Read Tobelo O KEJADIAN 1 Bible Online

O KEJADIAN 1 - Tobelo bible

O KEJADIAN 1

¹Madodihirakahi, maöraha ma Jou Madutu womulaenge wohidadi o dihanga de o dunia

²o dunia koitükowahi, deʼ kairuaeukuohi. O ngöto deʼ malulu, yatamunuku hagala mata-mata, ohuhutu yahawoino, mä ma Jou Madutu Ai kuaha imanarama o akere mal̄okuino.

³ Ma Jou Madutu wotemo, ”O dararono idadi!” Ipaha naga o dararono.

⁴Ma Jou Madutu wosanangi wamake ohali gënanga. De ipaha o dararono gënanga deʼ o huhutu wohi tingaka,

⁵deʼ o dararono gënanga wohiromanga ”O Wange-wange” deʼ o huhutu gënanga wohiromanga ”O Hutu-hutu”. O hutu ipaha, de idadi o ngorumino. Genanga owange madodihiraka.

⁶ Ipaha ma Jou Madutu wotemo, ”Idadi odadatoko itatanguku ogahumu moi la ya regu o akere idadi oregu hinoto, deʼ yatumungu o ngï hinoto ima boritingakika.” Ipaha ohali gënanga ima dadi. Hoko gënanga ma Jou Madutu wadiai o dadatoko itotätanguku ihitotinga-tingaka o akere o dadatoko itotatangu matimiuku, deʼ naga o dadätoko mal̄okuoka.

⁸O dadatoko i totatanguku gënanga Wohiromanga ”O Dihanga.” O hutu ipaha deʼ idadi o ngorumino. Genanga owange mahinotoka.

⁹Ipaha ma Jou Madutu wotemo: ”Kokiani o akere naga o dihanga matimiuku ihahuru o ngï moika, hiädono o tonaka hamake.” Ipaha o hali gënanga imadadi.

¹⁰Ma Jou Madutu wohiromanga o tonaka gënanga ”O Dudungu”, deʼ o akere madoomu gënanga Wohiromanga ”O Ngöto”. De ma Jou Madutu wosanangi wamake ohali gënanga.

¹¹Ma Jou Madutu wotemoli, ”Kokiani o tonaka ihi hupu hagala irupa o joro, enagënanga marupa ihihasili imui-mui de ma rupa ihi hasili ihö hohoko.” Ipaha o hali gënanga imadadi.

¹²Hoko gënanga o tonaka ihihupu hagala i rupa o joro. De ma Jou Madutu wosanangi wamake ohali gënanga.

¹³O huhutu ipaha deʼ idadi o ngorumino. Genanga o wange ma hangeoka.

¹⁴De ipaha ma Jou Madutu wotemo, ”Kokiani naga o baranga itotararono o dihangoka la yatararono o dunia, la o hutu-hutu de o wange-wange ihitingaka, deʼ la ihidumutu maöraha imulaenge o wange, o taongo, deʼ o agama ma amoko”. Done o hali gënanga imadadi.

¹⁶Hoko gënanga ma Jou Madutu wodiai o gahumu hinoto o baranga itotararono ma ago-agomo, enagënanga owange malako la ya kuaha o wange-wange, deʼ o mede la yakuaha o hutu-hutu; ma mahomoa deʼ gënanga Wodiaiö hagala o murumu.

¹⁷Ma Jou Madutu wohi gogere obaranga itotarono gënanga o dihangoka la yatararono o dunia,

¹⁸la yakuaha o wange-wange de hutu-hutu, de mangale ihitingaka o dararono de o huhutu. De ma Jou Madutu wosanangi wamake o hali gënanga.

¹⁹O huhutu ipaha, deʼ idadi o ngorumino. Genanga o wange maiatoka.

²⁰Ipaha ma Jou Madutu wotemo, ”Kokiani o akere magoronaka mangoë marupa de matikaoka o dodadi mangango, de o gitawaoka mangoë hagala totaleo ihöhoho.”

²¹Ma Jou Madutu wohidadi o ngöto ma aiwani-aiwani ma ago-agomo, deʼ hegala irupa o dodadi iwowango-wango o akere magoronaka, inoli hegala irupa ototaleo. De ma Jou Madutu wosanangi wamake ohali gënanga.

²²Ma Jou Madutu wohibarakati mata-mata gënanga deʼ Wohidöaka o pareta o dodadi iwöwango-wangoika o akere magoronaka hupaya i fäta de yaömanga o ngöto, deʼ ototaleoika hupaya idogo-dogo i woë.

²³O huhutu ipaha deʼ idadi o ngorumino. Genanga owange ma motoaka.

²⁴De ipaha ma Jou Madutu wotemo, ”Kokiani o dunia ihi hupu hagala i rupa, o aiwani o dudungoka, idö dana-dana deʼ ihö huhuhuku, ma ago-agomo ekola mahohumujuru.” Ipaha ohali gënanga imadadi.

²⁵Hoko gënanga ma Jou Madutu wadiai mata-mata gënanga deʼ Unanga wosanangi wamake ohali gënanga.

²⁶ De ipaha ma Jou Madutu wotemo, ”Oraha nanga Ngone aha hodiai o nyawa aha yodadi hokä Ngone deʼ manga rupa hokä Ngone. Onanga aha yakuaha hagala onawoko, o totaleo, deʼ hagala o aiwani mahomoa kayaoa idödana-dana kayaoa ihöhuhuku kayaoa ma ago-agomo kayaoaö mahohumujuru.”

²⁷ Hoko gënanga ma Jou Madutu wahidadi o nyawa, deʼ wahidadi önanga hokä Ai diri mahirete. Wahidadi önanga o nauru deʼ ongoheka.

²⁸De ipaha wahibarakati önanga deʼ mademo ”Ningohaka deʼ ni-danongo nima woë-woë, hupaya niadifauku yogogere o dunia mal̄okuoka mata-mataika ikali yakuaha. Ngini Tinihikuaha nihidö dailako hagala o nawoko, o totaleo, deʼ mata-mata o aiwani mahomoa ihühuhuku.

²⁹Idadi nia inomo Tinihidoaka nginika hagala rupa o joro, enagënanga marupa ihihasili i mui-mui deʼ marupa ihihasili ihöhohoko.

³⁰Mä hagala ototaleoika deʼ o aiwani ihöhuhuhuku ma homoa, Tohidoaka omomo deʼ o hoka-hoka toenanga mainomo.” Done o hali gënanga imadadi.

³¹Ma Jou Madutu wamake hagala moi-moi wadodiaioka gënanga, deʼ Unanga duru wosanangi. O huhutu ipaha deʼ idadi o ngorumino. Gënanga o wange mabutangaka.