Read Tobelo O KEJADIAN 14 Bible Online

O KEJADIAN 14 - Tobelo bible

O KEJADIAN 14

¹O koano yaruata, enagënanga: o Amrafel o Babiloniaino, o Ariokh o Elasarino, o Kedorlaomer o Elamino, de o Tidial o Goyimino

²yoparangi yalawani yamotoa o kokoano mahomoa, enagënanga; o Bera o Sodomino, o Birsya o Gomoraino, o Syinab o Adamino, o Senebar o Zeboimino, deʼ makoano o Belaino yahetongö o Zoar.

³O koano yamotoa gënanga imatekerimoi deʼ yatoomu manga tentara o Sidim ma Waioka, öraha nanga yahetongo o ngöto mahonenge.

⁴Madekana o taongo ngimoi deʼ hinotoönanga ma Koano Kedorlaomer wakuaha, mä mataongo ngimoi deʼ hangeoka, önanga yamotekokaua opareta iwilawani ünanga.

⁵Ma taongo ngimoi deʼ iatoka magoronaka, o Kedorlaomer deʼ i mateke rorimoi yoboa deʼ toönanga manga tentara deʼ yähohihanga o Refaim manyawa o Asyterot-Karnaimoka, o Zuzim manyawa o Hamoka, o Emim manyawa o Syawe-Kiryataimoka,

⁶deʼ o Hori manyawa o Edom mal̄oku-l̄okuoka, daha önanga yaginïki magurutika o El-Paranika otonaka ikokakaha madatekoka.

⁷Ipaha gënanga yokokinïki gënanga imaiduloli deʼ imakilioro o En-Mispatika öraha nënanga yahetongo o Kades. Onanga o Amalek matonaka mata-mataika yaoraoka inoli yahohihanga o Amori manyawa yogögogere o Hazezon-Tamaroka.

⁸Ipaha o kokoanoo Sodomino, o Gomoraino, o Admaino, o Zeboimino deʼ o Bela yatatoro manga tentara maduduono o Sidim ma Waioka daha imateke parangi,

⁹yalawani o kokoano o Elamino, o Goyimino, o Babiloniaino, deʼ o Elasarino; hö, o koano yamotoa yalawani yaruata.

¹⁰O wai gënanga i ömanga de o aspal mahumu, deʼ maöraha o kokoano o Sodomino deʼ o Gomoraino imahidailako manga diri ihibiringana o parangino, önanga yäotaka o humu-humu gënanga magoronauku. O koano yaruange mahomoa yolapahi deʼ yopiringana o l̄oku-l̄okuika.

¹¹O koano yaruata youtu-utumu, yaora hegala manga moi-moi o Sodom deʼ o Gomoraka imadogo manga inomo dahao yoiki.

¹²O Lot o Abram ai dodoto ai ngohakö wogogere o Sodomoka, karana gënanga ünangamä manga haturu iwi ao deʼ hagala ai arata.

¹³Mä womatengo wakunu wolapahi wohingahu mata-mata idödadadi gënanga o Abramika, o Ibrani manyawa gënanga. O Abram wogogere womahi tigi-tigika deʼ o gota-gota mautu ikokaramati o pupuji mangï madutu to Mamre, o Amori manyawa. O Mamre deʼ ai riadodoto, enagënanga o Eskol deʼ o Aner ganga o Abraham ai dodiawo.

¹⁴Maöraha o Abram woihene ai riadodoto aingohaka iwitagokoka, wätoomu mata-mata o nyawa ai tauoka, enagënanga yososawaro yoparangi, manga ngoë yaratuhu hange deʼ yangimoi deʼ yatufange daha wä kinïki o koano yaruata gënanga hiädono o Dan ma kotaika.

¹⁵Genangoka o Abram wä regu ainyawa o doomu muruono naga, daha yaginïki yaparangi manga haturu maöraha o hutu-hutu deʼ ya hohihanga önanga. Unanga wä ginïki önanga hiädono o o Hobaika o Damsyik makota o koremieuku.

¹⁶O Abram wo hasili wa l̄ëokali manga kiahonanga yaora-oraoka, o Lot deʼ ai arataö, deʼ ongoheka deʼ yä tago-tagoko ma homoaohi.

¹⁷De iböto wahohihanga ma Koano Kedorlaomer deʼ o kokoano ai dodiawo, o Abram womakilioro. Daha o Sodom manga koano woiki wïbuhuku ünanga o Syawe mawaioka yahetongö o Koano ma wai.

¹⁸ O Melkisedek o Salem manga koano wadodiai ma Jou Madutu Wo kö Kurutil̄e ai imam ai manarama, woao oroti deʼ o angguru mangale o Abram,

¹⁹daha wihibarakati o Abram, wotemo, ”Tanu ma Jou Madutu Wo kö Kurutil̄e, wohidadadioka o dihanga deʼ o dunia, wihibarakati o Abraham!

²⁰Hihigiriri ma Jou Madutu Wokokurutil̄e, wonihi döa-döaka ngonaika näutumu ani höhaturu.” Ipaha deʼ gënanga o Abram wihi doaka o Malkisedekika o regu ngimoi o regu moi hagala okia honanga ya ora-oraino ihi gogilioinokali.

²¹Daha o Sodom manga koano wïtemo o Abramika, ”Nal̄ë o kia honanga i ora-oraino gënanga, mä tanu nömodeke nohigilio ngohino ahi nyawa mata-mata.”

²²Mä o Abram wïbaluhu, ”Ngohi tokoboto ma Jou Ai himangoka, ma Jou Madutu Wokökurutil̄e, wohidödadadi o dihanga deʼ o dunia,

²³tongona aha o kia-kiaua tomal̄ë, igoungu o lawe o doaka moi ekola o sandal magumini madoaka moi makowali. De hoko gënanga ngona aha nakunua notemo ’Ngohi tadiai o Abram idadi wokaya.’

²⁴Ngohi toluku okianaga tal̄ë mangale ngohi mahirete. Ngohi duga-duga tatarimaka yapöpake-pakeoka ahi nyawa. Mä mal̄aika la ahi dodiawo o doomuoka, enagënanga o Aner, o Eskol deʼ o amre imäl̄e toönanga manga hidoku.”