Read Tobelo O KEJADIAN 21 Bible Online

O KEJADIAN 21 - Tobelo bible

O KEJADIAN 21

¹Ma Jou womihibarakati o ngo Sara, hokä womi jäjajioka.

² Maöraha wohi tötantuoka ma Jou Madutu maöraha o Abraham iwiperekioka, o ngo Sara moroëhe daha mongohaka o nauru womatengo.

³O Abraham wihiromanga o ngohaka gënanga o Ishak;

⁴ deʼ maöraha o Ishak ai umuru o wange tufange, o Abraham wïhuna imamoteke deʼ ma Jou Madutu Aipareta.

⁵O Abraham ai umuru o taongo o ratuhu moi maöraha o Ishak woma kil̄au.

⁶O ngo Sara motemo, ”Ma Jou Madutu wodiaioka ngohi toiete karana tomorene. Moi-moi o nyawa yoihe-ihene o hali nënanga aha yoiete yomorene dede ngohi.”

⁷Ipaha mödogo, ”O nagona hokakangano yakunu yotemo ahi rokatika ngohi aha o ngohaka tähuhu? Ma ngohi tongohakoka ngarokä ahirokata duru iwiperekioka.”

⁸O ngohaka gënanga idogo wolamoko, deʼ mawangeoka ünanga wo mulaenge o huhu iwihipidili, o Abraham wodiai o rameanga kohä rame.

⁹O wange moiuku, o Ismael, o Abraham deʼ o ngo Hagar o Mesir mangoheka gënanga manga ngohaka, magogiriaka youle-ule deʼ o Ishak o ngo Sara ami ngohaka.

¹⁰ O ngo Sara mamake o hali gënanga daha mïtemo o Abrahamika, ”Nomi duhu o gilaongo ngoheka gënanga kamamoi deʼ amingohaka. Yakunua o ngoheka gënanga amingohaka watarima o hidoku anikayaino aha wapopuhaka ahingohaka o Ishak.”

¹¹O Abraham hakali-kali wosanangiua deʼ o gogahoko gënanga, karana o Ismael gangö ka aingohaka.

¹² Mä ma Jou Madutu wïtemo o Abrahamika, ”Uha nohawatere yakorona ngoni gilaongo o ngo Hagar deʼ amingohaka gënanga. Nodomoteke o ngo Sara amimau, karana deʼ madodagi o Ishak ngona aha namake o ngohaka deʼ o danongo Tonihi jäjioka gënanga.

¹³Hoko genangö o ngo Hagar ami ngohakika aha Tihi döaka manga ngoë o ngohaka deʼ o danongo hupaya önanga yodadi o berera de o hoana. Hababu unangö aningohaka.”

¹⁴Yarehino mawange o ngoru-ngorumino, o Abraham womihi döaka o ngo Hagarika o inomo de o akere mangiuku moi, mangale manga bilaono o ngekomika. Unanga womihitai o ngohaka gënanga o ngo Hagar ami poretiha, deʼ womihuloko o ngoheka gënanga moiki. Daha o ngo Hagar momä jobo deʼ motagi-tagi o Bersyeba matonaka ikokakahaoka.

¹⁵Maöraha manga bilaono o akere imata, o ngo Hagar mïkelenga amingohaka omomo marubu-rubu matimioka,

¹⁶daha mogogeruku done hoʼ metere o ratuhu moika deʼ o ngï gënanga. Motemo ami hiningaka, ”Ngohi tataanua tïmake ahingohaka wohonenge.” Daha munanga moari.

¹⁷Ma Jou Madutu woihene o Ismael ai ilingi, deʼ ma Jou Madutu Ai malaekat o dihangoka deʼ wotemo o ngo Hagarika, wato, ”Okia ngona nomahuha, Hagar? Uha nohawana. Ma Jou Madutu woihenoka aningohaka ai ilingi.

¹⁸Noiki ani ngohakika, nïgoraka deʼ nihidodiai ünanga. Ngohi aha tahidadi aingohaka deʼ ai danongo o berera deʼ o hoana ma ago-agomo.”

¹⁹Daha ma Jou Madutu wadiai o ngo Hagar motailako deʼ madiai, hiädono münanga mamake moi o humu. Done munanga moiki aha möguhe o akere mangïuku, ipaha mihi döaka amingohaka waokere.

²⁰Ma Jou Madutu witomoteke o Ismael. O ngohaka gënanga i dogo wolamoko; ünanga wogogere o Paran matonaka ikokakahaka, deʼ wodadi yolimo-limoro yososawaro.

²¹Ngoi ayo mihi kawingi ünanga deʼ o Mesir mangoheka momatengo.

²² O öraha gënanga ma koano Abimelekh deʼ o Pikhol, aitentara manga haeke, yaino o Abrahamino deʼ yotemo, ”Ma Jou Madutu wonïriwo ngona hagala moi-moi ngona nadodiai magoronaka.

²³Hababu gënanga nokoboto nenangokadau ma Jou Madutu Ai himangoka ngona aha nodiaiua iadi-adilua ngohino, kayaoa ahingoha-ngohakika, ekola ahidifauku. Hoka ngohi tonihihininga maoaka ngonaika, nodiaiö hoko gënanga ngohino deʼ o bereraika ngona nö gogogere nënanga.”

²⁴O Abraham wotemo, ”Ngohi tokoboto.”

²⁵Mä ipahaika o Abraham wïtoduba o Abimelekh mangale moi o humu yaora-oraoka ma koano ai gogilaongo gënanga.

²⁶O Abimelekh wïtemo, ”Ngohi tohiorikua o nagona yoiaioka. Komaiwahi ngona nahetongo ngohino, deʼ nënanga madodihiraka ngohi toihene o hali gënanga.”

²⁷Daha o Abraham wohidöaka mangoë o duba deʼ o hapi o Abimelekhika, deʼ o nyawa yahinoto gënanga yodiai o jaji.

²⁸O Abraham watingaka tumidi o duba mangohaka ai duba matikaino,

²⁹deʼ o Abimelekh wïleha unangika, ”Yadodoa hoʼ ngona no diai o hali gënanga?”

³⁰O Abraham wïbaluhu, ”Natarima tumidi o duba mangohaka nënanga hokä o nonako Tuanga nohigoungu ngohi tohaitoka o humu nënanga.”

³¹De hoko gënanga o ngï gënanga ihi romanga o Bersyeba, karana genangokadau o nyawa yahinoto gënanga yahetongo manga koboto.

³²Ibötoönanga yadiai manga jaji o Bersyebaka, o Abimelekh deʼ o Pikhol imakilioro o Filistin manyawa manga bereraika.

³³Daha o Abraham wodatomo o tamariska magota o utu moi o Bersyebaka, deʼ mulaenge deʼ gënanga o ngï gënanga yapake mangale iwi huba ma Jou, ma Jou Madutu wokokakali.

³⁴Iböto deʼ gënanga o Abraham wogogere hatoli itedekana o Filistin manyawa manga bereraka.