Read Tobelo O KEJADIAN 12 Bible Online

O KEJADIAN 12 - Tobelo bible

O KEJADIAN 12

¹ Ma Jou wïtemo o Abramika, ”Namal̄a ani berera, ani roriadodoto deʼ ani ama ai tau, deʼ o berera aha Ngohi tonihidö dumu-dumutu ngonaika noiki gënangika.

²Ngohi aha tonihidöaka ngonaika o ngohaka de o danongo mangangoë, deʼ önanga aha yodadi o berera deʼ o hoana ma ago-agomo. Ngohi aha tonihi barakati ngona deʼ Tadiai ani romanga kaya heto-hetongo, hiädono ngona aha nodadi o barakati.

³ Ngohi aha tahibarakati o nyawa inihi böbarakati ngona deʼ tahilolai o nyawa inihi lololai ngona. De karana ngona Ngohi aha tahi barakati mata-mata o nyawa o duniaka.”

⁴O Abram ai umuru o taongo moritumidi deʼ motoa maöraha ünanga wamal̄a o Haran maberera, ima moteke deʼ ma Jou Aipareta ünangika. O Abram womä jobo o Kanaan matonakika kama moi deʼ ongo Sarai ngoihekata, deʼ ai dodoto aingohaka o Lot, deʼ hagala ai arata deʼ o gogilaongo önanga yamömake-make o Haran mabereraka. Onanga imahiadonika o Kanaan matonakoka,

⁶O Abram wödagi watailako o tonaka gënanga hiädono ünanga womahiädono o gota mautu ikokaramatika o More mabereraka, enagënanga o puji mangï o Sikemoka. Öraha gënanga o Kanaan manyawa kayö gogerohi o tonaka gënanga.

⁷ Ma Jou womahimatoko ai diri o Abramika deʼ wïtemo ünangika, ”Nënanga doka o berera aha tahidoa-doaka ani ngohaka de ani danongika.” Daha o Abram wohigoko gënangokadau o huhuba mangï o gahumu moi, mangale ma Jou womahimö mato-matokoka Ai diri ünangika.

⁸Ipaha deʼ gënanga ünanga wohi gila-gila ai dodagi o koreharail̄e, madaira itotoporono o Betel makota o wange mahiwaroko, deʼ womä tau o Betel deʼ o Ai makota mahidogoronaka: o Betel o wange madumuniha deʼ o Ai o wange mahiwaroko. Genangokadau ünanga wohigoko huhuba mangï, deʼ ma Jou wïhuba.

⁹Ipahaika ünanga wohigila-gilaoli ai dodagi o ngï moioka deʼ moikali, ai dumutu o Kanaan ma tonakika o koreharail̄e i daduoka.

¹⁰Mä o Kanaan matonakoka magogiria naga o habirokata duru kohagiria, hiädono o Abram woiki iholoi ikurutikali o koreharail̄e, o Mesir mabereraika hupaya dokengoka wogogere hiädono o huha gënanga ipaha.

¹¹Maöraha ünanga watilakuru mabatingi deʼ wowohama o Mesir mabereraika, ünanga womitemo o ngo Sarai ngoi hekatika, ”Ngona nohailoa ngohi hekata.

¹²Nako o Mesir manyawa inimake, önanga aha yato ngona ngohi hekata daha ngohi marai ihitoma deʼ ngona inimal̄aika nowango.

¹³ Ho, kayaoa denahetongo dika ngona ngohihiranga, hupaya ngohi ihimal̄aika towango deʼ ihihidiai yaoa karana ngona.”

¹⁴Deʼ itiai, ipaha o Abram watilakuru mabatingi deʼ imahiädono o Mesir mabereraika, o Mesir manyawa imimake o ngo Sarai duru mohailoa.

¹⁵Yamoruono naga okadatoka mapegawe imimake munanga deʼ ihingahu makoanoika hokokia amihailoa ongoheka gënanga; hababu gënanga munanga imiao makoano ai kadatoika.

¹⁶Mangale o ngo Sarai, makoano kawihidodiai o Abraham deʼ wihidöaka unangika ogilaongo, o duba deʼ matika deʼ o kabingi, o hapi, o keledai deʼ o unta.

¹⁷Mä karana makoano womil̄ë o ngo Sarai, ma Jou wadotagao hagala opanyake homodo-modongo makoanoika deʼ ainyawa ai kadato magoronaka.

¹⁸Daha makoano wiahoko o Abram de wïleha ünangika, ”Okia nodiaioka ngohino nënanga? Yadodoaho, nohihingahua munanga gënanga ngoni hekata?

¹⁹Yadodoaho ngona nahetongo munanga ganga ngoni hiranga deʼ mal̄aika ngohi tomi l̄ë idadi ngohi hekata? Nenanga munanga ngoni hekata; nomi l̄ë deʼ nioiki!”

²⁰Makoano wohi döaka o pareta o pegaweika yamuruononaga, deʼ önanga iwihihupu o Abram o bereraka gënanga kamamoi deʼ ngoihekata deʼ hagala tounanga ai kiahonanga.