegue naxa aso lalamaqte somaye, huaña nache damaxasoxoolec da qaỹa'alaqtalec da tata'ague somaye, qoỹeeta': «¡Ña qauauachiigue ca llec!» Qaq 'era da 'eetec so José co'ollaq qoỹanem da ilo'ogue 'enauac ye 'alhua Egipto.

⁴⁴Qaq huaña nache so faraón 'enapega so José, 'eeta': «Na'aictoxo' da aỹem, nachaỹem faraón, qalaxaye qaica qome ca 'oonolec shiỹaxaua ne'ena 'alhua Egipto, da hua'aualec da ỹo'ot ca sa 'auamaxalec.»

⁴⁵Nache so faraón ỹanagui so José da le'enaxat Safenat Paneaj, qataq ỹaronaxanaxaneguet aso Asenat, asom llale so Potifera, som ltaxaỹaxanaxanec na shiỹaxauapi maye lma' ye On. Qaq 'era da 'eetec so José da ilo'ogue co'ollaxa ye Egipto.

⁴⁶Qaq so José mashe ivi' co'ollaxa soua treinta vi'iye da nachaalataxac, co'ollaq qaỹauegueua'a so faraón, som nta'a ye Egipto. Qaq so José co'ollaq ca'ai yem hueta'a so faraón, nache jec da nqo'onalo naua 'aleu' 'enauac ye Egipto.

⁴⁷Qaq se'eso 'alhua ỹataqta qalota da lañaxataxac se'esoua siete vi'iye maye huaiguilo da qaica ca qaiueetac.

⁴⁸Nache so José laỹona't 'enauac nam trigo se'eso 'alhua, choche ivitta'a da inoxoorec soua siete vi'iye, qataq ỹachaña nam huaqta'a't nỹecpi maye ỹotta'a't naua nañalo, na lapoñiguishec trigo maye ỹachegoxotaña nam nanaxanaqa'pi maye nhuoreuapi.

⁴⁹Qaq so lapoñiguishec trigo so José, qalaq 'eeta'am na lsoche na 'alhua maye hueto'ot na loigue aso auaxai. Qaq cha'aye ỹataqta qalota nache ỹaxaañi da naloqteetac, cha'aye mashe qaica ca ishet da naloqten.

⁵⁰Qaq co'ollaq saxanaxa da nvildeuo soua vi'iye maye huaiguilo da nhuenaxanaxa, nache so José mashe dos soua llalqa aso lhua Asenat.

⁵¹Qaq so la'auaxanec llalec ỹanagui da le'enaxat Manasés, cha'aye 'enapeco': «Ñim Lo'onatac 'Enauacna ỹo'ot da secoua'ai 'enauac so ñeque'eenaxac, qataq 'enauac ca ihuo' le'ecpi.»

⁵²Qaq so dalaxaic llalec qalaq ỹanagui da le'enaxat Efraín, cha'aye 'enapeco': «Ñim Lo'onatac 'Enauacna aỹem ỹanem da huo'oi naua ỹalqa, huaña ne'ena 'alhua maye huaña da ñeque'eenaxac.»

⁵³Qaq co'ollaq inoxoorec soua siete vi'iye maye huaiguilo da qaica ca qaiueetac yem 'alhua Egipto,

⁵⁴nache qaltaq nvildeuo soua siete vi'iye maye huaiguilo da nhuenaxanaxa, qaq ipacchigui da 'enapec co'ollaxa so José. Nache huo'o co'ollaxa so nqouaxa 'enauac na 'alhuapi, qaq chaqyeta ye Egipto da huo'o na nallec.

⁵⁵Qaq na lma' ye Egipto co'ollaq mashe huo'o na lqouaxa, nache nqo'oneua'a so faraón da iỹaxanot da ỹanem ca trigo, nache so faraón 'enapego' 'enauac som Egipto le'ecpi, 'eeta': «Qanqo'oñiỹa qome ca José, qaq cam la'aqtac camaye, nacheca qauo'oche.»

⁵⁶Qaq yi'iye 'alhua co'ollaq mashe ỹaguec na nqouaxa, nache so José ỹauatoigui 'enauac so laỹe'pi na trigo da yaqto' imenot so Egipto le'ecpi, cha'aye se'eso nqouaxa nquictauec.

⁵⁷Qaq 'enauac som hueta'a nam laỹepi 'alhuapi naỹa co'ollaxa ye Egipto da desheenaxana na trigo maye lmenec so José, cha'aye qaica ca lỹa 'alhua da huaña na nallec.