Read Batak Toba Génesis 46 Bible Online

Génesis 46 - Batak Toba bible

Génesis 46

¹Qaq huaña, nache so Israel jec, ỹache 'enauac som huo'o logoxoshetpi. Qaq co'ollaq ivita ye Berseba, nache ỹauo'o aso ỹavigaxat lachetaqtaxanaqte da ỹanot Ñim Natamnaxala' so lta'a Isaac.

²Qaq se'eso pe, nache Ñim Lo'onatac 'Enauacna detaxaỹapegue' so Israel, huaigui naqa'en so lo'ochaxa, da iỹaxana da le'enaxat, 'eeta' ¡Jacob! Nache somaye ỹasat, 'eeta': «Aja', aỹem soota'a ne'ena.»

³Nache Ñim Lo'onatac 'Enauacna 'enapeco': «Aỹem Nachaỹem Ỹo'onatac 'Enauacna maye Natamnaxala' so 'arta'a. Saishet qome da 'añi'i da 'anqo'ona ye Egipto, cha'aye huaña qome yemaye, nache so'ot da ca 'am chegoxoguetpi ỹataqta qalota qome.

⁴Qataq 'am ñenaictague' qom 'anqo'ona ye Egipto, qataq nachaỹem qome ñeqateeguesop yemaye cam 'am chegoxoguetpi. Qataq da lỹa 'eeta': qom 'aleu, nache ñi José huetaua'a qome na 'araỹe.»

⁵Qaq co'ollaq ime de'era, nache so Jacob ca'ai ye Berseba. Nache soua llalqa so Israel, inotaxanaxaangui so lta'a qataq so llalaqpi qataq aso lhuapi soua naigonal maye ỹama'q co'ollaxa so faraón da ỹauotaique lachaxaqui' somaye.

⁶Nache so Jacob qataq 'enauac so lalamaxatpi nqo'ona ye Egipto, nache ỹo'orelec aso lalo huacapi qataq aso qaguetapi qataq 'enauac som ishet da ỹachegoxotaña co'ollaxa ye 'alhua Canaán.

⁷Qataq 'enauac so llalaqpi qataq aso llalpi, qataq so laualpi ỹalleppi qataq 'alpi, da lỹatec somaye.

⁸Qaq 'ena nam le'enaxatpi so Israel llalaqpi maye taỹa co'ollaxa ye Egipto, qaq damaye 'eeta': So Jacob qataq som chegoxoguetpi: So Rubén maye la'auaxanec llalec so Jacob.

⁹Qaq soua llalqa so Rubén: Janoc, Falú, Jesrón qataq so Carmi.

¹⁰Qaq soua llalqa so Simeón: Jemuel, Jamín, Oad, Jaquín, Sojar qataq Saúl som llalec aso 'alo maye lma' ye Canaán.

¹¹Qaq soua llalqa so Leví: Gersón, Coat qataq so Merari.

¹²Qaq soua llalqa so Judá: Er, Onán, Selá, Fares qataq so Seraj. Qalaxaye so Er qataq Onán, ileu' co'ollaxa hueraña ye 'alhua Canaán. Qaq soua llalqa so Fares: Jesrón qataq so Jamul.

¹³Qaq soua llalqa so Isacar: Tola, Fuvá, Job qataq so Simerón.