Read Tobelo O KEJADIAN 18 Bible Online

O KEJADIAN 18 - Tobelo bible

O KEJADIAN 18

¹Ma Jou womahimatoko Ai diri o Abrahamika o gota-gota ma utu ikokaramati o puji mangï madatekoka o Mamre mabereraka. O öraha gënanga o wange duru kohähauku deʼ o Abraham magogiria wogogeruku ai tau mangoranoka.

² Maöraha ünanga wagoraka ai haeke, ünanga wämake o nyawa yaruange imaokoino ai himangoka. O Abraham womatai-taiti woma popata womau wabuhuku önanga. De watilabukuku wohuba

³ünanga wato, ”Tua-tuanga, nituluohi uha niatio ahi tau; Tua-tuanga nihihi gumal̄a tinï leleaniohi.

⁴Mal̄aika hupaya ngohi tol̄ë o akere la Tua-tuanga nia lou taihoro. Niaino Tua-tuanga nimahibatongo o gota mautu nënanga matimiuku.

⁵Ngohi aha tinihidöaka o inomo o kianaga deʼ maenanga, hupaya tua-tuanga niamake o kuata mahungi la nihigila-gila niadodagi. Tua-tuanga deʼ nitulu ahi tauino nënanga nihihoromatioka ngohino.” Onanga yohaluhu, ”Tarima kase mangale ani oa-oa. Ngomi aha mitulu.”

⁶O Abraham womatai-taiti wowohama ai tau magoronaika deʼ womitemo o ngo Saraika, ”Taiti, nal̄ë o tarigu maoa-oa o karongo moi, deʼ nodiai o roti mahohululunu.”

⁷Ipaha ünanga womapopata manga aiwani matika mangïika, wairiki ohapi mangohaka maboburere deʼ ma akeme mabole-bole, daha wohidöaka yolö leleanika, tai-taiti yasadia.

⁸Ipaha deʼ gënanga o Abraham wal̄e o huhu deʼ o huhu magoro-goro, deʼ mahiode maake-akeme yahohakaioka gënanga, daha wahidöaka ai tamu-tamuika. Magogiria önanga yol̄omo, o Abraham mahirete wäleleani önanga o gota mautu matimiuku gënanga.

⁹Ipaha önanga yoleha, ”Kiaka maika o ngo Sara, ngoni hekata?” ”Doka, o tau mangoranoka.” O Abraham wohaluhu.

¹⁰ Womatengo manga hidogoronaka wotemo, ”O mede hiwoohi ngohi aha tainoli. De öraha gënanga o ngo Sara ngoni hekata aha mamake o ngohaka o nauru.” O öraha gënanga o ngo Sara magogiria mohigihegihene o tau mangoranoka, o tamu gënanga manga poretoka.

¹¹Mangale o Abraham deʼ o ngo Sara duru yäperekioka, deʼ o ngo Sara o mede imi daenokaua.

¹² Hababu gënanga o ngo Sara moiete ami hiningaka deʼ mo temo, ”Ngohi ihiperekioka deʼ hokonenanga tomaai, kaidadiohi katonahihuohi tomahiganu deʼ ahi rokata? — Inoli ahi rokatö maʼ iwi perekioka.”

¹³Daha ma Jou wïleha o Abrahamika, ”Yadodoa hoʼ o ngo Sara moiete deʼ hokä mongakuua boteka munanga kayakunohi mongohaka maöraha imiperekioka?

¹⁴ Boteka naga o kianaga moi ma Jou wakunua Wadiai? Hokä kangano tahetongoka, o mede hiwohi ngohi aha Tainoli nenangino deʼ o öraha gënanga o ngo Sara aha mongohaka o ngohaka o nauru.”

¹⁵Karana o ngo Sara mohawana, munanga momahipongono, mato ”Ngohi kotoietua.” Mä Jou womï baluhu, ”Ngona i goungu kangano noiete.”

¹⁶Ipaha deʼ gënanga o tamu yaruange gënanga imäjobo de o Abraham wahingotaka. Daha önanga imahiädono o ngï moioka kiaka gënangoka deʼ kayapulonika o Sodom maberera.

¹⁷Ma Jou wotemo ai hiningaka, ”Ngohi toluku tarahasia o Abrahamika okia aha Tadodiai.

¹⁸Koigoungua karana aidifauku aha yodadi o hoana deʼ o berera ma ago-agomo deʼ yokokuaha? Koigoungua karana ünanga, mata-mata o berera deʼ o hoana o duniaka aha Tahi barakati?

¹⁹Unanga Tïirikoka hupaya wäpareta ai ngoha-ngohaka deʼ ai difauku mangale ihihigihene Ngohi deʼ yadiai o kianaga maoa-oa deʼ iadi-adili. Nako o hali gënanga önanga yadiai, hagala Ahijaji o Abrahamika aha Taganapu.”

²⁰De ikali ma Jou wïtemo o Abrahamika, ”Naga o galaki madodubuho o Sodom deʼ o Gomoraika, deʼ igoungu toönanga manga baradoha duru kohä amoko.

²¹Hababu gënanga Ngohi tomau touti dokengika mangale Ta tailako boteka o galaki Toihe-ihene gënanga itiai ekola kowali.”

²²Daha o tamu-tamu manga hidogoronaka gënanga yahinoto imä jobo yameta o Sodom mabereraika, mä ma Jou kawogogogerohi deʼ o Abraham.

²³O Abraham womahitigi deʼ wïleha, ”Itiai bote Jou nomau näbinaha o nyawa manga howono koiwa-iwa, kamamoi deʼ o nyawa deʼ manga howo-howonoka?

²⁴O demo ma ade naga yamoritoa o nyawa yahowonua o kota gënanga magoronaka, botekä mata-mataika o kota gënanga Jou aha nabinaha? Kana ampongua ona Jou, hupaya yamoritoa gënanga yohalamati?

²⁵Uha o nyawa yahowo-howonua gënanga yahïdotoma kamamoi deʼ yahowo-howono. Uha Jou! Hababu nako Jou nadiai ganga, o nyawa yahowo-howonua marai aha yähukumu kamamoi deʼ yahöhowo-howono. Kiaka yakunu idadi o dunia ma gilolitino mahakimi wadiai iadilua!”

²⁶Ma Jou wïtemo, ”O demo ma ade Tämake yamoritoa o nyawa yahowo-howonua o Sodom mabereraka, aha Tä apongo mata-mata ika o kota gënanga mangale önanga.”

²⁷O Abraham wotemoli, ”Nohihi apongo tongohi ahi barani tadohanga o ade-ade nënanga, Jou. Ngohi nënanga duga-duga o nyawa, deʼ koiwa ahi haku mangale tahetongo okianagamoi.

²⁸Mä mudukua duga-duga naga yamoruata deʼ yamotoa o nyawa yahowo-howonua, deʼ yamoritoaua. Boteka Jou nabinaha mata-mataika o kota gënanga duga-duga karana yokuranga o nyawa yamotoa dika?” Ma Jou wïtemo, ”O kota gënanga aha ko Tabinahaua o demo maade dokengoka Tämake yamoruta deʼ yamotoa o nyawa yahö howo-howonua.”

²⁹O Abraham wotemoli, ”Sarakia nako naga duga-duga yamoru ata?” Ma Jou wohaluhu, ”Mangale o nyawa yamoruata gënanga, aha Tohidadiua Ahi niati.”

³⁰O Abraham wotemo, ”Uha nongamo Jou, nako ngohi totemoli. Sarakia o demo maade duga-duga naga o nyawa yamoruange dika?” Ma Jou wïtemo, ”Nako Tämake o nyawa yamoruange, aha Tohi dadiua Ahi niati.”

³¹O Abraham wotemo, ”Nohihi apongo tongohi ahi barani tohigila-gila o ade-ade nënanga, Jou. O demo ma ade duga-duga naga o nyawa yamonaoko dika?” Ma Jou wïbaluhu, ”Nako Tämake o nyawa yamonaoko, o kota gënanga aha Tabinahaua.”

³²Ma bobaha o Abraham wotemo, ”Uha konohingamo, Jou, ngohi duga-duga aha totemo mamoiohi. Sarakia nako duga-duga Nä make o nyawa yangimoi dika?” Ma Jou wïtemo, ”Nako naga o nyawa yangimoi yahöhowo-howonua, Ngohi aha tabinahaua o kota gënanga.”

³³Ipaha iböto imä ade-ade deʼ o Abraham, ma Jou woiki, deʼ o Abraham wolio ai tauika.