Read Tobelo O KEJADIAN 19 Bible Online

O KEJADIAN 19 - Tobelo bible

O KEJADIAN 19

¹Yotamu iböto o Abrahamoka, o malaikat yahinito gënanga yoiki o Sodomika deʼ imahiädono dokengika o hutu-hutu. O Lot magögiriaoka wogogeruku o kota manga ngorana ma amokoka deʼ önanga wämakeoka, ünanga womaoko mangale wäbuhuku önanga. Daha ünanga watilabukuku toönanga manga himangoka,

²deʼ wätemo, ”Tua-tuanga nako nio modeke nituluohi ahi tau oka. Yarehino nako niomodeke, Tua-tuanga yakunu nimomiki o ngoru-ngorumino deʼ nihigila-gila niadodagi.” Mä önanga yohaluhu, ”Tarimakase, mal̄aika la ngomi mimä idu nenangoka dika o kota malapangoka.”

³O Lot wogahoko deʼ magiria, deʼ mabaha önanga yowohama ka mamoi dede ünanga ai tau magoronaika. O Lot wadiai inomo mahemo-hemoro deʼ woharongo o roti kayä adono mangoë, daha önanga wahiol̄omo.

⁴Mä o tamu-tamu gënanga yoikowahi imäidu, o Sodom manyawa yakiloliti o tau gënanga. Mata-mata o nau-nauru o kotaka gënanga, kayaoa o bobereki kayaoa o gogoduru naga gënangokadau.

⁵ Onanga iwïboaka o Lotika, deʼ yoleha, ”Kiaka manyawa yaino-ino imaidu anitauoka? Onanga nomihidöaka, hupaya ngomi miakunu mima hikaganu dede önanga!”

⁶O Lot wohupu ai tauino, iböto mangorana wabeno,

⁷ünanga wätemo o Sodom manyawaika gënanga. ”Roria dodoto, ngohi togahoko deʼ magiria, uha nidiai o hali madodorou gënanga!

⁸Abeika niihene, naga yahinoto ngohiora o moholehe maboro. Mal̄aika ngohi tini hidöaka nginika, deʼ ngini yakunu okiadika niadiai dede önanga. Mäuha niadiai o kianagamoi ahi tamu-tamuika nënanga; hababu ngohi kokiani tägoana önanga.”

⁹Mä o Sodom manyawa gënanga yato o Lotika, ”Noiki! Ngona o nyawa maporetino nomau nomï tatoro ngomi? Ika, noiki! Nako kowali, ngomi aha minigohara ngona iholoi itubuho de o nyawa yahinoto gënanga.” Daha önanga iwitila o Lot deʼ yodooara yomau yakilianga o ngorona.

¹⁰Mä o tamu yahinoto gënanga ihi döaka manga giama deʼ iwitauru o Lot o tau magoronaika daha yabeno o ngorana.

¹¹ Onanga yäpiloko mata-mata o nyawa o tau maporeoka gënanga, hiädono hagala o nyawa gënanga yakunua yamakeoli o ngorana.

¹²O tamu yahinoto gënanga iwitemo o Lotika, ”Nako ngona deʼ aningohaka o nauru, aningohaka ongoheka, animol̄oka ekola aniriadodoto mahomoa yogogogere o kota nënanga magoronaka, nä ao önanga yohupu nenangokadau,

¹³hababu o kota nënanga aha mia binaha. Ma Jou woihenoka yogögogerika nenangoka yäkalaki o galaki madodubuho, deʼ ngomi imïhuloko la miabinaha o Sodom makota.”

¹⁴Daha o Lot wöiki imakamake deʼ aingohaka yahinoto manga mamane, deʼ wätemo, ”Itaiti nihupu deʼ ongï nënanga, hababu ma Jou aha wabinaha.” Mä önanga yatobote o Lot kawä hiagaga dika.

¹⁵Tigi-tigi ikinitara, o malaekat yahinoto gënanga iwigegoto o Lot hupaya itaiti imäjobo. ”Taitika,” önanga yotemo, ”Noiki deʼ ngoni hekata deʼ aningohaka o moholehe yahinoto nenangokadau, hupaya ngini uha nihonenge nako maöraha o kota nënanga miabinaha.”

¹⁶ O Lot hokä wongakuua. Mä ma Jou wïdora unangika; karana gënanga ai tamu yahinoto yätuda o Lot deʼ ngoihekata deʼ aingohaka yahinoto o kotaka deʼ yohupu.

¹⁷Iböto deʼ gënanga womatengo o malaekat gënanga wätemo, ”Nioara, niajiwa nihihalamati! Uha nimälega niaporetoko deʼ uha nimatogumu o waioka. Nioara il̄o l̄oku-l̄oku il̄e, hupaya ngini uha nihonenge!”

¹⁸Mä o Lot wohaluhu, ”Amao, Tuanga uha nomïhuloko ngomi mi oara il̄ö l̄oku-l̄okuil̄e.

¹⁹Marai Tuanga duru nohiriwoka ngohi deʼ nohihalamatoko ahi jiwa! Mä ol̄oku gënanga kahä gurutika; uha-uha ngohi ihinïki obodito gënanga daha tomahiadonuwahi dokengika deʼ tohonenge.

²⁰Manamake miahimangoka gënanga naga o kota mai teteke ho kokiaua magurutika. Nohihigumal̄a ngohi topiringana dokengika hupaya tohalamati.”

²¹O malaekat gënanga iwïbaluhu, ”Kayaoa, o kota maiteteke gënanga aha Tabinahaua.

²²Itaiti nipiringana! Hababu ngona nomahiadonuwahi dokengika Ngohi takunua okianaga todiai.” Karana o Lot wahetongo o kota gënanga maiteteke, hoʼ okota gënanga ihi romanga o Zoar.

²³O wange malako magogiria iböa womahiädono o Lot o Zoarika.

²⁴ Itodokanino ma Jou wohiguti o awana walira deʼ maukuoka o Sodom deʼ o Gomorauku.

²⁵O kota hinoto gënanga yabinaha, mata-mata o wai, deʼ mata-mata yadödato-datomo deʼ mata-mata yögogogere genangokadau.

²⁶ Mä o Lot ngoihekata momälega amiporetoko, hoʼ munanga mongali kahara moioli modadi o gahi maliate.

²⁷Hoko iyarehe o ngoru-ngorumino, o Abraham womatai-taiti wöiki ünanga womaoko-okoinoka ma Jou Ai himangoka o wange moiohi deʼ idadi.

²⁸Unanga womä lega o Sodom deʼ o Gomoraika deʼ mata-mataika o wai, deʼ wamake o nofo ikuhuhulu o tonakil̄e hokä o nofo o rikana ma ago-agomil̄e.

²⁹Hoko gënanga, maöraha ma Jou Madutu wabinaha o kota-o kota o waioka gënanga kiaka o Lot wögogere, ma Jou Madutu womahininga o Abrahimika deʼ wïriwo o Lot wohi oara ai diri.

³⁰Karana o Lot wömodongo wogogere o Zoar mabereraka, done ünanga wöiki ol̄oku-l̄okuil̄e kamamoi deʼ ngoi ora yahinoto, daha yogogere o aruku moi magoronaka.

³¹Ngoi ora mariaka momitemo ngomi dodotika, ”Nanga ama iwiperekioka, deʼ mata-mataika o berera nënanga koiwa naga o nau-nauru yakunu inäkawingi ngone, hupaya ngone hamake o ngohaka.

³²Naino, ngone hodiai nanga ama iwidaluku, daha ngone homäidu dede ünanga hupaya ngone hamake o ngohaka.”

³³O hutu gënanga önanga iwihidöaka o angguru wokere, daha ngoi oara mariaka momäidu deʼ ami ama; mä ami ama iwidaluku kahoko gënanga hiädono wohiorikua okianaga idodadadi.

³⁴Yarehino mawange, ngoi oara mariaka momitemo ngomidodotika, ”Kangano mahutu ngohi tomäiduoka deʼ nanga ama! Damä yohu tu ngone hodiaioli ünanga iwidalukoli. Daha ngona nomaidu dede ünanga. Daha ngone moi-moi hamake o ngohaka.”

³⁵Hoko gënanga o hutu gënanga onangö yodiai o Lot iwidaluku, deʼ ngoi oara mahinotoka moma idu dede ünanga. Deʼ o Lot ikiriaholi iwidaluku hiädono wohiorikua okia idodadadi.

³⁶Daha yoroëhe o Lot ngoiora yahinoto gënanga karana toönanga manga ama mahirete.

³⁷Ngoiora oriaka mongohaka o ngohaka o nauru iwihiromanga o Moab. Unanga wodadi o Moab manyawa o öraha nanga manga ete de manga tohora.

³⁸Ngoi ora mahinotoka mongohakö o ngohaka o nauru iwihi ro manga o Ben-Ami. Unanga wodadi o Amon manyawa öraha manga manga ete deʼ manga tohora.