Read Tobelo O KEJADIAN 24 Bible Online

O KEJADIAN 24 - Tobelo bible

O KEJADIAN 24

¹O Abraham duru iwiperekioka, deʼ ünanga wihibarakati ma Jou hagala o hali magoronaka.

²O wange moiuku o Abraham wïtemo ai gilaongika duru wotötimo-timono, wohidodailako hagala ai arata, ”Nogelenga anigiama ahigaono mahidogoronaoko.

³Nokoboto de ma Jou, ma Jou Madutu wakokuaha o dihanga de o dunia, ngona aha nolingirua ahingohaka o Ishak ngoihekata o Kanaan ma tonakoka nënanga manga nyawa.

⁴Ngona kokiani nomakilioro tongohi ahibereraika mangale nolingiri ngoihekata ahiroriadodoto manga hidogoronaka.”

⁵Daha woleha o gilaongo gënanga unangika, ”Sarakia nako ma moholehe gënanga moluku mamal̄a amitau deʼ moluku mohimoteke ngohi o bereraino nënanga? Kokiani ngohi tïao aningohaka gënanga Tuanga anibereraika Tuanga?”

⁶Mä o Abraham wïbaluhu, ”Nohidodiai! Uha hakali-kali nïao ahingohaka gënanga dokengika!

⁷Jou, ma Jou Madutu wakokuaha o dihanga, wohiaoka ngohi ahiama ai tauoka deʼ ahiroriadodoto manga bereraka, deʼ Unanga wokobotoka ngohino Unanga aha wohihi döaka o berera nënanga ahingohaka de ahidanongika. Unangö aha wahuloko Ai malaekat mangale wonïriwo, hupaya ngona yakunu namake ahingohaka ngoihekata momatengo dokengoka.

⁸Mä nako o moholehe gënanga moluku monïki dede ngona, done ngona nolapahioka de o koboto nënanga. Sarakia nagaö mauha niao ahingohaka gënanga dokengika.”

⁹Ipaha magilaongo gënanga wogelenga ai giama ai tuanga o Abraham ai gaono mahi dogoronaoko, deʼ wokoboto aha wadiai okianaga o Abraham wogö gaho-gahoko gënanga.

¹⁰Magilaongo gënanga wal̄ë o onta odutu ngimoi deʼ inoli hagala irupa o baranga dema ija-ijaka toaituanga deʼ womajobo o Nahor wogö gogere makotaika maöraha kawomä ngangoikahi; magogere o Mesopotamia o koremieuku idaduoka.

¹¹Woma hiadonika dokengoka, watogumu ai onta gënanga mata-mata hupaya imahibatongo moi o humu madatekoka o kota maporetoka. O wange o bimaoaka deʼ genangala maöraha o ngongoheka yaika o humuika mangale imä guiti o akere.

¹²Daha magilaongo gënanga womä niata, ”Jou, ahi tuanga o Abraham ai Jou Madutu, nohï riwo, hupaya o huhuloko tatotarima i hasili o wange nënanga, ani hininga maoa-oa ahi tuangika o Abraham.

¹³Namäke, ngohi tomaokoino o humu nënanga madatekoka. Mahutuohi o momoholehe o kotaino aha o akere imäguiti.

¹⁴Ngohi aha tomitemo momatengoani, ’Kayaoa de nohiguti ani rube-rube de nohihi döaka ngohi tokere.’ Nako munanga mohaluhu, ’Nokere dika, de ani ontaö mata-mata Bapa aha ngohi tohiokere!ʼ gemunanga doka Jou anigilaongo o Ishak nï ngiriki. Nako o hali gënanga idadi, ngohi aha tohiöriki Jou nihininga ma oaka tongohi ahi tuangika o Abraham.”

¹⁵Maöraha magogiriaka ünanga womäniata gënanga o ngo Ribka o moholehe momatengo duru kaami hailoa de o moholehe maboro, moma hiädono o humuika gënanga moao o rube-rube amibelekaka. Munanga o Betuel ngoi ora, deʼ o Betuel aidimono ganga o Nahor deʼ o ngo Milka; o Nahor gënanga o Abraham ai riaka. O ngo Ribka mödumu-dumutu o humuika gënanga deʼ ami rube-rube mö guiti daha motagi momakilioro.

¹⁶

¹⁷O Abraham ai gilaongo gënanga woma popäta womahi tigi-tigika de womitemo, ”Nohiriwo, ngohaka, nohihidöaka ngohi tokere ani rube-rubeoka gënanga.”

¹⁸O moholehe gënanga mohaluhu, ”Nokere dika Ama,” daha de majapati mohiguti amirube-rube amibelekaka deʼ masöika o rube-rube gënanga mihidöaka magilaongo gënanga wokere.

¹⁹Ipaha magilaongo gënanga iböto wokere; mamoholehe gënanga mïtemo, ”Ani ontaö mata-mata Ama ngohi töguiti o akere, hupaya mata-mata o aiwani gënanga yakunu iokere yawedo-wedonika.”

²⁰Ipaha de majapati o akere o rube-rubeoka gënanga moguhe o onta mango ngokeruku, daha munanga momapopäta momakilioro o humuika la mo uiti o akere iholoioli ilamoko hiädono o aiwani mata-mata gënanga iokere yawedono.

²¹Magogiriaka gënanga o Abraham ai gilaongo gila-gila womi tötailako de kaodemo o döaka moi ma wotemoua. Unanga wöigo wohiöriki boteka ma Jou wadiai ünanga wohasili wadiai i wihöhulo-huloko ekola kowali.

²²Ipaha de mata-mata maonta iokere yawedo-wedonika, o Abraham ai gilaongo wal̄ë o poromu o gurasi de maija-ijaka, daha wohipäke o moholehe gënanga amingunungika. Ami giamino womihi pake o gogoli o gurasi o habi moi.

²³Daha magilaongo gënanga womitemo, ”Abeika nahetongo o naguna aniama. Naga o ngï tomä idu ai tauoka deʼ mata-mata ahi nyawa?”

²⁴”Ahi ama o Betuel, o Nahor deʼ o ngo Milka manga ngohaka,” o moholehe gënanga mohaluhu.

²⁵”Tongomi mia tauoka naga de mangï nomäidu Ama deʼ o gandum maröehe madoolenge kahä ngöe deʼ o aiwani mainomo.”

²⁶Done magilaongo gënanga watilabukuku wïhuba ma Jou.

²⁷Wotemo, ”Tïpuji ma Jou, ahi tuanga o Abraham ai Jou madutu. Ma Jou i nyata wosetia deʼ ai hininga yaoa ahi tuangika o Abraham. Unanga wohituda ngohi wohigila-gilaika ai roriadodotika.”

²⁸Ipaha o moholehe gënanga momapopäta ngomi ayo ami tauika deʼ mohijarita hagala idödadadi gënanga.

²⁹O ngo Ribka ami iranga o riaka womatengo ai romanga o Laban. Unanga woihene ngoihiranga ami jarita mangale okia waheto-hetongo magilaongo gënanga. Unangö wamake o poromu amingunungika deʼ o gogoli ngoihiranga ami giamino gënanga. Done o Laban woma popäta wohupu o tauoka la wïmake o Abraham ai gilaongo gënanga kawohigokoinohi de ai onta mata-mata o humu madatekoka.

³⁰

³¹Daha o Laban wotemo, ”Ama o nyawa wonihibö barakati ma Jou! Uha nogogere maporetoka nënanga. Naino miatauika hoiki. Ngomi mia sadiaka ani kamari Ama deʼ mata-mata anionta mangïö Ama.”

³²Deʼ wonïki magilaongo gënanga deʼ wowohama o tau magoronaika. O Laban wohiguti mata-mata o onta magina, deʼ wohidöaka o gandum maröehe madoolenge deʼ mainomo o aiwani-aiwanika gënanga. Ipaha de gënanga woao o akere o Abraham ai gilaongo deʼ ainyawa mangal̄ou magigihoro.

³³Maöraha o inomo ihidiai, magilaongo gënanga wotemo, ”Tohingahuowahi o behehongo ngohi to ao-ao ngohi aha tol̄omua.” O Laban wïtemo, ”Kaidadi no ade-ade.”

³⁴Daha o Abraham ai gilaongo womulaenge woade-ade, wotemo, ”Ngohi nënanga o Abraham ai gilaongo.

³⁵Ma Jou duru wihibarakati tongohi ahi tuanga gënanga deʼ ünanga wodadi kaya ma ago-agomo. Ma Jou wihidöakoka unangika o duba de matika, o kabingi, o hapi, o onta, o keledai, deʼ o haaka, o gurasi, inoli o gogilaongo o nauru deʼ o ngoheka.

³⁶Ami umuru ikurutil̄eoka, o ngo Sara, ahi tuanga ngoihekata gënanga mongohaka o ngohaka o nauru, deʼ ahituanga wihipuhakaka hagala ai arata ai ngohakika gënanga.

³⁷Unanga wohihuloko ngohi tojaji de makoboto hupaya tohimoteke aipareta. Wotemo, ’Uha ngona nïngiriki ahingohaka ngoihekata o Kanaan matonakoka nënanga mamomoholehe,

³⁸duga-duga ahiroriadodoto de ahiama ai hoanino. Hoʼ noiki dokengika de majapati.’

³⁹Daha ngohi tïleha unangika, ’Sarakia nako o moholehe gënanga moluku monïki dede ngohi?ʼ

⁴⁰Daha wohaluhu, ’Ma Jou salalu tihimote-moteke, aha wahuloko ai malaekat la wonïriwo hupaya tonihö hulo-huloko nohasili. Ngona aha namake ahingohaka ngoihekata ahihoanino mahirete, enagënanga ahiama ai roriadodotino.

⁴¹Duga-duga o öraha okia önanga inioluku, gënanga dahaö ngona ini daenua ani koboto.’

⁴²Deʼ maöraha ngohi tomahiädono kangano o humuino, ngohi tomäniata ahihininga magoronaka, ’Jou, ahi tuanga o Abraham ai Jou Madutu, tanu Jou nadiai ngohi ihihöhulo-huloko tadiai ihasili.

⁴³Ngohi aha itatapu tomaokoino o humu madatekoka nënanga. O oraha okia momatengo o moholehe moboa o akere momäguiti, ngohi aha togahoko munangika hupaya mohihidöaka tokere.

⁴⁴Nako munanga mömodeke madiai, deʼ mohihi lehaoli la mohiokere ahiontaika mata-mata, done gemunanga doka tanu ma Jou womi iriki modadi tongohi ahi tuanga aingohaka gënanga ngoihekata.’

⁴⁵Kata bötowahi tahetongo ahiniata ahihininga magoronaka, o ngo Ribka moböa moao o rube-rube amibelekaka daha mol̄ë o akere o humuoka. Ipaha ngohi tomitemo munangika, ’Nohiriwo nohihidöaka ngohi tokere.’

⁴⁶De majapati munanga mohiguti ami rube-rube amibelekaka deʼ motemo, ’Nokere deʼ anionta mata-mataö Ama aha ngohi tohiokere.’ Daha ngohitokere deʼ ipaha de gënanga ahionta mata-mataö gënanga mohidöaka iokere.

⁴⁷Iböto de gënanga ngohi tomileha, ’O naguna ani ama?ʼ Deʼ munanga mohaluhu, ’Ahi ama o Betuel, o Nahor deʼ o ngo Milka manga ngohaka.’ Daha ngohi tomihi pake o poromu o gurasi amingunungika deʼ o gogoli o habi moi amigiamino.

⁴⁸Ngohi tatilabukuku tïhuba deʼ tïpuji ma Jou, ahi tuanga o Abraham ai Jou Madutu. Unanga wohitudaka ngohi gila-gilaino nenangino, ahi tuanga ai riadodotika, hiädono ngohitakunu timake aingohaka, o moholehe nënanga.

⁴⁹O oraha nanga nako ngini niomodeke niwihidiai ahi tuanga kairorahai deʼ niatotomo nimahitagongo nihaluhu unangika hokä o riadodoto, nako kayaoa niahetongo ngohino mä nako kowali, ma nia hetongo, hupaya ngohi tohiöriki okia kokiani todiai.”

⁵⁰O Laban deʼ o Betuel yohaluhu, ”Karana okia idödadadi nënanga maahali ma Jouino, ngomi ipatutua mihi döaka o putuhu.

⁵¹Nenanga mango Ribka; mal̄aika munanga moninïki Ama deʼ modadi ani tuanga aingohaka Ama, ngoihekata, hokä ma Jou mahirete waheto-hetongoka.”

⁵²Maöraha o Abraham ai gilaongo gënanga woihene toönanga manga demo, ünanga watilabukuku wï huba ma Jou.

⁵³Daha ünanga wohihupu o pakeanga, o poromu o haaka deʼ o gurasi, deʼ mata-mata gënanga womihi döaka o ngo Ribkaika. Amiranga o riakö deʼ ngomi ayo wahidöaka o ngongike mahali-hali.

⁵⁴Maʼ amiranga o Abraham ai gilaongo deʼ mata-mata ainyawa yol̄omo deʼ yokere daha imaidu genangoka. Yarehino mawange önanga yomomikino, magilaongo gënanga wotemo, ”Nihihi gumal̄a ngohi tolio tongohi ahi tuangika.”

⁵⁵Mä amiranga o riaka inoli mango Ribka ngomi ayo yotemo, ”Mal̄aika o ngo Ribka mogögogerohi dede ngomi doneho o minggu moi ekola o wange ngimoiohi, deʼ iböto de gënanga yakunu münanga moiki.”

⁵⁶Mä magilaongo gënanga wätemo, ”Uha nihitumungu ngohi. Ma Jou wadiai ahidodagi ihasili; nihihigumal̄a ngohi tolio ahi tuangika.”

⁵⁷Onanga yohaluhu, ”Naino ngone homiahoko o ngo Ribka deʼ homi leha amidamake.”

⁵⁸Daha önanga imiahoko o ngo Ribka deʼ imi leha, ”Ngona kano modeke ninïki o nyawa nënanga?” Mamoholehe gënanga mohaluhu, ”Iya, ngohi tömodeke.”

⁵⁹Done önanga imihigumal̄a o ngo Ribka deʼ ami dödodiawo yoiki de o Abraham ai gilaongo deʼ mata-mata ainyawa. Daha önanga imihi barakati o ngo Ribka de o demo-demo nënanga, ”Tanu ngona, Ribka nodadi o ayo o nyawa de majuta-juta! Tanu aningohaka de ani danongo yahohihanga manga haturu manga kota!”

⁶⁰

⁶¹De ipaha momahidiai o ngo Ribka de o momoholehe yodädadi amigilaongo, daha yodöa o ontail̄e deʼ imäjobo iwinïki o Abraham ai gilaongo gënanga.

⁶²O öraha gënanga o Ishak woböaka o tonaka ikokakahaka de waino, watilakuru o humu yahö heto-hetongo ”Unanga Wohi Totailako Ngohi” deʼ wogogere o Kanaan matonakoka o koreharail̄e idaduoka.

⁶³Mamoiuku o bobimaoa ünanga ai tauoka de wohupu womau womädagi-dagi o dumuleika, daha wamake o onta mangöe i böa.

⁶⁴Maöraha o ngo Ribka mïmake o Ishak, munanga ami ontaoka de mouti,

⁶⁵deʼ mïleha o Abraham ai gilaongika gënanga, ”O naguna o nauru o dumuleoka gënanga de waino wonädumu-dumutu ngoneino?” ”Geünanga ahi tuanga,” magilaongo gënanga wohaluhu. Daha o ngo Ribka mal̄ë ami salendang deʼ matamunu ami biono.

⁶⁶Ipaha magilaongo gënanga wohijarita o Ishakika hagala wadödodiaioka.

⁶⁷Iböto de gënanga o Ishak womiao o ngo Ribka yowohama ngoi ayo o ngo Sara ami tau magoronaika, deʼ ünanga womä hekata o ngo Ribka. O Ishak duru womihayangi o ngo Ribka; done o Ishak ai hininga de malolaru, ai hininga ihühuha karana ngoi ayo mohihanga.