Read Batak Toba Génesis 9 Bible Online

Génesis 9 - Batak Toba bible

Génesis 9

¹Qaq Ñim Lo'onatac 'Enauacna, ỹanema de'era no'on la'aqtac so Noé qataq soua llalqa, 'eeta': «Ỹataqta qalota qome ca qaỹa'alqui, nache qanlaxachiitelec ana 'alhua.

²Qaq 'enauac na shiguiỹacpi, maye huetalec ana 'alhua ỹataqta huo'o qome da lcolanaxa da qoñiita. Qataq 'enauac na huaỹotac, qataq na huetalec ana 'alhua, qataq na 'etaxat le'ec, 'enauac da qami' sanema da qauloỹeegue qome.

³Qaq ishet qome da qolliqui 'enauac na shiguiỹacpi, qataq ana nañiguishe huoue maye qanallec. Aỹem qami' sanema.

⁴Qalaxaye saqata da saishet qome da qolliqui, ca lapat maye ñaq huetagui na ltago'q, cha'aye naua ntago'q nachenaua naua huetaiguilo da achaalataxac.

⁵Aỹem qami' sevitaqna'agueta naua ltago'q ca shiỹaxaua qataq ca shiguiỹac. Cha'aye ñi 'oonolec shiỹaxaua senat qome, ca 'eetec naqa'en da nachaalataxac ca 'eeta'am lỹa.

⁶Da huo'otaq huo'o ca ỹalauat ca lỹa shiỹaxaua, nache ca lỹa shiỹaxaua ỹalauat qome camaye, cha'aye co'ollaq qaỹo'ot so shiỹaxaua, nache 'eeta'am qanqa'en da lataxac Ñim Lo'onatac 'Enauacna.

⁷Qalaxaye qami', saqalota qome ca qaỹa'alquipi nache nlaqtelec qanqa'eñi ana 'alhua camayepi.»

⁸Qaq Ñim Lo'onatac 'Enauacna, nataqa'en 'enapega so Noé, qataq soua llalqa, 'eeta':

⁹«Ñaq qauloichigui, Aỹem llapaxañi da ñaỹamaxataxac da qami' ñaỹamaxatto, qataq cam qaỹa'alquipi qome,

¹⁰qataq 'enauac nam shiguiỹacpi maye qami' hueta'agueta, nam chegaqaigui añi notaxaqui: maỹopi, na shiguiỹacpi nlopi, qataq nam huauec, qataq 'enauac nam shiguiỹacpi maye huetalec ana 'alhua.

¹¹Qaq da ñaỹamaxataxac da qami' ñaỹamaxatto, damaye saishet qome da nqochen: saishet qome da qaltaq she'eguelaxalec da selaxachigui na shiỹaxauapi, qataq na shiguiỹacpi, da serolec ca auot lta'araic. Qataq sa lỹa da ỹe'eguelaxalec da huo'o ca auot lta'araic, da nlaxaañi ana 'alhua.

¹²Qaq 'era da la'anaxat da ñaỹamaxataxac, maye chochaq tatec da qami' ñaỹamaxatto, qataq 'enauac na shiguiỹacpi:

¹³Aỹem, sanaigui so lo'oc na piguem so qomoxonalo, qaq nacheso qome so la'anaxat da ñaỹamaxataxac, da naỹamaxate' 'enauac na huetalec ana 'alhua,

¹⁴yaqto' qom ñamaq na lo'oc na piguem, da ñamaxalec ana 'alhua, nache yo'oq qome so qomoxonalo da huetaigui namaye.

¹⁵Qaq huaña qome, nache tachigui ye iuel, da ñaỹamaxataxac, co'ollaq qami' ñaỹamaxatto, qataq 'enauac na shiguiỹacpi. Qaq nache saishet qome da qaltaq huo'o ca auot lta'araic da qami' ilaxachiguilo.

¹⁶Qaq so qomoxonalo, qom huetaigui na lo'oc na piguem, qom sela'a, nache tachigui ye iuel dam chochaq tatec ñaỹamaxataxac, co'ollaq ñaỹamaxate' 'enauac na shiỹaxauapi, qataq 'enauac na shiguiỹacpi, maye huetalec ana 'alhua.

¹⁷Qaq 'era da la'anaxat da ñaỹamaxataxac maye llapaxañi, da ñaỹamaxate' 'enauac na shiỹaxauapi, qataq na shiguiỹacpi maye huetalec ana 'alhua.» Qaq 'era da la'aqtac Ñim Lo'onatac 'Enauacna, co'ollaq detaqtague' so Noé.

¹⁸Qaq soua llalqa so Noé, maye chegoqraigui aso notaxaqui, soomaye nachesoua so Sem, Cam, som lta'a so Canaán, qataq so Jafet.

¹⁹Qaq 'esoua soua tres llalqa so Noé, qaq soomaye qataq som llalaqpi, nache chegoqchigui da qaltaq qanayenalec ana 'alhua.

²⁰Qaq so Noé, ỹacoolec co'ollaxa da do'onataxaalec na 'alhua, nache ỹaañi aso uva.

²¹Qaq huo'o so na'a'q, nache so Noé nỹomgui so lataxa, nache taxaic, nache huetaiya', qataq huetauec, huetaigui na lauel so lpe'l.

²²Qaq so Cam, som lta'a so Canaán, co'ollaq ila'a so lta'a da huetauec, nache pa'auec da da'aqtaxanema soua dos lqaỹa't.

²³Qaq huaña, nache so Sem qataq so Jafet ỹacoora so npo', nache lapaxaleguete naua maiche lallaco soomaye, qaq nacheso se'eso npo' da dapoxoora da ỹapolec so lta'a'. Qaq da yaqto' saishet da ilotragui so lta'a' da huetauec, nache je'c qalaxaye qoshetraua'a so hueta'a somaye, qataq ỹaqa'a da ilotra'ague.

²⁴Qaq so Noé nlouec co'ollaq mashe imeuec so ltaxa, qaq co'ollaq ỹaỹaten dam ỹo'otec somaye, som llalec na'asa,

²⁵nache 'eeta': «¡Ỹataqta qauem qome ca talec ñi Canaán! ¡Ñimaye choche l-latac qome naua dos lqaỹa't!»

²⁶Qaq ime qaltaq 'enapec: «Qaỹo'oxoren qome Ñim Nataxala', maye natamnaxala' ñi Sem, qaq ñi Canaán qalaq choche l-latac qome ñi Sem.

²⁷Qataq Ñim Lo'onatac 'Enauacna nquigaxattauec qome ñi Jafet, qataq lmayaxaua naqa'en ñi Sem, qaq ñi Canaán qalaq choche nlatac qome.»

²⁸Qaq co'ollaq mashe qaỹoqtegue so auot lta'araic, nache so Noé, qaltaq ivi' soua trescientos cincuenta vi'iye da nachaalataxac.

²⁹Qaq ivi' soua novecientos cincuenta vi'iye co'ollaxa da nachaalataxac, nache ileu.