Read Tobelo O KEJADIAN 23 Bible Online

O KEJADIAN 23 - Tobelo bible

O KEJADIAN 23

¹O ngo Sara ami umuru makunoka o taongo o ratuhu moi de monaoko de tumidi,

²munanga mohonenge o Hebron mabereraka o Kanaan matonakoka. O Abraham ai hininga ihuha deʼ wododora mangale ngoihekata ami honenge gënanga.

³Ipaha de gënanga o Abraham wamal̄a ngoihekata ami mayeti deʼ woiki o Het manyawaika, yogogogere o berera gënanga. Unanga wätemo,

⁴ ”Ngohi nënanga o nyawa maporetino togogere roriadodoto nia hidogoronaka; nihihigumal̄a ngohi taija nia tonaka o hidoku hupaya ngohi takunu tomi lungunu ngohi hekata.”

⁵Onanga yohaluhu,

⁶”Ngomi minihoromati Tuanga hokä o tutuda moi nokua-kuata tongomi mia hidogoronaka, hoʼnomilungunu dika ngoni hekata Tuanga tongomi mia lungunu duru mahohailoa magoronaka ngomi mata-mata mia mao misanangi mia sadia ngoni hekata ami lungunu Tuanga.”

⁷Ipaha o Abraham watilabukuku wohuba manga himangoka,

⁸deʼ wätemo, ”Nako Roriadodoto niomodeke tomi lungunu ngohi hekata nenangoka, nihiriwo hogahoko o Efronika, o Zohar aingohaka o nauru,

⁹hupaya ünanga wohïbukunu ngohino o Makhpela ma Aruku magogere ai dumule madatekoka. Kayao ünanga wahukunu o tonaka gënanga nenangoka, deʼ roriadodoto niahakihi. Ma ija aha tafangu mata-mata, hupaya o tonaka gënanga idadi tongohi madutu.”

¹⁰O öraha gënanga o Efron mahirete magogiriaka wogogeruku de o Het manyawa gënanga o dodoomu mangïoka o kota mangorana ma amokoka. Daha o nyawa mata-mata genangoka yohakihi, ünanga wo haluhu.

¹¹”Tongohi ahiberera de ahihoana manyawa mahirete yodadi o hakihi ahidumule gënanga kamamoi de ma aruku ngohi tonihi döaka hupaya tuanga yakunu nomilungunu ngoni hekata Tuanga.”

¹²Done o Abraham watilabukuku de wohuba o Het manyawa gënanga manga himangoka,

¹³deʼ mata-mata o nyawa yoihene, ünanga wïtemo o Efronika, ”Togahoko noihene ngohino. Ngohi töigo taija ani dumule gënanga mata-mataika. Natarima matiwi, hupaya ngohi tomilungunu ngohi hekata genangoka.”

¹⁴O Efron wibaluhu,

¹⁵”O tonaka o hidoku moi maija duga-duga o ratuhu iata o tiwi haaka — okia mamangarati ngoneino inahinoto? Nomilungunu dika ngoni hekata Tuanga genangoka.”

¹⁶O Abraham womodeke maija gënanga. Unanga waetongo o tiwi haaka mangöe wahö heto-hetongo o Efron enagënanga o ratuhu iata o tiwi haaka, imoteke o duduga yapöpake-pake o dagangoka. Daha ünanga wofangu o Efronika, de o Efron manyawa mata-mata gënanga yahakihi.

¹⁷Hoko gënanga o Efron ai dumule magogere o Makhpelaka o Mamre o wange mahiwaroko, idadi to Abraham madutu. O tonaka gënanga madumule deʼ ma aruku inoli o gota iwöwango-wango mata-mata yongohama o gota naga iwö wango-wango mabati-batingoka.

¹⁸O Het manyawa mata-mata yohöhima-himanga o doomu magoronaka o kota mangorana ma amokoka ihigoungu o tonaka gënanga hokä to Abraham madutu.

¹⁹Iböto gënanga o Abraham womilungunu ngoihekata o ngo Sara o Makhpela ma Aruku magoronaka o Kanaan matonakoka.

²⁰Hoko gënanga o dumule de ma aruku kangano madutu o Het manyawa, imadadi madutu o Abraham mangale ai jere matonaka.