Read Tobelo O KEJADIAN 15 Bible Online

O KEJADIAN 15 - Tobelo bible

O KEJADIAN 15

¹Genanga deʼ iböto o Abram watarima o momake deʼ wo ihene ma Jou Madutu wïtemo unangika, ”Uha nohawana, Abram, Ngohi aha tonihirehene obodito, deʼ tonihidöaka ngonaika o hewa ma amoko.”

²Mä o Abram wotemo, ”Jou noko Kurutil̄e, Jou nohihi döakua o ngohaka ngohino. O nyawa aha yapopuhaka ahi arata duga-duga ka o Elieser, ahi gilaongo o Damsyikino. Ho, okia ma faida Jou nohihidöaka o hewa ngohino?”

⁴Ipahaino o Abram woihene ma Jou wïtemoli unangika, ”Ko anigilaongua aha wodadi ani puhaka wapopareta, duga-duga aningohaka o nauru mahirete.”

⁵ Ma Jou wïao o Abram maporetika daha wïtemo unangika, ”Napulono o dihanga, deʼ nohitaili naetongo hagala o murumu; ngona aha deʼ ani ngohaka deʼ ani danongo manga ngoë hokä hagala o murumu gënanga.”

⁶ O Abram wïngaku ma Jouika, deʼ karana gënanga ma Jou wïtarima ünanga hokä o nyawa yasosanangi Ai hininga.

⁷Ipahaino ma Jou wïtemoli unangika, ”Ngohi ma Jou, toni tudaoka ngona nohupu ani bereraino o Ur o Babiloniaoka mangale tonihi döaka otonaka nënanga ngonaika idadi tongona madutu.”

⁸Mä o Abram woleha, ”Ya, Jou Duru nokö Kurutil̄e, sarakia ngohi takunu tohioriki otonaka nënanga aha idadi tongohi madutu?”

⁹Ma Jou wohaluhu, ”Nohï l̄e o hapi mabeka o dutu moi, o kabingi mabeka o dutu moi deʼ o duba mauru o dutu moi, moi-moi ma umuru o taongo hange, deʼ o pombo furuö o dutu moi deʼ onamo dara o dutu moi.”

¹⁰Daha o Abram, wal̄e o aiwani-o aiwani gënanga wïike ma Jou Madutu. O hapi, o kabingi deʼ o duba gënanga moi-moi yabelaka hinotoil̄e deʼ mabela-belaka gënanga wakelenga wohi teke rorihimanga o datoro hinoto magoronaka. Mä o totaleo-o totaleo gënanga kowabelakua.

¹¹O Aiwani ma akeme gënanga ototaleo i ol̄o-ol̄omo o aiwani mahonenge yödangi, mä o Abram waduhu.

¹² Maöraha owange malako imulaenge itumunu, o Abram duru aigogioko. Itodokanino ünanga wamao wohawana duru koha giria.

¹³ Ma Jou wïtemo unangika, ”Nohohininga aningohaka deʼ ani danongo aha yodadi o nyawa mahomoa o berera mahomoaka; önanga aha yodadi o gilaongo dokengoka deʼ aha yahidiai itorou otaongo moruatino madekana.

¹⁴ Mä o nyawa imä gogilaongo aningohaka de ani danongo gënanga aha Tahukumu deʼ ma öraha aningohaka deʼ ani danongo yamal̄a o berera gënanga, önanga aha imägao o arata kohängöe.

¹⁵Ngona mahirete aha nakunu ani umuru kahä gurutil̄e; ngona aha nohonenge nomahidodiai, daha ini lungunu.

¹⁶Ipahaika ani difauku maiatoka, aningohaka deʼ ani danongo aha imakilioro nenangino, karana gënanga aha Ngohi täduhuua o Amori manyawa ihira deʼ önanga yodadiuwahi hoko gënanga ma nga dorou hiädono i paralu Tähukumu.”

¹⁷Maöraha o wange yöhutuoka, itodokanino iboaino moi o komfor deʼ manofo deʼ o oboro itoka-tokara, daha yatilakuru o aiwani ma akeme i lui-luituku mahidogoronaika.

¹⁸ Ka maöraha gënanga dika ma Jou wadiai o jaji deʼ o Abram. Ma Jou wotemo, ”Ngohi tojaji aha Tohidöaka aningohaka deʼ ani danongika o tonaka nënanga mata-mataika, mabatingi i mulaenge o Mesir maberera hiädono o Efrat ma ngairika,

¹⁹yo ngohamö o Keni manyawa manga tonaka, o Kenas, o Kadmos,

²⁰o Het, o Feris, o Refaim,

²¹o Amori, o Kanaan, o Girgasi deʼ o Yebus.”