Read Tobelo O KEJADIAN 13 Bible Online

O KEJADIAN 13 - Tobelo bible

O KEJADIAN 13

¹O Abram wamal̄a o Mesir deʼ woiki o koremieuku, wödumutu o Kanaan o koreharail̄e idaduoka deʼ ngoihekata deʼ hagala ai kia honanga, deʼ Lot ünangö wonïki.

²O Abram duru wokaya; ünanga deʼ ai duba, o kabingi, o hapi, o haakaö deʼ o gurasi.

³De ünanga woiki o ngï moioka deʼ o ngi mahomoaika, wodumutu o Betel makotaika deʼ o Ai, o ngï ikokaramatioka kiaka ünanga mahira womä tau,

⁴deʼ wohigoko o huhuba mangï. Genangokadau ünanga wï huba ma Jou.

⁵O Lot ünangö deʼ ai hekata deʼ ai ngohaka deʼ ai gogilaongo inoli ai duba, o kabingi deʼ o hapi.

⁶Karana gënanga o tonaka genangoka mamomo imakewedonua yögogere yahinoto honanga, hababu manga aiwani o gigini iwöeholi.

⁷Ipaha idadi imatekeributu o Abram aiwani magogoana deʼ o Lot ai aiwani magogoana. (O öraha gënanga o Kanaan manyawa deʼ o Feris manyawa kayö gogerohi otonaka gënanga).

⁸O Abram wïtemo o Lotika, ”Ngone nënanga oriadodoto, i torou nako ani nyawa deʼ tongohi ahi nyawa imatekeroributu.

⁹Hababu gënanga kayaoa deʼ ngone homa tingaka. Nairiki o tonaka nënanga kiaika idadu ngona nöigo. Nako ngona nameta nënangika, ngohi aha toiki tameta mahomoaika.”

¹⁰ O Lot wapulono mahigilolitino deʼ wamake o Yordan mawai mata-mataika, hiädono o Zoar makotaika maakere iwöe, hokä ma Jou Ai dumule ekola hokä o Mesir matonaka. (Hoko gënanga naga madodagi ihira de ma Jou kowabinahauwahi o Sodom de o Gomora makota.)

¹¹Mabaha o Lot wairiki o Yordan ma Wai gënanga mata-mataika, daha womagoraka wosobo o wange mahiwaroko. Hoko gënanga o nyawa yahinoto gënanga imatingaka.

¹²O Abram hirahi wogogere o Kanaan matonakoka, enahioko o Lot womä tau o kota-kotaika owaioka hiädono womahitigika deʼ o Sodom.

¹³O Sodom makota gënanga yögogere hagala o nyawa madorou deʼ yobaradoha ma Jouika.

¹⁴O Lot deʼ wopahaka, ma Jou wïtemo o Abramika, ”O ngï no ma oko-okoinoka gënanga, napulono nohidodiai o ngï yögeto-getongo;

¹⁵ Ngohi aha tonihidöaka ngonaika deʼ aningohaka deʼ ani danongika o tonaka namömake-make gënanga hupaya idadi ngona madutu kahiado-adonika.

¹⁶Ngohi aha tonihidöaka ngonaika o ngohaka deʼ o danongo duru kamanga ngoë, hiädono o nyawa moiö yakunua yäetongo. Ho kaonyawa yakunua yaetongo o kafo o tonakoko, hokogengoli ani difauku yakunua yaetongo.

¹⁷Oraha nënanga, nodagi natailako otonaka nënanga mata-mataika, hababu Ngohi aha tonihidöaka ngonaika.”

¹⁸Ipaha gënanga o Abram watururu ai tau-tau daha wogogere itatapu womahi tigi-tigika o gota ikokaramatika o puji mangï o Mamre mabereraka imahi tigi-tigika deʼ o Hebron, deʼ genangoka ünanga wohigoko o huhuba mangï mangale ma Jou.