Read Tobelo O KEJADIAN 16 Bible Online

O KEJADIAN 16 - Tobelo bible

O KEJADIAN 16

¹O ngo Sarai o Abram ngoihekata, o ngohaka momamakeuahi. Mä münanga deʼ ami gilaongo momatengo o Mesirino, o moholehe momatengo ami romanga o ngo Hagar.

²O ngo Sarai mïtemo Abramika, ”Ma Jou wohihigumal̄aua tongohaka. Hababu gënanga, kayaoa deʼ ngona nomäidu deʼ ngohigilaongo nënanga. Mudukua münanga yakunu mongohaka idadi ka tongohi.” O Abram wohi moteke o ngo Sarai amigogahoko.

³Hoko gënanga o ngo Sarai mihidöaka o Abramika o ngo Hagar hupaya modadi ngoihekata o paliara. O öraha gënanga o Abram o taongo ngimoi iböto o Kanaan matonakoka.

⁴O Abram womäidu deʼ o ngo Hagar, daha moroëhe ongoheka gënanga. Mä maöraha o ngo Hagar momanako munanga moroëhe münanga momahiamoko deʼ momihikauku o ngo Sarai.

⁵Daha o ngo Sarai mïtemo o Abramika, ”Ngohi tonihidöaka o ngo Hagar ngohigilaongo ngonaika, deʼ kadeʼ mohiöriki munanga moroëhe, munanga mohihikauku. Genanga anihowono. Tanu ma Jou waputuhu o parkara nënanga ngona deʼ ngohi nanga hidogoronaka.”

⁶O Abram wohaluhu, ”Kayaoa, munanga ngoni gilaongo deʼ ngona nomikuaha munanga; nomihidiai muna imoteke ani mau.” Daha o ngo Sarai momihidiai duru kamomi ngamo-ngamo, hiädono munanga mopiringana.

⁷Ma Jou Ai malaekat womimake o ngo Hagar imahi tigi-tigiika deʼ o jobubu o tonaka ikokakahaoka, o ngekomo yodumutu o Sur matonaka ikokakaha.

⁸O malaekat gënanga imitemo, ”Hagar o ngo Sarai ngomi gilaongo, ngona o kiaino deʼ nomau okiaika?” O ngo Hagar mohaluhu, ”Ngohinyonyaka o ngo Sarai deʼ topiringana.”

⁹O malaekat gënanga imitemo, ”Nomakilioro munangika deʼ nomïleleani munanga.”

¹⁰Daha o malaekat gënanga imitemoli, ”Ngohi aha tonihidöaka ngonaika hoko gënanga mangoë o ngohaka deʼ o danongo, hiädono moiua o nyawa yaetongo önanga.

¹¹I tedekanokauaoli ngona aha nongohaka o ngohaka o nauru; nihiromanga ünanga o Ismael, karana ma Jou woihenoka ani gari.

¹²Mä aningohaka gënanga aha wowango hokä o keledai i huhuku; moi-moi o nyawa ünanga aha wälawani, deʼ moi-moi o nyawa aha iwilawani ünanga. Unanga aha wowango womatingaka de ai riadodoto mata-mata.”

¹³O ngo Hagar momaleha ami hiningaka, ”Itiai ngohi timakeoka ma Jou Madutu wohitötailako?” De muna mi ketongo ma Jou, wotemo-temoka munangika. ”Ma Jou Madutu wohi tailakoka”.

¹⁴Genangadoka mahababu o nyawa yahetongo o humu o Kades deʼ o Bered mahidogoronaka gënanga, ”O Humu Ünanga Wo Wango-wango wohi Tö tailako Ngohi.”

¹⁵ Daha o ngo Hagar mongohaka o ngohaka o nauru deʼ ai ama o Abram, wihiromanga o ngohaka gënanga o Ismael.

¹⁶O öraha gënanga o Abram ai umuru o taongo mori tufange deʼ butanga.