Read Batak Toba Génesis 44 Bible Online

Génesis 44 - Batak Toba bible

Génesis 44

¹Qaq co'ollaq ime de'era, nache so José ỹamaq so ilotague' so lma', 'eeta': «'Auỹoxoguilo qome na trigo 'enauaque caua lachoxonaxaqui' ne'enaua shiỹaxau', maicheye cam tachiguiiña cam ishet da ỹache', qataq 'auachanguilo qome naua ala'api caua lachoxonaxaqui' aca alom ñi 'oonolec naamaye.

²Qataq nataqa'en 'auachangui qome na alap ca lachoxonaxaqui dam lqaỹa na'asa aca ñeỹomaxaqui maye chegaqaigui na plata, 'auauaxaỹaxaate' qome aca alom maye lsheetenaxanaqte da isheeten na trigo.» Nache som ilotague' so nma', ỹo'ot co'ollaxa 'enauac nam ỹamaxalecpi so José.

³Qaq co'ollaq nnoxotcheguem aso nala' so lỹa na'a'q, nache so José ỹasheetrec soua lqaỹa't da je'c, lỹatrec soua lalo 'ashena.

⁴Qaq co'ollaq saxanaxa da qaỹoqteueeguelo soomaye da quera'ai yem huaqta'a't nỹecpi, nache so José 'enapego' so ilotague' so lma', 'eeta': «'Aue qome, 'aucaaleguete se'esoua shiỹaxau', qaq qom 'avi't soomaye, nache qonapegalo, qoneta': Aỹem qami' so'oteque da ỹaỹamaqchiguiñi, qaq nagui qalaq ¿Ta'ainco' ye aỹem qauo'ochec da qauem? ¿Ta'ainco' da qaucachiỹai aca ỹomaxaqui maye chegaqaigui na plata,

⁵maye nỹomaxaqui naxa ñi ña'aco', qataq lo'onataxanaqte naxa da huotaique da huo'o ye ỹaỹaten? ¡Qami' ỹataqta qauem da qauo'oche!»

⁶Nache so ilotague' so nma', co'ollaq ivi't soomaye, nache ỹataqta ipagaqchiichigui som na'aqtac maye qoỹanem.

⁷Nache soomaye 'ena'apo': «¿Ta'ainco' da qonetec de'era da qomi' qonapegalo? ¡ye qomi' saỹauano' da so'otaq ca 'eeta'am de'era!

⁸Ye qomi' soua lỹa't na'axa'te sachegoxosoqchiguiña ye Canaán da ñe'eguelaxataq aso anom maye selaqalec da huetanguilo naua ala'api soua qarachoxonaxaqui'. Qaq ¿taloxochiyo' taxa da secachaxa aca plata huo'otaq oro yem lma' som 'ana'aco'?

⁹Qaq no'on da qaỹalauat qome ca 'oonolec ne'enaua 'aramaxa'she da huo'otaq hueto'ot aca ỹomaxaqui, qaq qomi' nataqa'en ishet qome da 'auauo'oi qomi' 'arlataqa.»

¹⁰Qaq huaña nache so ilotague' so nma', 'enapeco': «Aja', dam qoñiỹapec, nachera qome da qaỹo'ot. Qalaxaye nachaqcata qome ca hueto'ot aca ỹomaxaqui maye ishet da sauo'o ỹamaxashec, qaq caua lỹa't qalaq huesochiyiñi qome, qaica ca lasouaxashe't.»

¹¹Nache ñi 'oonolec soomaye sa ỹaỹaloxo'n da nqaayiñi soua lachoxonaxaqui'. Ime, nache ỹauanguilo.

¹²Nache so ilotague' so nma', nmichigui ñi 'oonolec soua nachoxonaxaqui', ỹa'auaxaachiguiñi so lachoxonaxaqui so nqaỹa ỹe, nache ivitta'a so na'asa. Qaq huaña, nache ilalec aso ỹomaxaqui huetagui so lachoxonaxaqui so Benjamín.

¹³Nache soomaye ncolaxata'aisalo soua alogo, da la'anaxat da nqui'i'c. Qaq ime nache ñi 'oonolec soomaye ỹasaxalec so lla'ac soua lalo 'ashena, nache ỹe'eguelaxareua'a so huaqta'a't nỹecpi.

¹⁴Qaq so Judá qataq soua lqaỹa't co'ollaq ivildeua'a so lma' so José, nache somaye ñaq hueta'a so lma'. Qaq huaña, nache soomaye ỹa'alyiñi naua l-llecte, nache iviraxata'agueta naqa'en naua lata'api na 'alhua.

¹⁵Nache so José 'enapegalo', 'eeta': «¿Ta'ainco' da aỹem qauo'ochec de'era? ¿Sa qauaỹaañiỹo' peta'a da ca shiỹaxaua maye 'eeta'am aỹem ishet da ilaviigui ca lỹa?»

¹⁶Nache so Judá 'enapeco': «¿Hua'agom ca 'eetec ca qarasataxac da 'am sasataxaguet? ¿Qataq negue'tom ca qara'aqtac da shenaqpec da qaica ca sasouaxataq? Ye Ñim Lo'onatac 'Enauacna mashe ilalec da qarasouaxashet. Qaq nagui qomi' souaqta'a ne'ena, qaq ñañanaq da 'auauo'oi qomi' 'arlataqa, qarỹateuo dam hueto'ot aso ỹomaxaqui.»

¹⁷Qalaxaye so José 'enapeco': «'A'i, saishet da nache sheetec de'era. Nachecata qome cam hueto'ot aca ỹomaxaqui da sauo'o ilatac. Qaq naua lỹa't, qalaq ishet qome da ỹe'eguelaxalo ca lma' ca lta'a, nda'a't qome da qaica ca machaqca.»

¹⁸Nache so Judá nquicot so José, nache 'enapega 'eeta': «'Am ñachoxonnot, 'am ỹataxala', da aỹem 'auasheetem da huo'o catai' ỹa'aqtacolec da 'am sesoxootot. Aỹem 'arqouaguec qome, saishet da aỹem 'aualemataỹa, cha'aye 'am nache qoneta'am ñi Faraón.

¹⁹'Am qomi' 'aunatta'ape co'ollaxa soua lỹa't na'axa'te, da huo'o ca qarta'a qataq da huo'o ca lỹa qarqaỹa,

²⁰nache qomi' 'am sasataxaguet da ñaq huo'o ñi qarta'a maye mashe ỹa'axaiquiolec, qataq ñi qarqaỹa maye ñaq nsoqolec. Ñim ñiguiñi co'ollaq mashe ỹa'axaiquiolec ñi qarta'a. Qataq nataqa'en 'am sa'axataqtapeguem da ñi qarta'a ỹataqta lauotaxat ñimaye, cha'aye Nacheñita ñimaye da no'onañi llalec aso lhua, cha'aye so lỹa lqaỹa mashe ileu.

²¹Qaq huaña, nache 'am qomi' 'auỹaxanoto da ishet da ñauegaq ñimaye, cha'aye 'auauotaique da 'auauatton.

²²Qaq qomi' 'am sa'axataqtapeguem co'ollaxa da ñi'iñi nsoqolec saishet da ca'ai ñi lta'a, cha'aye da ca'ai, nache ñi lta'a ishet da ileu.

²³Qalaxaye 'am qomi' qonapegalo co'ollaxa da saishet da qomi' nca'ateguelo ñimaye, nache saishet da qaltaq qomi' 'aulo'ogueta.

²⁴Qaq ỹoqo'oye co'ollaq she'eguelaxasoq, nache sa'aqtaxanaqtapeguem ñi qarta'a 'enauac nam 'ara'aqtacpi co'ollaq qomi' qonetegalo.

²⁵Qaq ỹoqo'oye ñi qarta'a qomi' 'enapegalo, 'eeta': Qavi'iguelaqai qome da qausheenaxañiỹaique ca saq 'amaqtaq trigo,

²⁶qalaxaye qomi' shenaqtega ñimaye, shenaqta': Qomi' saishet da qolaq qom saishet da qomi' ca'ateguelo ñi qarqaỹa na'asa, cha'aye ñimaye da saishet da qomi' nnaicapegueto, nache saishet qome da qaltaq ñauanaxai' ñi'iñi ỹale.

²⁷Qaq ñim ita'a qomi' 'enapegalo, 'eeta': Qami' qauaỹaañeta da aso ihua doosolqa naqa'en naua ỹalqa.

²⁸Qaq 'oonolec so mashe jec da aỹem ca'ai, qaq nache chegoqta'a so jec, da saishet da qaltaq sela'a. Qaq ỹataqta sepeta'a da ito ca huauec shiguiỹac maye dequi'iỹapec.

²⁹Qaq da qaltaq qauaviqui ñi lỹa ỹalec, nache da huo'o ca huaigui qauem, nache qami' qauasouaxache qome da ne'ena ỹa'axaiquiolec ilem da laquicoxo.

³⁰Qaq ỹoqo'oye da nachaalataxac ñi ita'a ỹataqta na'atta'aguet da nachaalataxac da nsoq, qaq ỹoqo'oye dam nsoq da huo'otaq saishet da ñenaigaqtague' qom she'eguelaq,

³¹nache ñi qarta'a ishet qome da ileu souaxat da sa ila'a damaye. Qaq huaña nache qomi' qarasouaxashet da ñim ỹa'axaiquiolec maye qarta'a, ilem da laquicoxo.

³²Qaq aỹem shenapega co'ollaxa ñi ita'a, da aỹem maiche selo'ogue da nsoq. Qaq nataqa'en shenapega, sheeta': Qom saishet da 'am ñe'eguelaxata damaye, nache da ỹasouaxashet 'am hueto'ot qome 'enauaque naua vi'iye da ñachaalataxac.

³³Qaq ỹoqo'oye 'am ñachoxonnot da aỹem 'auaconeguet qome da ño'onañi da yaqto' 'auauo'o aỹem 'arlatac, da ñemeneguet da nsoq. Qaq 'aua'aqta'a qome damaye da ca'ateguelo daua lqaỹa't.

³⁴Cha'aye ¿ca 'eeteco' da she'eguelaxa ca ita'a da saishet da ñenaictague' da nsoqolec? Cha'aye aỹem sa saỹamaxaren da selotagui qome ca nque'eenaxac ca ita'a.»