Read Tobelo O KEJADIAN 11 Bible Online

O KEJADIAN 11 - Tobelo bible

O KEJADIAN 11

¹Mahiraino o hoana deʼ o berera manyawa o dunia yamode-modekika manga bahasa duga-duga kamoi, deʼ önanga yapake manga demo imakoketero.

²Maöraha önanga yotagi-tagi o wange mahiwaroko, önanga i ma hiädono o Babilonia matonaka moi i rata-rataikaoka, daha gënangoka yö gogere.

³Önanga imaketemo moi deʼ moika, ”Ika ngone hodiai o tonaka madoka-dokara deʼ haharongo hiädono i togowini.” Hoko gënanga önanga deʼ manga tela idadi otau mahelewo mahohol̄e deʼ o teri idadi manga tataulu.

⁴Önanga imaketemo, ”Niaino ngone hohigoko o kota, de o gahumu moi o candi matubu hiädono o dihangil̄e, hupaya ngone kainäheto-hetongo deʼ uha hokerewoto o dunia yamode-modekika.”

⁵Done ma Jou wouti mangale wölega o kota deʼ o candi ihi goko-goko o nyawa.

⁶Daha Unanga wotemo, ”Neonanga nënanga kao hoana deʼ o berera moi, deʼ manga demo kamoi, deʼ nënanga daha madodihiraka toönanga manga hidailako. Itedekanokauaoli önanga aha yakunu yadiai okia dika toönanga manga mau-mau.

⁷Iholoi yaoa Ngone houti deʼ haruae manga demo hupaya önanga moi deʼ moi imateke mangaratiokaua.”

⁸Hoko gënanga ma Jou wähigerewotoönanga o dunia yamode-modekika. Daha önanga imatogumu ihigoko o kota gënanga.

⁹Hababu gënanga o kota gënanga ihiromanga o Babel, karana gënangoka ma Jou waruae manga demo mata-mata o berera deʼ o hoana manyawa, deʼ gënangokadau onanga ma Jou wähigerewoto o dunia mata-mataika.

¹⁰Neonanga doka o Sem aidifauku. O taufani ma amo-amoko ipahaika o taongo hinoto, maöraha o Sem ai umuru o taongo ratuhu moi, ünanga wamake o ngohaka o nauru womatengo ai romanga o Arpakhsad.

¹¹Ipaha gënanga ünanga kawowangohi o taongo o ratuhu motoahi, deʼ wamake o ngoha-ngohaka mahomoa.

¹²Maöraha o Arpakhsad ai umuru o taongo moruange deʼ motoa, ünanga wamake o ngohaka o nauru ai romanga o Selah.

¹³Ipaha deʼ gënanga o Arpakhsad kawowangohi o taongo o ratuhu iata deʼ hangeohi, deʼ wamake o ngoha-ngohaka mahomoa.

¹⁴Maöraha o Selah ai umuru o taongo moruange, ünanga wamake o ngohaka o nauru ai romanga o Eber.

¹⁵Ipaha deʼ gënanga o Selah kawowangohi o taongo o ratuhu iata deʼ hangeoli, deʼ wamake o ngoha-ngohaka mahomoa.

¹⁶Maöraha o Eber ai umuru o taongo moruange deʼ iata, ünanga wawake o ngohaka o nauru ai romanga o Peleg.

¹⁷Ipaha gënanga o Eber kawowangohi o taongo o ratuhu iata deʼ moruangeohi, wamake o ngoha-ngohaka mahomoa.

¹⁸Maöraha o Peleg ai umuru o taongo moruange, ünanga wa make o ngohaka o nauru ai romanga o Rehu.

¹⁹Ipaha deʼ gënanga o Peleg kawo wangohi o taongo o ratuhu hinoto deʼ hiwohi, deʼ wamake o ngoha-ngohaka mahomoa.

²⁰Maöraha o Rehu ai umuru o taongo moruange deʼ hinoto, ünanga wamake o ngohaka o nauru ai romanga o Serug.

²¹Ipaha deʼ gënanga o Rehu kawowangohi o taongo o ratuhu hinoto deʼ tumidohi deʼ wamake o ngoha-ngohaka mahomoa.

²²Maöraha o Serug ai umuru o taongo moruange, ünanga wamake o ngohaka o nauru ai romanga o Nahor.

²³Ipaha gënanga o Serug kawowangohi o taongo o ratuhu hinotoli, deʼ wamake o ngoha-ngohaka mahomoa.

²⁴Maöraha o Nahor ai umuru otaongo monaoko deʼ hiwo, ünanga wamake o ngohaka o nauru ai romanga o Terah.

²⁵Ipaha deʼ gënanga o Nahor kawowangohi o taongo o ratuhu moi deʼ ngimoi deʼ hiwoli, deʼ wamake o ngoha-ngohaka mahomoa.

²⁶Ipaha deʼ o Terah ai umuru o taongo moritumidi, ünanga wa make o ngohaka o nauru yaruange enagënanga o Abram, o Nahor deʼ o Haran.

²⁷Neönanga doka o Terah aidifauku: O Terah, o Abram, o Nahor, deʼ o Haran manga ama. O Haran deʼ aingohaka o nauru ai romanga o Lot.

²⁸O Haran wohonenge ai kapongoka, enagënanga o Ur, o Babilonia matonakoka: maöraha ai ama kawowangohi.

²⁹O Abram wokawingi deʼ o ngo Sarai, deʼ o Nahor wokawingi deʼ ongo Milka o Haran ngoi ora. O Haran de aingohaka o nauru mahomoahi ai romanga o Yiska.

³⁰O ngo Sarai gënanga mo fätua.

³¹O Terah wamal̄a o Ur makota o Babilonia ma tonakoka kama moi deʼ O Abram aingohaka deʼ o Lot ai danongo, deʼ o ngo Sarai ngoi mol̄oka, enagënanga o Abram ngoihekata. Unanga ai dumutu woiki o Kanaan mabereraika. Mä deʼ o Haran imahiadonika önanga yögogere genangoka.

³²Deʼ genangokadau o Terah wohonenge ai umuru o taongo ratuhu hinoto deʼ motoa.